¿XIGONY bieed Jesús ló Gudxlio? Láacabu goniʼbu: «Non guiniya de diitz sacró de Gobierno xtuny Dios ló stipnés gudx, portín por ngú Dios bixel naʼ» (Lucas 4:43). Nigoreʼ guisuidyno tap tema ni más bisuidy Jesús de Gobierno reʼ.

1. Jesús nadxin ñac Rey. Jesús láacabu goniʼbu que nacbu Mesías (Juan 4:25, 26). Láaca bislooybu que láabu nacbu Rey ni bibiʼ Daniel ló visión. Jesús gochbu xpiimbu que sadxin dzú sabúbu «ló trono» né láaca xpiimbu nadxin ñony mandary né láabu toibsi (Mateo 19:28). Grupo reʼ Jesús goleʼ laayibu «tidxó xiil». Láaca goniʼbu de «stipnés xiil» ni nac de stoib grupo ni diti ñony mandary né láabu (Lucas 12:32; Juan 10:16).

2. Gobierno xtuny Dios sony xinésni ló Gudxlio. Jesús goniʼ que Gobierno reʼ sony que gac xinésni, que laa Jehová gac nayaa de guirá galrrascú ni Buñdzab goniʼ lainy Edén (Mateo 6:9, 10). Jesús láaca bislooy que ragobiobu buñ de guirá clas órni bisuidybu buñgonaʼ, buñguieeu, buñ ric né buñ pobre. Ná bieedbu par guisuidybu nosi a israelitas, bunybu rutirigaʼlni láabu par gocnébu buñ samaritanos né buñ ni diti nac judíos. Jesús diti gócbu xomod buñ ni gosanir ló religión ló xtzúbu, láabu bidzakbu nitisi clas buñ, diti golúbu buñ.

3. Gobierno xtuny Dios diti sácni toibsi né gudxliogoxreʼ. Jesús bibany ló dzú ro goyoʼ galrradíil. Xcudxbu goyoʼ ló xomandary stoib gudxrop. Né ná scú gocni, diti goyoʼbu lad partid (Juan 6:14, 15). Órni caninébu toib ni cayony mandary goniʼbu: «Gobierno xtuni diti nacni de gudxliogoxreʼ» (Juan 18:36). Né láaca gochbu xpiimbu: «Lóoto diti nacto de gudxliogoxreʼ» (Juan 15:19). Jesús láaca diti biduidybu lagary que xpiimbu nacaʼ guip par nagaityibu buñ, ná nabiʼyibu Jesús ló galnagan (Mateo 26:51, 52).

4. Cristo sony mandary né galnadxiʼ. Jesús goniʼ que sacnébu xpiimbu par labúu guicalóyibu galnagan (Mateo 11:28-30). Né scú bunybu láani. Órni goyoʼbu ló Gudxlio biduidybu xidal litz, xí láani gony buñ órni noʼ ló galrrasaʼ, ximod guibiʼ buñ bidxiich né cós ni rasac, ximod guiscueʼs buñ ló galrradíil né ximod tzoʼ buñ nakit (Mateo, capítulos 5 a 7). Láabu bislooybu galnadxiʼ. Nitisi buñ, dada buñdxo goyee ronoʼbu portín gopyibu confianz que Jesús sonladx layibu. ¡Ndeʼ raslooy que Jesús sac toib Rey ni gac natzaayxat!

Per noʼ stoib cós ni buny Jesús órni bisuidybu de Gobierno xtuny Dios. Láabu bunybu xidal galrradziguiaʼ. ¿Xigony bunybu láani? Guibiʼno láani.

(Bireʼni ló libros de Mateo, Marcos, Lucas né Juan.)