LÓ XTZÚ guirá reyes de gudx Israel né Judá goyoʼ tipnés buñ ni góc profetas. Guiráyibu biquiinyibu balory né fe par naniʼyibu xtiitz Dios. Xidal profecías ni goniʼyibu bisetlani de tema ni guisuidyno nigoreʼ.

1. Xcalrranitló Jerusalén. Profetas xtuny Dios —Isaías né Jeremías— xidal íz antes goniʼyibu que Jerusalén nanitló né diti sioʼ ni nabany lagarycu. Láaca nayadit goniʼyibu xigony gudx reʼ bitzuitzyibu Dios. Layibu goniʼyibu que bienyibu Jehová, per diti scú gocni, portín bienyibu dioxh falz, diti bunyibu xinésni né gocyibu buñdxiblo (2 Reyes 21:10-15; Isaías 3:1-8, 16-26; Jeremías 2:1–3:13).

2. Bibiguetyibu né bienyibu Jehová. Setent íz goyoʼyibu xomod buñ ni noʼ press lainy gudx Babilonia ór cú bibiguetyibu xcudxbu par bunytzaayibu yoʼ xiroʼ ni noʼ Jerusalén né bibiguetyibu bienyibu Dios (Jeremías 46:27; Amós 9:13-15). Gahxca chopgayoʼ íz antes, Isaías goniʼ que Babilonia guinitlóni né goniʼbu que Ciro ñony láani né láaca goniʼbu que gudx Israel nareʼ de Babilonia. Isaías láaca goniʼbu ximod ñony Ciro láani (Isaías 44:24–45:3).

3. Radxin Mesías né mod rabanybu. Mesías golbu lainy gudx Belén (Miqueas 5:2). Gócbu buñdxo, né gorubybu toib bor órni bioʼbu lainy gudx Jerusalén (Zacarías 9:9). Ná binladxbu né gondxiʼbu buñ, xidal buñ bianladx láabu (Isaías 42:1-3; 53:1, 3). Né láaca goitybu xomod toib buñ mal. ¿Biduidy ndeʼ diitz que cuti biloxni par Mesías la? Yaca, portín biásbu lad gueʼet né xcalgoitybu ronyni que Dios ratuidy xcalkié buñgudxlio scásiʼ (Isaías 53:4, 5, 9-12).

4. Xcalmandary Mesías. Buñ galkié diti labúu rony mandary, per Rey ni Dios golú labúu sony láani. La Biblia raniʼ que gac laabu «Príncipe de Paz» (Isaías 9:6, 7; Jeremías 10:23). Órni gony mandarybu, sabany buñ goxtiguie ló guidopy Gudxlio, né láaca saguaʼyibu goxt né guirá nimal (Isaías 11:3-7). Ma diti sioʼ ni toib clas galguitz (Isaías 33:24). Galgoity láaca ma diti sioʼni (Isaías 25:8). Xidalguixo buñ siás lad gueʼet né sabanyibu stoib (Daniel 12:13).

(Bireʼni ló libros de Isaías, Jeremías, Daniel, Amós, Miqueas né Zacarías.)