Bar guirá ni nadxiʼ a Jehová né Xtiitzbu, la Biblia:

Jesús goniʼ: «Simbuto ni nigolú, né ni nigolú salaa lóoto» (Juan 8:32). ¿Rasetnaladxlo ximod gosaclo órni bienlo galnigolú ni rasuidy la Biblia la? Bibaladxno órni gonno que labúu guisuidyno ni nigolú ná rabésno ló toib Gudxlio ro bidzá galrrascú (2 Timoteo 3:1).

Jehová Dios raniiny láabu guimbuno galnigolú, né nainy lóono guisuidyno stipnés buñ ni nábu portín nadxiʼno layibu. Per noʼra más ni non gonyno par gonyno xchiin Dios. Rapno xiroʼ respet xilitzbu, por ngú ronyno rutirigaʼlni lóono par guisobno ni nábu. Jesús golexa ximod guislooyno que nadxiʼno Jehová. Goniʼbu: «Pal rasobto ni roni mandary lóoto, diti salsitto de xcalnadxiʼya, xomod naʼ ma bisoba ni rony mandary Bixiosa né diti ma golsitta de xcalnadxiʼbu» (Juan 15:10).

Jesús nigolú nadxiʼ Bixios né ronybu guirá ni ranab Bixiosbu láabu. Pal rasuʼno Jesús ló guirá ni ronyno, Jehová sandxiʼ lóono né sabanyno goxtiguie. Xomod goniʼ Jesús: «Nigoreʼ ni ma nanto guirá ndeʼ, dichós lóoto pal ronyto láani» (Juan 13:17).

Raniiny lóodo que libro reʼ gacnéni looy guibanylo mod casuidylo ló la Biblia né gaclo ximig Dios. Ranabdo lóo Dios gac nadip galnadxiʼ ni napto láabu né «diti galsitto de xcalnadxiʼ Dios [...] laʼga cabésto guibanyto tipzó» (Judas 21).