PAL ñoʼ toib buñ ni ñeet ro nóolo né guicbu nadxín guic yoʼ, ¿xí ñonylo pensary órni nabilo buñ de clas cú? ¡Bay que toib buñ ni nigolú nasoʼ né nadip láabu! Ló Gudxlio goyoʼ buñ de clas cú. La Biblia ná que ni góc bixiosyibu ngú ángeles ni noʼ lainy guibá. ¿Ximod góc guirá ndeʼ?

Bisednaladx ángel ni diti bisob Dios ni laa Buñdzab goloʼgulubu galnagan ló Gudxlio. Láaca bunybu que stipnés ángeles xtuny Dios ni dxiip lainy guibá ñony cós mal. Conforma dzú stipnés ángeles bicadiag láabu. Bisianyibu dxiin ni Dios biduidy layibu lainy guibá. Bietjyibu ló Gudxlio né gocyibu xomod buñgudxlio. ¿Nanlo xigony la?

La Biblia ná que bietjyibu né bibíbu guirá buñgonaʼ móz ni goyoʼ ló Gudxlio né goniiny layibu nabesnéyibu guirá gonaʼ reʼ. Por ngú, bietjyibu ló Gudxlio né bitzñayibu. Biblia ná que ni bunyibu mal gocni, portín Dios bisaʼ guirá ángeles reʼ par guibanyibu lainy guibá.

Órni ángeles reʼ goyoʼ xiinyibu né guirá buñgonaʼ móz ni goyoʼ ló Gudxlio, gadzé clas buñ góc xiinyibu. Órni gocyibu bimbiox sigory gocyibu xomod cualquiersi mbiox. Conforma dzú gonísyibu né gocyibu buñxiblo, nadip gocyibu né bidxin gocyibu buñ nasoʼ né góc laabu Nefilim.

Nefilim buñ mal gocyibu. Né como buñ nasoʼ né buñxiblo gocyibu bunynaayibu buñ. Bunyibu que stipnés buñ ñac mal xomod layibu.

Enoc ma goity per goyoʼ toib buñguieeu ló Gudxlio ni góc buñtzay. Buñguieeu reʼ góc laa Noé. Láabu bunybu guirá ór ni Dios goniiny gonybu.

Goyoʼ toib dzú Dios gochbu Noé que ma bidxin ór que Láabu guinitlobu guirá buñ mal. Per Dios guilábu Noé né xhomil né xidal nimal. Guibino ximod bunybu guirá ndeʼ.