1-3. a) ¿Xí rony pensary xidal buñ de xchiin? b) ¿Xí galrranabdiitz guicapyno ló capítulo reʼ?

 LÓ GUIDOPYNAC Gudxlio buñ nigolú rony dxiin par gap ni guá né labúu guiyaʼan xfamil. Xidal buñ diti rioladx xchiin, né noʼ buñ dada radopy xcalnabany órni riee dxiin. Pal rasaclóo modreʼ, ¿xí labúu gonylo par tzoʼ nakitlo né guioladxlo xchiinlo?

² Jehová ná: «Guirá buñ guá né gueʼ, né guibaladx por dxiin nadip ni rony. Ndeʼ nac toib galrrascad ni sieed de Dios» (Eclesiastés 3:13). Jehová bisaʼ lóono par guiniiny né guioladxno gonyno dxiin, né nainy láabu que guibaladxno por xchiinno (bíil Eclesiastés 2:24; 5:18).

³ Per ¿xí labúu gacné lóono guioladxno dxiin ni ronyno? ¿Xí clas dxiin diti non gonyno? ¿Ximod labúu gony cumplirno xchiinno sin cueʼno tiplad adoración ni radudyno Jehová? ¿Né xí dxiin más rasac gonyno?

4, 5. ¿Xí rony pensary Jehová de dxiin?

⁴ Jehová nigolú rioladx gony dxiin. Génesis 1:1  ná: «Dzú gosaló, Dios bisaʼ guibá né gudxlio». Después ni bisaʼbu Gudxlio né guirá ni noʼ loni, goniʼbu que guirá ni bisaʼbu nigolú sacróyenni (Génesis 1:31). Jehová nigolú bibaladx órni bibiʼbu guirá ni bisaʼbu (1 Timoteo 1:11).

⁵ Jehová cayonysa dxiin. Jesús goniʼ: «Bixiosa cayonysa dxiin dada nigoreʼ» (Juan 5:17). Ná diti nanno guiráxadit cós sacróyen ni Jehová cayony, per rimbuno tipnésni. Nanno que cabúbu buñ ni gony mandary né Xiimbu lainy guibá (2 Corintios 5:17). Jehová láaca ranbu buñ né ragonésbu xpiimbu par guiniʼ xtiitzbu. Por ngú, xidalguixo buñ ma rimbu láabu né cabésyibu guibanyibu tipzó ló Gudxlio móz (Juan 6:44; Romanos 6:23).

6, 7. ¿Ximod nanno que Jesús buny xchiin galán?

⁶ Jesús láaca nigolú rioladx gony dxiin. Antes de ñeedbu ló Gudxlio, Jesús góc toib «mextra ni nan rasaʼ» né gocnébu Dios bisaʼ guirá cós ni noʼ lainy guibá né ni noʼ ló Gudxlio (Proverbios 8:22-31; Colosenses 1:15-17). Jesús bunygoluʼ dxiin órni goyoʼbu ló Gudxlio. Dzú gócbu mbioxhlas, bisuidybu bunytzaaybu yac, né nandxichno que bunytzaaybu mexh, xilet o stipnés cós né bisaʼbu yoʼ. Nigolú galán bunybu xchiimbu por ngú buñ bimbu láabu xomod toib ni bunytzaay yac (Marcos 6:3).

⁷ Per dxiin ni más rasac ni buny Jesús ló Gudxlio láani ngú ni goniʼbu diitz sacró de Gobierno  xtuny Dios né bisuidybu buñ guimbu Bixiosbu. Nosi gopbu tzón íz gorol par bisuidybu buñ xtiitz Dios, né bunybu dxiin desde rosil dada godzudaʼ (Lucas 21:37, 38; Juan 3:2). Nigolú gosaabu ló néz yoo par bisuidybu buñ ni ná xtiitz Dios (Lucas 8:1).

8, 9. ¿Xigony nigolú bioladx Jesús xchiin?

⁸ Órni Jesús bunybu xchiin Jehová gocni suusi galrro ni bidudy fuers láabu. Dada goyoʼ dzú nigolú bunybu dxiin né diti gopbu tiemp par ñoobu (Juan 4:31-38). Guirá ór bisuidybu stipnés buñ de Bixiosbu. Por ngú, gochbu Jehová ndeʼ: «Naʼ ma bunyxiroʼya looy ló gudxlio, ma bisloʼoxa dxiin ni bidudylo naʼ goni» (Juan 17:4).

⁹ Xomod ma bisuidyno Jehová né Jesús nigolú ronyibu dxiin né rioladxyibu xchiinyibu. Né lóono láaca raniiny guisuʼno Dios né guicanalno raxt ñeʼ Jesús (Efesios 5:1; 1 Pedro 2:21). Por ngú, ronyno xchiinno galán.

