BIBIʼ guieʼ né almendras niguyaa ni ragaʼ ló yac reʼ. Xiac Aarón láani. ¡Guieʼ né cuánnguyaa reʼ gonísni tipgueʼelsi! Guisuidyno xigony gocni scú.

Israelitas gosarelyibu ló yoovich xidal íz. Noʼ ni diti raluladx que Moisés non guisanir nislóyibu, né que Aarón diti non guisanir par gony adoraryibu Jehová. Ni nac xpensary modreʼ ngú Coré, Datán, Abiram né 250 ancianos ni rasanir lainy gudx Israel. Guiráyibu rieedyibu ronoʼ Moisés né nayibu: ¿Xigony looypa nálo gony mandarylo lóodo?

Moisés raibybu a Coré né guirá ni góc toibsi né láabu: Guixí rosil colguicaʼ cós ro rac goʼox né colgony goʼox ni ralaxiin. Ór cú coltzé ronoʼ yoʼ ro rac adorar Jehová. Guibino chú láabu rabú Jehová.

Raraa stoib gueʼel cú Coré né 250 ni góc toibsi né láabu radxiinyibu lagary ro rac adorar Jehová. Xidal buñ radxiin rac toibsi né layibu. Jehová nigolú cadzuitz. Colgalsit riolidx buñ mal reʼ, ná Moisés. Diti cannto xitcal ni nac xtunyibu. Buñ racadiag, né ralsityibu riolidx Coré, Datán né Abiram.

Ór cú Moisés raniʼ: Modreʼ lóoto sannto chú láabu ngú ni Jehová cabú. Gudxlio saxal né sagaibyni a guirá buñ mal reʼ.

Ralox raniʼ Moisés, Gudxlio raxalni. Né ragaibyni lidx né guirá ni nap Coré, Datán, Abiram né ni noʼ né layibu né ór cú Gudxlio rieʼeg. Órni stipnés buñ rien xirudx buñ ni sée lainy yoo, racaʼyibu rudx: ¡Colguixony! ¡Gudxlio láaca labúu caibyni lóono!

Coré né 250 ni góc toibsi né láabu noʼsayibu gahx ronoʼ yoʼ ro rac adorar Jehová. Por ngú, Jehová raxel guii né guiráyibu raʼijyibu. Ór cú Jehová raiby a Eleazar xiin Aarón que guicaʼbu cós ro rac goʼox ni biquiin buñ ni ma goity, né guisiaabu guip reʼ par guigasbu láani laidy ro rasaʼijyibu nimal ni rascadyibu Jehová. Bunyibu ndeʼ par guieen guirá israelitas que nosi Aarón né guirá xiin non gacné láabu par guisanir nislóyibu par gony adoraryibu Jehová.

Per Jehová ná que guieen tzaayibu que láabu golúbu Aarón né guirá xiin par guisanir nisló israelitas par gony adoraryibu Jehová. Por ngú raibybu Moisés: Ni rasanir lainy toib family de Israel guitné xiac. Ni rasanir lainy family xtuny Leví, Aarón ngú ni guitné xiac. Ór cú cuaʼ xiacyibu né bisagaʼ láani nisló caj ni rasetnaladx acuerdo ni buny Jehová né Israel. Xiac buñguieeu ni naʼ golúya par guisanir nisló Israel par gony adoraryibu naʼ, sabeʼni guieʼ.

Órni Moisés rabí láani stoib dzúcu, ¡ló xiac Aarón rareʼ guieʼ né almendras niguyaa! ¿Raduidylo cuent nigoreʼ xigony buny Jehová que xiac Aarón goleʼni guieʼ la?