1. ¿Xigony goyoʼ Jesús ló galrrasaʼ goxin ni ma gaitybu?

 GOXIN ni ma gaity Jesús goyoʼbu galrrasaʼ por xpiimbu portín gonbu que mápa mer guisiambu biinreʼ. Goxincu Jesús gochbu xpiimbu: «Lóoto diti nacto de gudxliogoxreʼ» (Juan 15:19). Después gochbu Bixiosbu ndeʼ: «Layibu diti nacyibu de gudxliogoxreʼ, xomodca naʼ diti naca de gudxliogoxreʼ» (Juan 17:15, 16). ¿Xí bidudy diitz Jesús?

2. ¿Xí ngú «gudxliogox» ni bisetlaa Jesús?

² «Gudxliogox» ni bisetlaa Jesús, nacni buñ ni diti rony ni ná Dios né ni noʼ ladxña Buñdzab (Juan 14:30; Efesios 2:2; Santiago 4:4; 1 Juan 5:19). ¿Xí labúu gonyno par diti gacno toibsi né «gudxliogoxreʼ»? Ló capítulo reʼ, sasuidyno xidal cós ni labúu gonyno. Primer, dipa guisianno Gobierno xtuny Dios né guisagaʼ galayno, ndeʼ radudy diitz diti gony apoyarno ni toib partid. Ni rarop, diti gonyno ni náapa espíritu xtuny gudxliogoxreʼ. Ni rion, guactzayno xhapno né gactzayno né midid. Ni rasaʼ tap, diti guisobladxno bidxiich. Né ni rasaʼ gáay, guiquiinno guirá ni ma bidudy Dios lóono. (Bibiʼ ni ná nota 16, «Guisagaʼ galayno»).

3. ¿Ximod bibiʼ Jesús partid?

³ Órni Jesús goyoʼ ló Gudxlio bibiʼbu que buñ cualó xiroʼ galnagan né godudyibu ló galsii. Goyoʼbu galrrasaʼ por buñreʼ né goniiny ñacnébu biinreʼ. Per diti gosanirbu ló partid. Gonbu que buñ caquiin Gobierno xtuny Dios, láabu bidxinbu gócbu rey de Gobierno reʼ. Láaca Gobierno xtuny Dios ngú ni máspa goniʼbu órni bisuidybu buñ (Daniel 7:13, 14; Lucas 4:43; 17:20, 21). Jesús dipa goyoʼbu lad partid, guirá ór gosagaʼ galaybu. Órni goyoʼbu nisló toib buñguieeu ni buny mandary Roma ni góc laa Poncio Pilato, Jesús goniʼ: «Gobierno xtuni diti nacni de gudxliogoxreʼ» (Juan 18:36). Xpiimbu láaca diti goyoʼ lad partid. Toib libro ni rasetlaa de historia náni que cristianos ni bibany nírcu «diti gosaguelyibu ñonyibu dxiin ni rony buñchiin» (On the Road to Civilization [Néz par civilización]). Ló naareʼ lóono ni nacno cristianos láaca diti rioʼno lad partid. Nosi rony apoyarno Gobierno xtuny Dios né rasagaʼ galayno órni buñ raniʼ de partid (Mateo 24:14).

4. ¿Ximod rony apoyarno Gobierno xtuny Dios?

⁴ Pablo gochbu cristianos ungidos: «Nacno embajadores ni rioʼ xalagary Cristo» (2 Corintios 5:20). ¿Xigony goniʼbu ndeʼ? Embajadores rony representaryibu gobierno xtunybu ló stoib gudxrop, por ngú diti rioʼyibu lad partid lainy gudx ro ronyibu dxiin. Ungidos ni gony mandary toibsi né Cristo lainy guibá, nacyibu xomod embajadores. Layibu rony representaryibu Gobierno xtuny Dios, por ngú  diti rioʼyibu lad partid (Filipenses 3:20). Xalagary ngú, racnéyibu xidalguixo buñ par gan de Gobierno xtuny Dios. «Stipnés xiil», ni nap esperanza de guibany por tipzó ló Gudxlio copy, rony apoyaryibu ungidos né láaca diti rioʼyibu lad partid (Juan 10:16; Mateo 25:31-40). Scú láani, lóono ni nacno cristianos diti rioʼno lad partid (bíil Isaías 2:2-4).

