BIBIʼ cuánnax ni noʼoy buñguieeu ni rabilo ló dibuj reʼ. Bibiʼ balaati xiroʼ rasim balach. Chop buñguieeu noʼoy láani né nalxigaʼni ló yac. Láaca bibiʼ granad né higo ni nal ló yac. ¿Pu lagary sieed guirá cuánnax móz reʼ? Láani sieetni de Canaán. Bisednaladx, Canaán góc lagary ro golés Abrahán, Isaac né Jacob. Galrralán ni goyoʼ lagarycu, ngú buny que Jacob né xfamily goyeyibu goylésyibu lainy gudx Egipto. Ma godudy 216 íz, Moisés rabiguetné israelitas a Canaán. Nigoreʼ noyibu ló yoovich, toib lagary ni laa Qadés.

Lainy gudx Canaán rabés buñ mal. Por ngú Moisés raxel doce buñ ni riée raláach, né Moisés raiby layibu: Colgann balac buñ rabés lainy gudxcú, né pal buñ nadip layibu. Colgann pal napni layoo tzaay. Né diti guialadxto guitnéto tipnés cuánnax.

Órni buñ ni goyee biláach rabiguetyibu lagary ni laa Qadés, raibyibu Moisés: Nigolú toib lagary galán láani. Né par naduidyibu diitz que nigolú ni caniʼyibu ralooyibu cuánnax ni bitnéyibu. Per chii buñ ni goyee biláach raniʼ: Buñ ni rabés lagarycu nigolú nasoʼyibu né nadipyibu. Pal gonyno por guicaʼno xcudxbu, sagaityibu lóono.

Israelitas radzuiby órni racadiagyibu ndeʼ, né raniyibu: Más galán láani ñaityno lainy gudx Egipto o ló yoovich reʼ. Ló ro cadíilno né layibu saityno, né sanásyibu tzeelno né xiinno. ¡Guiyobyno stoib buñguieeu xalagary Moisés ni guisanir nislóno, né guibiguetno gudx Egipto!

Per chop buñguieeu ni goyee biláach rapyibu confianz Jehová, né rayopyibu mod que gudxcú guiguadzu. Chop buñguieeu reʼ laayibu Josué né Caleb, guiropyibu raniyibu: Diti guidzuibyto. Jehová noʼ né lóono. Diti nagann sácni par lóono guicaʼno gudxcú. Per layibu diti racadiagyibu. Né raniiny layibu guigaityibu Josué né Caleb.

Ni ronyibu nigolú ratzuitzni Jehová, né raibybu Moisés: Ni toib buñ ni nap 20 né más de 20 íz sioʼ lainy gudx Canaán. Layibu ma bibiʼyibu galrradziguiaʼ ni buni lainy gudx Egipto né ni buni ló yoovich né digundi gapyibu confianz naʼ. Por ngú, sasarelto ló yoovich 40 íz hasta gaity último ni nap 20 íz. Nosi Josué né Caleb sioʼ lainy gudx Canaán.