JOSÉ nainy láabu gann pal chii buchyibu nac buñtzay né napyibu galronladx. Por ngú ranibu: Lóoto galrolachsi sieedto par guibíto pu lagary diti raquiin xcudxdo.

Layibu racapyibu: Yaca diti sieldo por ngú. Lóodo nacdo buñtzay. Guirádo buchdo saʼdo. Primer gócdo doce per toibbu ma diti noʼ né lóodo, né ni más mbioxhlasien bian rioʼ né bixiosdo.

José rony sani diti raluladx layibu. Ronybu que Simeón rian press, né raduidybu lagary que stipnés buchyibu riné galrro lidxyibu a Canaán. Per raibybu a guirá biinreʼ: Órni guibiguetto stoib, guitnéto buchto ni nac más mbioxhlasien né lóoto.

Órni rabiguetyibu lidxyibu lainy gudx Canaán, buch José raibyibu a Jacob guirá ni gosacloyibu. Jacob noʼ nabann né goníbu: José ma diti noʼ né naʼ né nigoreʼ Simeón láaca ma diti noʼ né naʼ. Diti guiduidy lagary tzanéto Benjamín xiingaʼna ni más mbioxhlasien. Per órni ma cará galrro ni napyibu, Jacob nap xi de guiduidy lagary que tzanéyibu Benjamín a Egipto par labúu guitnéyibu más galrro.

Nigoreʼ José rabíbu que buchyibu sieed ronoʼbu. José rabaladx órni rabíbu buchienbu Benjamín ni más mbioxhlasien. Ni toibyibu raduidy cuent que buñxirop ni rony ndeʼ ngú José. José nigoreʼ noʼ ni rony par coʼ prueby a chii buch.

José rony que guirá xomósbu rastzaa de galrro sac xtunyibu. José diti raset ni gonybu, nosi ronybu que xomósbu, coʼ copa de plata xtunybu lainy sac xtuny Benjamín. Órni ma golsityibu tidxo ló néz José raxel tipnés xomós tze tzágal layibu. Órni rigalyibu guirá buch José, xomós José raiby layibu: ¿Xigony golannto copa de plata xtuny xpixuando?

Layibu cuapyibu: Diti golanndo copa xtuny xpixuanto. Pal guidzelto que toibtica de lóodo napdo láani, labúu guigaityto ngú.

Por ngú, guirá xomós José rayopyibu lainy guirá sac xtuny buch José, né radzelbu copa xtuny José lainy sac xtuny Benjamín, xomod rabilo ló dibuj reʼ. Xomós José raiby a guirá buch José: Lóoto labúu guibiguetto, per Benjamín non guieed né lóodo. ¿Xí gony guirá chii buch José nigoreʼ?

Guiráyibu rabiguetyibu né Benjamín lidx José. José nigoreʼ raiby a guirá buch: Guiráto labúu guibiguetto lidxto, per Benjamín guiaʼan par tzó xan xomandari.

Nigoreʼ Judá raniʼ: Pal naʼ rabigueta sin Benjamín, bixiosa gaity, portín láabu nigolú nadxibu Benjamín. Por ngú, ranába lólo, biduidy lagary naʼ guiaʼana tzóya xan xomandarylo né biduidy lagary guibiguet buchienna.

José raduidy cuent que ma bisianyibu mod ni gocyibu. Ma nacyibu buñtzay né napyibu galronladx. Guibino nigoreʼ xí rony José.