10, 11. ¿Xí sacné lóono guioladxno xchiinno?

¹⁰ Xpiin Jehová nigolú rony dxiin par tudy dzú. Nainy lóono guioladxno xchiinno, per rioʼ ór rasac naganno láani. ¿Xí labúu gonyno pal diti rioladxno xchiinno?

¹¹ Gonyno por guibiʼno xchiinno sacró. Diti labúu guinino pu gonyno dxiin o balac ór gonyno dxiin, per labúu guitzaʼno mod rabiʼno xchiinno. Ni labúu gacné lóono ngú guienno xi  ranab Jehová lóono. Por ejemplo, Jehová ranab que buñguieeu gony dxiin par gan xfamil. Láaca la Biblia ná que pal toib buñ diti radxinaʼ ni guá xfamil «más dealtir ronybu que toib buñ ni diti nap fe» (1 Timoteo 5:8). Pal rasanirlo lainy famil, nandxichno que ronylo xtem por guidudylo ni caquiin xfamilo. Ná pal rioladxlo xchiinlo o yaca gop confianz que Jehová rabaladx órni ranlo xfamilo.

12. ¿Xí galnasác racaʼno pal diti rabanno xpatronno né ronyno dxiin galán?

¹² Diti cuanno né gonyno dxiin galán. Ndeʼ labúu gacné looy par guioladxlo xchiinlo (Proverbios 12:24; 22:29). Modreʼ xpatronlo sap confianz looy. Buñ ni diti rabann bidxiich, ni diti rabann cós, ni diti rasnit tiemp ló dxiin né ni rony cumplir né xchiin, xpatronbu ragobioo láabu más (Efesios 4:28). Per ni más rasac ngú que Jehová guibiʼ que ronylo dxiin galán. Órni nanlo que Dios rioladx mod ronylo dxiin ngú sony que gaplo toib galrrien natzaay (Hebreos 13:18; Colosenses 3:22-24).

13. ¿Xí stoib galnasác sacaʼno pal galán ronyno dxiin?

¹³ Guisetnaladxno que mod ronyno xchiinno labúu gonyxiroʼni Jehová. Ndeʼ nac stoib razón ni labúu guibaladxno ló xchiinno (Tito 2:9, 10). Dada toib ni ronynéno dxiin labúu guisuidy la Biblia portín rabiʼbu que galán ronyno dxiin (bíil Proverbios 27:11; 1 Pedro 2:12).

14-16. ¿Ló xí cós non gonyno pensary órni cuuno xí dxiin gonyno?

¹⁴ Ló la Biblia diti noʼ toib lista de dxiin ni labúu gonyno né ni diti labúu gonyno, per noʼ litz ni labúu gacné lóono par ganno xi dxiin labúu gonyno (Proverbios 2:6). Guiquiinno litz ni sieed ló la Biblia par guicapyno tipnés galrranabdiitz reʼ.

¹⁵ Ló dxiinreʼ, ¿soni cós ni Jehová ná que nac  cós mal la? Ma bisuidyno que Jehová diti rioladx cuanno né guiscúno (Éxodo 20:4; Hechos 15:29; Efesios 4:28; Apocalipsis 21:8). Por ngú diti non gonyno dxiin ni diti noʼ de acuerdo né ni ranab Jehová (bíil 1 Juan 5:3).

¹⁶ ¿Rony apoyar o rabeʼ loguiaʼ dxiinreʼ cós ni Jehová rianladx la? Por ejemplo, ¿xí ñonylo pal ñoʼ ni ñaiby looy nacapylo teléfono lainy toib clínica ro buñgonaʼ ratudy xiin? Diti mal guicapy buñ teléfono, per looy nanlo xi rony pensary Jehová órni buñgonaʼ ratudy xiin. Ná diti looy cayacnélo par guitudy buñgonaʼ xiin. Jehová láaca sabiʼbu que looy cayaclo toibsi né buñ ni ratudy xiin (Éxodo 21:22-24).

17. ¿Xí láani sacné lóono coʼno guicno gonyno xinésni nisló Dios?

¹⁷ Pal raquiinno xilitz la Biblia, labúu saquiinno xcalrrienno par ganno «xi láani ngú xinésni né xi láani yaca» (Hebreos 5:14). Gonabdiitz looyca: «Pal roni dxiinreʼ, ¿sachela ñeʼ stipnés la? ¿Sasiana tzeʼela, xiinna né tzaʼya sit o stoib gudxrop par goni dxiinreʼ la? ¿Xí sasacloyibu pal roni ndeʼ?».

18. ¿Xigony labúu guisac naganno coʼno xchiin Dios primer lagary?

