RALOOYPANI nabany beʼel ni noʼ ló yac. Per diti scú láani. Goyaʼni de cobre. Jehová gochbu Moisés que nachelbu beʼel cú ló yac né naliskiaʼbu yac reʼ par labúu ñenlóo buñ láamu né diti ñaity. Per stipnés beʼel ni casaa layoo por beʼel ni nabany láamu. Godómu buñ né buñ bixoʼ. ¿Nanlo xigony la?

Ndeʼ góc portín israelitas goníbu mal de Dios né de Moisés. Ratzotz roʼyibu: ¿Xigony goleʼlo lóodo lainy gudx Egipto par gaitydo ló yoovich reʼ? Diti noʼ galrro ni nís lagary reʼ. Ma bixacladxdo né ma diti nainy guaado maná reʼ guirá dzú.

Per maná nacní toib galrro ni naníx. Jehová biduidybu maná xomod toib cós ni radziguiaʼ buñ né nís láaca biduidybu láani scúca. Per buñ cú ratzotz roʼ né diti rioladxyibu ximod ran Jehová layibu. Por ngú raxelbu beʼel ni rot né ni ragaity, ndeʼ gocni toib castig ni bixel Dios par layibu. Beʼel reʼ rot layibu né xidalyibu raity.

Radxiin midid buñ riée ronoʼ Moisés né raniyibu: Bichédo portín gonido mal de looy né de Jehová. Gonab lóo Jehová par cué guirá beʼel ni dxee reʼ.

Ór cú Moisés ranab lóo Jehová par gacné layibu. Jehová raiby a Moisés que guisaʼbu toib beʼel de cobre. Raibybu Moisés que guichelbu beʼel reʼ laidy toib yac, né guirá buñ ni ma but beʼel reʼ non guibíyibu beʼel de cobre ni bisaʼ Moisés. Moisés rony ni ná Jehová. Né buñ ni ma but beʼel rabíyibu beʼel cobre ni bisaʼ Moisés, né rialyibu.

De guirá ndeʼ noʼ ni rasuidyno. Guiráno nacno xomod israelitas ni but beʼel. Biduidy cuent, guirá buñ rioʼx, raxoʼ, né raity. Ndeʼ gocni scú, portín primer buñguieeu Adán né primer buñgonaʼ Eva golsityibu de Jehová, né lóono nacno xiinyibu. Per Jehová caxalbu toib néz par scú labúu guibanyno tipzó.

Jehová bixelbu Xiimbu Jesucristo ló Gudxlio. Jesús golxigaʼbu ló toib yac nadop, portín xidal buñ buny pensary que láabu gócbu buñ mal. Per Jehová biduidy Jesús par guilaa lóono. Pal rabino láabu o pal racanalno láabu, labúu guibanyno tipzó. Ló historias ni sietra guisuidyno más ni bunybu.