1, 2. Pal toib galtzeʼel cacaló galnagan, ¿radudyni diitz que ma diti saquiin xcaltzeelbu la? Golexa láani.

 GALTZEʼEL nacni toib galrrascad xtuny Jehová. Buñ labúu guibany goxt lainy xcaltzeel. Ná scú, guirá galtzeʼel racaló galnagan. Tipnés galtzeʼel racaló xidal galnagan, né sigory ma diti radzakyibu saʼyibu sacró xomod nírcu.

² Buñ ni ma noʼ tzeʼel, diti non guidziguiaʼyibu pal rioʼ ór racalóyibu galnagan. Ndeʼ diti radudy diitz que xcaltzeelo ma diti saquiinni. Noʼ galtzeʼel ni cualó xiroʼ galnagan per labúu bireʼyibu loni né nigoreʼ ma sacró rabésyibu. ¿Ximod bunyibu láani?

3, 4. ¿Xí labúu guisaclóo tipnés galtzeʼel?

³ Órni chop buñ rony galtzeʼel diti toibsi cós rioladxyibu, diti toibsi mod ronyibu pensary né gadzé mod ronyibu toib cós. Láaca sigory diti toibsi mod goniʼsyibu o nacyibu de gadzé gudx. Raquiin cueʼyibu tiemp né gonyibu xtem par guimbuyibu né guienyibu saʼyibu.

 ⁴ Conforma radudy íz, rioʼ ór tigaagayibu nigolú rioʼ xchiinyibu né rasaló ralsityibu de saʼyibu. Dada raloyni que ma diti rabesnéyibu saʼyibu. ¿Xí labúu gacné layibu par guiguaʼyibu toibsi?

5. a) ¿Xí labúu gacné a cristianos par guibigaxyibu tzeʼelyibu? b) Mod ná Hebreos 13:4, ¿ximod non guibiʼno galtzeʼel?

⁵ Jehová radudy consej lóoto par guibigaxto más láabu né guibigaxto tzeelto (Salmo 25:4; Isaías 48:17, 18). Láabu nábu: «Galtzeʼel gacni nayaa nisló guirá buñ» (Hebreos 13:4). Casi guirá ór, rapno respet cós ni rasac par lóono. Dios raniiny que guibiʼno galtzeʼel xomod toib cós ni rasac. Por ngú, non ganno xcaltzeelno né guisacni par lóono.

6. Mod ná Mateo 19:4-6, ¿xí raniiny Jehová gony buñ ni ma noʼ tzeʼel?

⁶ Jehová bisaʼ primer galtzeʼel. Xiimbu Jesucristo, goniʼ: «¿Xí diti ma bíilto que ni bisaʼ lóoto dada nírcu, bisaʼ lóoto buñguieeu né buñgonaʼ, né goniʼbu: Por ngú, buñguieeu sasian bixios né xinaʼ né sadxin sac toibsi né tzeʼel né guiropyibu sacyibu toibsi beʼel la? Ma diti nacyibu chop, ma nacyibu toibsi beʼel. Por ngú, ni Dios ma buny toibsi, ni toib buñguieeu cueʼ layibu cueʼ saʼyibu» (Mateo 19:4-6). Xomod bienno, Jehová desde nírcu goniiny láabu que buñ ni ma noʼ tzeʼel nabesné saʼ por tipzó. Jehová goniiny que famil nabany toibsi, ñoʼ nakit né nabany goxtiguie.

7. ¿Xí láani labúu gacné a buñ par gac nadip xcaltzeel?

⁷ Nabanni, galtzeʼel racaló más galnagan que nírcu. Rioʼ ór, nigolú racalóyibu galnagan né ronyibu pensary que más galán guichílyibu xcaltzeelyibu, né rareʼganyibu. Pal rienno mod rony pensary Jehová de galtzeʼel, ngú sacné lóono gony nadipno xcaltzeelno (1 Juan 5:3).

8, 9. a) ¿Pu ór non guisobdiitz galtzeʼel xilitz Jehová? b) ¿Ximod labúu guislooyno que rasac xcaltzeelno?

⁸ Ni rony mandary Jehová, guirá ór racnéni lóono. Jehová ranab gonyno ndeʼ: «Galtzeʼel gacni nayaa» (Hebreos 13:4; Eclesiastés 5:4). Pal rasobno xilitz Jehová ná órni rasac naganno láani, sieeni lóono galán (1 Tesalonicenses 1:3; Hebreos 6:10).

 ⁹ Nigolú rasac par lóono xcaltzeelno, por ngú diti raniiny gonyno o guinino cós ni gonynaa saʼno. Xalagary ngú nainy gony nadipno xcaltzeelno. ¿Ximod labúu gonyno láani?

