ÓRNI Adán né Eva bireʼyibu lainy Edén goyoyibu ló xiroʼ galnagan. Par ñoʼ ni ñoyibu bunyibu dxiin nadip. Xa lagary yac cuánnax, ma gúch bibiʼyibu golainy guirá lad. Ndeʼ góc órni Adán né Eva ma diti bisobyibu Dios né bisian góc ximigyibu Dios.

Né ni más pa Adán né Eva ma diti labúu bibanyibu tipzó. Bisednaladx, Dios góoch layibu que saityibu pal ñoyibu xcaa toib yac ni Dios góoch layibu diti non ñoyibu. Dzú, ni godóyibu xcaa yac reʼ gosaló bioxyibu né goityibu. ¡Nigolú ngaʼal gocyibu ni diti bicadiagyibu ni ná Dios!

Adán né Eva gosaló goyoʼ xidal xiinyibu órni ma bireʼyibu lainy Edén. Ndeʼ biduidy diitz que guirá xiinyibu láaca ñoʼx né ñaity.

Pal Adán né Eva nasobyibu Jehová, nabanyibu sacroyen né xiinyibu. Labúu nabanyibu sacró né tipzó ló Gudxlio. Diti noʼ chú ñoʼx, naxoʼ né ñaity.

Dios nigolú raniiny láabu guibany buñ tipzó né goxtiguie, né ranibu que sioʼ dzú gacni scú. Gudxlio diti nosi gacni mózdiguieʼ, láaca guirá buñ sac nasacdxiich. Guirácano sacno ximig guirá buñ, né ximig Dios.

Eva bisian góc ximig Dios. Por ngú, ma nagann gocni par láabu nasanbu badaʼ né ma biob lainybu. Nigolú mal goyeeni layibu portín diti bisobdiitzyibu Jehová. Ni bunyibu, ¿ximod rabilo láani?

Goyoʼ xidal xiin buñguieeu né xiin buñgonaʼ Adán né Eva. Órni gool primer xiinyibu golébu laa ndeʼ, Caín. Ni rarop xiimbu golébu laa Abel. ¿Nanlo xí gosaclo chop biinreʼ la?