Xhermando ni ronladxgoluʼdo:

Galnadxiʼ ni rasacno por Dios né por buñ rachiinni lóono guisobno mandary ni ná: «Coltzé né colgacné buñ de guirá gudx gac xpiina. Colconis layibu» (Mat. 28:19, 20; Mar. 12:28-31). Órni nigolú nadxiʼno, napgoluʼni galnadip. Labúu guidxinni dada lainy xcalnabany buñ ni rasaguel guibany tipzó (Hech. 13:48).

Ló dzú ni see bunyno rutigoygaʼlni lóono par ñanno de memory ni ñaibyno buñ né nasianno publicaciones ladxñayibu. Per nigoreʼ non gantzayno ximod gooyno diitz né buñ. Raslooyno galnadxiʼ buñ órni raibyno layibu ni nainy ganyibu. Diti toibsi mod nac guirá buñ, por ngú órni gooyno diitz né buñ, ganno xi raniiny ganyibu, né xi rioʼyibu ló galrrasaʼ. ¡Publicación reʼ goyaʼni par gacnéni lóono gonyno láani!

Follet reʼ napni 12 lesiony né rabeʼ loguiaʼni 12 cualidades ni raquiinno guiráno par guislooyno galnadxiʼ, né par gacnéno buñ gac xpiin Jesús. Tigaaga lesiony rareʼni ló historia ni sieed ló la Biblia ro Jesús o toibtica cristiano ni bibany ló siglo primero bisobbu toibtica cualidad ló ministerio xtunybu. Nigoreʼ ma diti non guinino presentación xtunyno de memory, xalagary ngú guiyopyno mod guislooyno xcalnadxiʼno buñ. Ná guirá cualidades ni sieed ló follet reʼ raquiinni par gonyno xchiin Dios, sadudyto cuent que tipnésni nigolú rasacni órni salóno guininéno buñ, órni gonyno revisit né órni guisuidyno buñ ni ná la Biblia.

Órni guisuidyto tigaaga lesiony, colgony pensary ximod labúu guiquiinto tigaaga cualidad órni guininéto buñ xtiitz Dios lagary ro rabésto. Galnadxiʼ ni rasacno por Jehová né por buñ más rasacni, que mod ni rayopy buñ gony láani. Por ngú colgony dada rutirigaʼlni lóoto par gony nadipto galnadxiʼcu. Ndeʼ sacné lóoto par gacnéto buñ: guidxin gac xpiin Jesús.

Ni ronydo dxiin né lóoto nacni toib privilegio (Sof. 3:9). ¡Jehová guisiab xcalnasác ronoʼto por ni caslooyto galnadxiʼ né cayacnéto buñ guidxin gac xpiin Jesús!