10, 11. a) ¿Xí galnagandaʼ racaló tipnés galtzeʼel? b) ¿Xigony nigolú rasac gapno cuidad mod raninéno tzeelno?

¹⁰ Xidal mod ronynaa buñ tzeʼel. Nanno que toib cristiano dipa non quimbu nili gonynabu tzeelbu. Ná scú, toib buñ labúu gonynabu tzeelbu né xtiitzbu. Diitz ni rareʼ roʼno labúu gacni xomod toib gudxil. Toib buñgonaʼ goniʼ: «Tzeʼela ronynaa naʼ né xtiitz. Ladi diti nac morad yaʼas, per xcalnabani ma bireʼ herid, portín guirá ór raibybu naʼ: ¡Ma diti nainy guiyaʼana looy! o ¡Diti noʼ pu raquiinlo!». Toib buñguieeu goniʼ que tzeelbu góoch láabu diitz ni roo né guirá ór goninaa láabu. Láabu goniʼbu: «Diti nainy naʼ guiniya guirá ni raibybu naʼ. Por ngú diti labúu raninéya láabu né más rioladxi guireʼya ló dxiin ma godzudaʼ. Más goxt noʼya ló xchiina que rioʼ». Ló naareʼ wal rioladx buñ guiniʼ cós ni ronynaa né ni rasioʼob a stipnés.

¹¹ Órni buñguieeu né buñgonaʼ raninaa saʼ, ronynayibu xcalnabany saʼyibu né nagan par guialni. Jehová diti rioladx que galtzeʼel gony scú. Per looy labúu gonynalo tzeʼelo sin guidudylo cuent. Sigory ronylo pensary que diti raninalo tzeʼelo per ¿xí ná tzeʼelo? Pal goniʼlo diitz ni bunynaa láabu, ¿sasaguelo  guitzaʼlo mod naclo la? (Gálatas 5:15; bíil Efesios 4:31).

12. ¿Xí láani labúu ñony que toib galtzeʼel ma diti nadzakyibu Jehová sacró?

¹² Par Jehová nigolú rasac mod raninélo tzeʼelo, ná pal nacni nisló buñ o laniolidxto (bíil 1 Pedro 3:7). Santiago 1:26 raiby lóono: «Pal toib buñ rony pensary que cayony adorar a Dios per diti rony mandarybu lochbu, cascúbu xcalnabanycabu, né mod rony adorarbu diti noʼ pu raquiinni».

13. ¿Xí stoib mod labúu ñonynano tzeelno?

¹³ Buñ labúu guislooy xidal mod que rioʼbu  galrrasaʼ por mod rasac tzeelbu. Por ejemplo, ¿ximod nasac tzeʼelo pal radudylo xiroʼ tiemp né stoib buñgonaʼ? Ná ñonylo láani portín raniʼlo xtiitz Dios yoʼ por yoʼ o cayacnélo toib hermana ni cadudy ló galnagan, ¿nasioʼoblo xcalnabany tzeʼelo ja? Toib hermana goniʼ: «Nigolú rioʼobni naʼ ni rabiʼya tzeʼela radudy xiroʼ tiemp né toib hermana ni noʼ lainy congregación. Raloyni diti rasaca par láabu».

14. a) ¿Xí rasuidyno ló Génesis 2:24? b) ¿Xí non guinabdiitzno lóocano?

¹⁴ Ná lóono ni nacno cristianos non ganno bixiosno, xinaʼno né congregación. Per órni ronyno galtzeʼel ni más rasac ngú tzeelno. Jehová goniʼ que buñguieeu «sacbu toibsi né tzeelbu» (Génesis 2:24). Mod rasac tzeelno más guisacni par lóono. Gonabdiitz looyca: «¿Rabeʼya tiemp par tzeʼela, racaaya cuidad xí rasacbu né randxiʼdota láabu la?».

15. ¿Xigony cristianos ni ma noʼ tzeʼel diti non guidzakyibu guirá ór buñ ni diti nac tzeelbu?

¹⁵ Pal guirá ór radzakno toib buñ ni diti nac tzeelno, sioʼ galnagan lainy xcaltzeelno. Labúu nadzakno láabu más né dada labúu ñoladxno láabu (Mateo 5:28). Labúu gac nadipni más né dada labúu gonyni que guiabno ló galyoxh.

16. ¿Xí ná la Biblia de galtzeʼel?

¹⁶ Órni la Biblia ná: «Galtzeʼel gacni nayaa nisló guirá buñ», láaca náni que «buñ nosi gatné tzeʼel, portín Dios sony juzgar buñ ni rony galyoxh  né buñ ni ma noʼ tzeʼel ni ratné stoib» (Hebreos 13:4). Órni texto reʼ ná que «buñ nosi gatné tzeʼel» radudyni diitz que buñ nosi tzoné tzeʼel (Proverbios 5:18). ¿Ximod labúu guislooyno respet né diti gony buidyno galtzeʼel?

