BIBIʼ badaʼ reʼ nigolú cayibdxaʼbu né caguiebu bicuña mbioxhlas ca. Ndeʼ Moisés. ¿Nanlo chú ngú gonaʼ móz ca la? Láabu toib princes de gudx Egipto né xiindzap Faraón láabu.

Xinaʼ Moisés bicachlan láabu hasta órni bisaʼbu tzón beʼo, portín diti goniiny láabu que egipcios nagaity xiimbu. Per láabu biduidybu cuent que ma diti labúu guicachlanbu más a Moisés, por ngú noʼ ni bunybu par labúu nalaabu Moisés.

Bunytzaaybu toib dzoim ni diti labúu ñoʼ nís lainy. Ór cú golóbu Moisés lainy dzoim reʼ né bicachlanbu dzoim reʼ lainy guiʼix cué guʼuc ni laa Nilo. Gochbu Míriam, bisan Moisés, que ñaʼan gahxca ronoʼbu par nabiʼ xí cayac.

Órcuca xiindzap Faraón goyee góos roʼ guʼuc ni laa Nilo. Tisintiempsi bibiʼbu toib dzoim lainy guiʼix cué guʼuc. Gochbu a xcriatbu: Godané dzoim ca naʼ. Órni bixalbu dzoim reʼ, ¡toib badaʼ móz bibiʼbu! Badaʼyen reʼ ni laa Moisés cayibdxaʼbu, né xiindzap Faraón binladx láabu. Princes, xiindzap Faraón diti goniiny láabu ñaity badaʼyen reʼ.

Ór cú Míriam bidxin ronoʼyibu. ¿Labúu rabilo láabu ló dibuj reʼ la? Míriam gonabdiitzbu a xiindzap Faraón: ¿Labúu guiyobi toib buñgonaʼ israelita par gann badaʼyen reʼ la? Né princes reʼ cuapy: Goyee buny mod ni nálo.

Órcuca Míriam nigolú raxony sagúch xinaʼ. Órni xinaʼ Moisés bidxin ronoʼ princes reʼ, princes reʼ góoch láabu: Cuaʼ badaʼyen reʼ né bisnís láabu né naʼ saguiixi looy.

Scú gocni, xinaʼca Moisés gon láabu. Né órni Moisés gonís, xinaʼbu biné láabu ronoʼ xiindzap Faraón par ma láabu nasnísbu más a Moisés xomod xiimbu. Por ngú Moisés gonísbu lidx Faraón.

Éxodo 2:1-10.