5. Bisetlaa xigony lóono ni nacno cristianos diti rioʼno ló guerr.

⁵ Lóono ragobiono herman suusi ñacyibu xfamilno. Noʼno toibsi ná nacno de xidal gudxrop né lagary (1 Corintios 1:10). Pal ñoʼno ló guerr nacalóno xfamilcano, xhermanno ni Jesús buñ mandary gandxiʼno (Juan 13:34, 35; 1 Juan 3:10-12). Jesús gochbu xpiimbu que dada xi enemigyibu non gandxiʼyibu (Mateo 5:44; 26:52).

6. Lóono ni nacno cristianos, ¿ximod rabiʼno buñchiin?

 ⁶ Ná diti rioʼno lad partid, ronyno xtem por gacno buñtzay né stipnés buñ. Por ejemplo, rapno respet buñchiin órni rasobno ley xtunyibu né órni raguiixno impuestos. Per guirá ór radudyno «a Dios ni nac xtuny Dios» (Marcos 12:17; Romanos 13:1-7; 1 Corintios 6:19, 20). Ndeʼ radudy diitz gandxiʼno, guisobno né gony adorarno láabu. Más rasac guisobno Jehová né dada noʼno puext gaityno (Lucas 4:8; 10:27; bíil Hechos 5:29; Romanos 14:8).

7, 8. a) ¿Xí láani ngú «espíritu xtuny gudxliogoxreʼ»? b) ¿Ximod rakíilni buñ?

⁷ Diti gacno toibsi né xcudxliogox Buñdzab ndeʼ radudy diitz que diti guidudyno lagary que «espíritu xtuny gudxliogoxreʼ» gony mandary lóono. Espíritu reʼ láani ngú mod nac né mod rony pensary Buñdzab né rakíilni buñ ni diti rony adorar a Jehová gony scúca. Per lóono ni nacno cristianos diti ronyno ni náapa espíritu reʼ. Xomod goniʼ Pablo: «Lóono diti ma cuaʼno espíritu xtuny gudxliogoxreʼ, xalagary ngú ma cuaʼno espíritu ni sieed de Dios» (1 Corintios 2:12; Efesios 2:2, 3). (Bibiʼ ni nota 17, «Espíritu xtuny gudxliogoxreʼ»).

⁸ Espíritu xtuny gudxliogoxreʼ ronyni que buñ tzoʼ galrrasaʼ por láasibu, gac buñ farmay né gac buñ nayaʼ. Ndeʼ rony que gonyibu crer que diti raquiin guisobyibu Dios. Buñdzab rioladx que buñ gony ni náapa guic né diti gonyibu pensary ximod  guirecayibu. Raniiny láabu que buñ gony crer que ni más rasac ngú ni raniiny beʼel laidyibu né ni raniiny bisalóyibu (1 Juan 2:16; 1 Timoteo 6:9, 10). Per ni máspa, Buñdzab rayopy mod guiscú cristianos gony pensary xomod láabu (Juan 8:44; Hechos 13:10; 1 Juan 3:8).

9. ¿Ximod labúu guikíil «espíritu xtuny gudxliogoxreʼ» lóono?

⁹ Xomodca buu ni racaʼno, espíritu xtuny gudxliogoxreʼ noʼni guirá lad. Pal ronyno xtem par cueʼno láani tiplad diti sakíilni lóono gonyno ni nápani (bíil Proverbios 4:23). Labúu guikíilni lóono gonyno cós ni ralooypani ditini mal. Por ejemplo, labúu nasalóno ñonyno pensary xomod rony buñ ni diti rony ni ná Jehová (Proverbios 13:20; 1 Corintios 15:33). Espíritu xtuny gudxliogoxreʼ labúu guidxinni ronoʼno né pornografía, buñ apóstatas o galrraguit ro buñ rioladx gony gan. (Bibiʼ ni ná nota 18, «Buñ apóstatas»).

10. ¿Xí labúu gonyno par guicalóno espíritu xtuny gudxliogoxreʼ?

¹⁰ Per ¿xí labúu gonyno par diti gony mandary espíritu xtuny gudxliogoxreʼ lóono? Non tzoʼno gax de Jehová né guidudyno lagary conésbu lóono né xilitzbu. Guirá ór non guinabno espíritu santo. Láaca guirá ór non gonyno xchiimbu. Diti noʼ stoib ni nap más galnadip que Jehová, por ngú nandxichno que labúu gacnébu lóono par guicalóno espíritu xtuny gudxliogoxreʼ (1 Juan 4:4).

11. ¿Ximod rakíil espíritu xtuny gudxliogoxreʼ buñ gactzay?