17. a) ¿Xí rony pensary xidal buñ órni rascúyibu tzeʼelyibu? b) ¿Ximod non guibiʼ cristianos láani?

¹⁷ Tipnés buñ rony pensary que diti mal láani tzonébu stoib buñ ni diti nac tzeelbu. Per diti gonyno pensary xomod layibu. Jehová nayadit raniʼ que rianladxbu galyoxh né órni buñ rascú tzeʼel (bíil Romanos 12:9; Hebreos 10:31; 12:29). Pal ñatnéno toib buñ ni diti nac tzeelno, ñony buidyno xcaltzeelno. Naslooyno que diti napno respet ni rony mandary Jehová né ma diti nadzakno láabu sacró. Por ngú, nili radudyno lagary guieed ló xpensaryno cós yox portín ngú labúu gony que tzaguiabno ló galyoxh (Job 31:1).

18. a) Órni toib buñ biscú tzeʼel né bieen dioxh falz, ¿xigony toibsi midid góc galkié reʼ? b) ¿Ximod bibiʼ Jehová órni buñ biscú tzeʼel ló dzú ni see?

¹⁸ Lainy gudx Israel, Ley ni cuaʼ Moisés goniʼni que pal buñ rascú tzeʼel nacni toib galkié rodann, nacni suusi ñenyibu dioxh falz. Órni israelitas buny galkié de clas reʼ Dios goniʼ que non ñaityibu (Levítico 20:2, 10). ¿Xigony guiropca galkié reʼ gocni toibsi midid? Pal toib israelita bieen dioxh falz, diti buny cumplirbu acuerdo ni bunybu né Jehová. Né pal toib buñ ni ma noʼ tzeʼel gotné stoib buñ, diti buny cumplirbu acuerdo ni bunybu  né tzeelbu (Éxodo 19:5, 6; Deuteronomio 5:9; bíil Malaquías 2:14). Riendxichni que par Jehová órni toib buñ biscú tzeʼel gocni toib galkié rodann.

19. ¿Xí sacné lóono coʼno guicno par diti tzonéno buñ ni diti nac tzeelno?

¹⁹ ¿Né ximod rabiʼ Jehová órni buñ rascú tzeʼel ló naareʼ? Ná ma diti noʼno xan xomandary ley ni cuaʼ Moisés, Jehová diti ma bitzaʼbu mod ronybu pensary, rianladxsabu galrrascú reʼ. Lóono dipa sony adorarno dioxh falz, scúca dipa guiscúno tzeelno (Salmo 51:1, 4; Colosenses 3:5). Pal ñatnéno buñ ni diti nac tzeelno, diti ñapno respet xcaltzeelno nili ñapno respet Jehová, Dios xtunyno. (Bibiʼ ni ná nota 26, «Órni buñ rachíl xcaltzeel né rasian saʼ»).

20. ¿Xí galnasác racaʼ toib galtzeʼel órni naní xcalrrien?

²⁰ ¿Ximod labúu gony nadiplo xcaltzeelo? Xtiitz Dios ná: «Toib galán yoʼ riaʼni né galnan né rasagaʼdxichni portín naní guic ni rasaʼ láani» (Proverbios 24:3). Toib yoʼ labúu gac nachichni né nadachni, o labúu gac nadzaʼni né sacróyen. Scúca rac lainy galtzeʼel, toib buñ ni naní xcalrrien sonybu rutirigaʼlni láabu par cuesnébu tzeelbu sacró né guibanyibu goxt.

21. ¿Ximod labúu gacné Xtiitz Dios looy lainy xcaltzeelo?

²¹ La Biblia láaca ná: «Galnan rastzani lainy cuart pór cós sacróyen né cós ni rasac» (Proverbios 24:4). Pal rienlo Xtiitz Dios labúu gacnéni xcaltzeelo (Romanos  12:2; Filipenses 1:9). Órni goʼolto la Biblia toibsi né stipnés libros né guiich, colguiniʼ ximod labúu guisobto ni ma bíilto. Colguiyopy mod guislooyto galnadxiʼ, respet saʼto né cobioto né guiento ni rasac saʼto. Né tigaagato guinab lóo Jehová gacné lóoto gapto cualidades ni gony nadip xcaltzeelto né modreʼ tzeelto gandxiʼ lóoto más (Proverbios 15:16, 17; 1 Pedro 1:7).

22. ¿Xigony non guislooyno galnadxiʼ né gapno respet tzeelno?

²² Non gonyno rutirigaʼlni lóono guislooyno galnadxiʼ né gapno respet tzeelno. Modreʼ xcaltzeelno sac nadipni né sabanyno sacró. Né ni máspa, sagoʼ nakitno xcalnabany Jehová (Salmo 147:11; Romanos 12:10).