¹⁸ Rasac naganno coʼno xchiin Jehová primer lagary portín nabanyno ló «dzú nigolú nagan par guicaló buñ» (2 Timoteo 3:1). Nagan guidzelno dxiin né gaclano loni. Non ganno xfamilno, per nandxichno que más rasac coʼno xchiin Dios primer lagary. Diti guidudyno lagary que bidxiich  cobni xtiempno (1 Timoteo 6:9, 10). Por ngú, ¿ximod labúu ganno «xi ngú ni más rasac», né láaca gantzayno xfamilno? (Filipenses 1:10).

19. ¿Ximod sabiʼno dxiin pal napno confianz lóo Jehová?

¹⁹ Gapno confianz lóo Jehová (bíil Proverbios 3:5, 6). Nanno que Jehová nan xi caquiinno né rioʼbu xiroʼ galrrasaʼ por lóono (Salmo 37:25; 1 Pedro 5:7). Dios raiby lóono ló la Biblia: «Mod nabanyto diti guislooyni que ronladxto bidxiich, né coltzoʼ nakit né ni napto. Portín Dios ma goniʼ ndeʼ: Dipa sasiana looy né dipa sioʼ dzú saslaʼñaya looy» (Hebreos 13:5). Jehová diti raniiny que guirá ór tzoʼno galrrasaʼ ximod guiyaʼanno xfamilno. Guirá ór ma bislooybu que labúu guidudybu ni caquiin xpiimbu (Mateo 6:25-32). Por ngú, ná pal napno dxiin o yaca guisuidyno la Biblia, guireʼno yoʼ por yoʼ né tzoʼno reunión (Mateo 24:14; Hebreos 10:24, 25).

20. ¿Xí non gonyno par tzoʼno conforme né ni napno?

²⁰ Tzoʼno conforme né ni napno (bíil Mateo 6:22, 23). Non gonyno láani scú par gonyno xchiin Jehová. Nanno que diti naní xcalrrienno pal más raniiny gapno bidxiich, guibanyno natzatz o gapno aparat ni más nicopy, xalagary guidzakno Dios. Per ¿xí sacné lóono coʼno primer lagary cós ni más rasac? Gonyno rutirigaʼlni lóono par diti tzoʼno ló diʼin. Pal noʼno ló diʼin, guiyopyno mod quiixno láani. Pal diti napno cuidad, cós ni rasac labúu cobni xtiempno né xfuersno né diti sapno tiemp  par guininéno Dios, par guisuidyno xquiichno o par guisuidyno buñ. Xalagary tzoʼno galrrasaʼ por bidxiich, nainy tzoʼno conforme né ni napno, xomod galrro né lairy (1 Timoteo 6:8). Nac nitisi nac mod nabanyno, rasac guibiʼno ximod nabanyno par ganno ximod labúu gonyno más xchiin Jehová.

21. ¿Xigony diti guialadxno xí láani ngú ni más rasac?

²¹ Guientzaayno xi ngú ni más rasac. Non guiquiinno  xtiempno galán, xfuersno né xpidxiichno. Pal diti rapno cuidad, cós ni diti tampa rasac xomod scuel o bidxiich, sabeʼni xtiempno. Jesús goniʼ: «Primer colguiyopy Gobierno né justicia xtuny Dios» (Mateo 6:33). Ni ragoʼno guicno gonyno, costumbres ni napno, dxiin ni ronyno guirá dzú né metas xtunyno saslooyni xi láani noʼ primer lagary lainy xcalnabanyno.

22, 23. a) ¿Xí dxiin más rasac gonyno? b) ¿Xí sacné lóono guioladxno xchiinno?

²² Xchiin Jehová ngú ni más rasac gonyno. Toibtica dxiin ni más rasac láani ngú guinino diitz sacró de Gobierno xtuny Dios (Mateo 24:14; 28:19, 20). Xomodca Jesús, nainy gonyno dxiinreʼ rutirigaʼlni lóono. Tipnés cristianos riee stoib lagary ro caquiin más herman par guiniʼ xtiitz Dios. Stipnés casuidy guiniʼ stoib diitz par labúu guisuidyibu buñ. Biiy diitz né layibu. Nandxichno que saibyibu looy que nigoreʼ más goxt nabanyibu (bíil Proverbios 10:22).

²³ Sigory ronyno dxiin xidal ór o napno xidal dxiin par labúu tudyno dzú. Jehová rabiʼ láani né par láabu nigolú rasac órni ranno xfamilno. Por ngú nac nitisi nac dxiin ni ronyno, guisuʼno Jehová né Jesús né gonyno dxiin galán. Né guisetnaladxno que más rasac gonyno xchiin Jehová né guinino diitz sacró de Gobierno xtunybu. Ngú nigolú sagoʼ nakit xcalnabanyno.