¹¹ Láaca raslooyno que diti racno toibsi né gudxliogoxreʼ  por mod nac xhapno né mod ractzayno. Por mod ractzay buñ rayopyibu mod que stipnés guibiʼ layibu, guiscuanyibu galyoxh ló xpensary stipnés, guislooyibu que diti noʼ chú rony mandary layibu o dada guiatzyibu por xpidxiichyibu. Láaca noʼ buñ ni diti rioʼ galrrasaʼ gactzay né nacyibu buñ buidy. Diti non gonyno xomod layibu.

12, 13. ¿Xí textos sacné lóono ganno ximod gactzayno?

¹² Lóono ni nacno xpiin Jehová raquiinno lairy ni rien sacró né ni nayaa rotísi lagary ro rioʼno.  Ractzayno né midid né ragoʼno xcalrrienno par guislooyno que rony adorarno Dios (1 Timoteo 2:9, 10; Judas 21).

¹³ Mod ractzayno labúu gonyni que stipnés guiniʼ sacró de Jehová né de xpiimbu o guiniʼyibu mal. Por ngú, raniiny lóono gonyno guirá cós par gonyxiroʼno Dios (1 Corintios 10:31). Pal ractzayno né midid, sapno respet mod rasac né mod rony pensary stipnés. Por ngú, órni rabúno xi lairy guacno o ximod gactzayno, non guisetnaladxno que ni gonyno sacnéni o sachelni ñeʼ buñ (1 Corintios 4:9; 2 Corintios 6:3, 4; 7:1).

14. ¿Ló xí cós non gonyno pensary órni cuuno xí lairy guacno órni guienno Dios?

¹⁴ Gonyno pensary ximod nac lairy ni rocno órni rioʼno reunión o órni ranino xtiitz Dios. ¿Nainy lóono que stipnés buñ guidziguiaʼ lóono la? ¿Ratudyno ló galnatoy stipnés buñ por mod nac xhapno la? ¿Ronyno pensary que stipnés diti non guiniʼ ximodpa gactzayno la? (Filipenses 4:5; 1 Pedro 5:6). Wal rioladxno guienno sacró. Per ni rony que guienno sacró láani ngú cualidades cristianas ni napno, né ngú ni rabiʼ Jehová. Cualidades reʼ raslooy xipa mod nacno, ndeʼ radudy diitz, mod nac xcalnabanyno «ndeʼ nigolú rasac nisló Dios» (1 Pedro 3:3, 4).

15. ¿Xigony Jehová diti ma bidudy lóono toib lista ro sieed xipa mod gac xhapno né gactzayno?

¹⁵ Jehová diti ma bidudy toib lista lóono ro sieed ximodpa gactzayno né ximod guacno lairy. Xalagary ngú, ma bidudybu xilitz la Biblia lóono ni racné  lóono gonyno xinésni (Hebreos 5:14). Jehová raniiny gandxiʼno láabu né gandxiʼno stipnés, ngú conés lóono par gonyno xinésni, ná pal nacni cós xiroʼ o cós mitien (bíil Marcos 12:30, 31). Xpiin Dios ni noʼ ló guidopynac Gudxlio, diti toibsi mod ractzay. Per xhapyibu rienni sacró né rioladx buñ láani.

16. a) ¿Xigony ranino que mod rabiʼ gudxliogoxreʼ bidxiich diti noʼni de acuerdo né ni bisuidy Jesús? b) ¿Xí non guinabdiitzno lóocano?

¹⁶ Buñdzab rioladx que buñ gony pensary que  bidxiich né cós ni rasac sagoʼ nakit layibu. Per lóono nanno que diti nigolúni. Napno confianz ló ni goniʼ Jesús: «Ná órni buñ nap xidal cós, diti láani sonyni que guibanybu» (Lucas 12:15). Bidxiich diti labúu coʼ nakitni lóono. Diti labúu sonyni que tzoʼ ximigdxinno nili sonyni que guiguaʼno sacró né guibanyno tipzó. Nanno que raquiinno bidxiich né raniiny guibanyno sacró. Per Jesús bisuidybu que ni coʼ nakit lóono ngú guidzakno Jehová sacró né coʼno xchiimbu primer lagary (Mateo 5:3; 6:22). Por ngú gonabdiitz ndeʼ looy: «¿Rasobladxi bidxiich xomod rony gudxliogoxreʼ la? ¿Guirá ór roni pensary ló bidxiich o pór de láasini raniya la?» (Lucas 6:45; 21:34-36; 2 Juan 6).

17. ¿Ximod sabanyno pal diti rasobladxno bidxiich?

¹⁷ Pal ronyno xtem par gonyno xchiin Jehová né diti rasobladxno bidxiich xomod gudxliogoxreʼ, diti nac nacsi sabanyno (Mateo 11:29, 30). Sioʼno conforme né ni napno né sabanyno goxtiguie (Mateo 6:31, 32; Romanos 15:13). Diti sadudy midid sioʼno ló galrrasaʼ por bidxiich (bíil 1 Timoteo 6:9, 10). Láaca sioʼ nakitno pal radudyno ni napno (Hechos 20:35). Labúu guiguaʼno más tiemp né buñ ni nadxiʼno né dada labúu saisyno más sacró (Eclesiastés 5:12).

18. ¿Xí láani raniiny Buñdzab?

¹⁸ Buñdzab rayopy mod par diti guidzakno Jehová, por ngú gonyno rutirigaʼlni lóono par diti galsitno  de Jehová. Lóono «cacalsaʼno demony» (Efesios 6:12). Buñdzab né xidemony diti raniiny layibu guibanyno nakit nili guibanyno tipzó (1 Pedro 5:8). Ná guirá enemig reʼ napyibu galnadip, labúu guicalóno layibu né xcalrracné Jehová.

19. Goniʼ ximod nac guip ni radudy Dios lóono ni ritlaa ló Efesios 6:14-18.

¹⁹ Ló dzú ni see, soldad biquiin toib guip par nalaa layibu ló guerr. Scúca, non guiquiinno guip ni ma bidudy Jehová lóono par diti noʼ xi gacno (Efesios 6:13). La Biblia raiby lóono ndeʼ: «Colguisagaʼ dxich né colguixiʼ cinturón lainyto, láani ngú galnigolú. Colguiquiin guip ni rap ladxdaʼto, láani ngú justicia, né colguicañeʼ galguit né coltzoʼ puext par guiniʼto diitz sacró de paz. Per ni máspa, colguicaʼ escudo xiroʼ de fe, né láani labúu sasioʼoyto guirá flech ni nap guii ni rasal Buñdzab loguiaʼto. Láaca, colguiquiin casco ni ralaa, né espad xtuny espíritu, láani ngú xtiitz Dios. Órni guininéto Dios, guirási ór colguinab lóo Dios né espíritu, colgony guirá clas oración né colguinabgoluʼ lóo Dios» (Efesios 6:14-18).

20. ¿Xí non gonyno par labúu guilaa lóono guip ni sieed de Dios?

²⁰ Pal toib soldad rialadx toibtica de guip xtuny, rioʼbu ló riesga guireʼ heridbu. Pal nainy lóono que guip reʼ guilaa lóono, dipa guialadxno ni toibni. Guicaano cuidad pal xquipno diti caxinni né guirási ór guacno láani. Sacalórano Buñdzab dada órni guinitlóbu né xidemonybu ló Gudxlio (Apocalipsis 12:17; 20:1-3). Por ngú, pal looy cayonylo xtem  par guisianlo pensary mal o stoib debilidad, diti guireʼganlo (1 Corintios 9:27).

21. ¿Ximod labúu gonyno gan Buñdzab?

²¹ Buñdzab más nadip que lóono, per labúu gonyno gan láabu né xcalrracné Jehová. Par dipa guisianno Dios raquiin guininéno láabu, guisuidyno Xtiitzbu né diti gony faltno reunión (Hebreos 10:24, 25). Guirá ndeʼ sacné lóono dipa guisianno Jehová né tzoʼno puext par gony defenderno fe xtunyno.

22, 23. a) ¿Xí láani sacné lóono tzoʼno puext guirá ór par gony defenderno fe xtunyno? b) ¿Xí láani guisuidyno ló capítulo ni sieed?

²² Non tzoʼno puext par gony defenderno fe xtunyno guirá ór (Juan 15:19). Lóono ni nacno testigos xtuny Jehová, diti nacno xomod buñ ni noʼ ló gudxliogoxreʼ. Por ngú, gonabdiitz looyca: «¿Rientzaaya xigony ronyno pensary né ronyno modreʼ la? ¿Napa confianz ló ni ná la Biblia né ló mós ni rony xinésni né naní xcalrrien la?» (Mateo 24:45; Juan 17:17). «¿Raniya que naca testigo xtuny Jehová la?» (Salmo 34:2; Mateo 10:32, 33). «¿Labúu rabexaya ni roni crer la?» (bíil 1 Pedro 3:15).

²³ Casi guirá ór naguel radudyno cuent xi láani non gonyno par diti gacno toibsi né gudxliogoxreʼ. Per rioʼ ór moda naganni. Buñdzab raquiin xidal tramp par guiabno loni, né toibtica tramp ni raquiimbu ngú galnakit. ¿Ximod labúu cutzayno galnakit ni gonyno? Guisuidyno láani ló capítulo ni sieed.