¿MA GOYOʼ toibtica buelt biduidylo xtiitzlo né nagann gocni par gonylo láani la? Scá gosaclo buñguieeu ni rabilo ló dibuj reʼ, né por ngú noʼbu nabann. Láabu ngú Jefté toib juez de Israel ni gop balory.

Jefté nabany ló xtzú israelitas órni layibu ma diti cayony adoraryibu Jehová. Cayonybu cós mal stoib. Né Jehová raduidy lagary que buñ gudx Amón gony mal layibu. Israelitas ranab lóo Jehová: Bichédo nislólo. ¡Ranabdo looy bilaa lóodo!

Israelitas rasac mal por guirá ni bunyibu. Raslooyibu láani modreʼ, ni rony adoraryibu Jehová stoib. Por ngú Jehová racné layibu stoib.

Gudx Israel raloyña a Jefté par guicalóbu ammonitas. Jefté raniinygolu Jehová gacné láabu órni guicalóyibu ammonitas. Por ngú raduidybu xtiitzbu a Jehová: Pal looy ronylo que naʼ gony gann guidudi looy primer buñ ni guiré riolidxi né guitzaclóo naʼ órni guibigueta órni ma buny gann ammonitas.

Jehová ragoʼ cuent xtiitz Jefté né racnébu a Jefté par gony gann. Órni Jefté rabiguet, ¿nanlo chú ngú primer buñ ni rareʼ par guicacuent láabu la? Láabu ngú xiindzap guielót Jefté. Jefté ribdxaʼ: Xiindzapa, xiindzapa, casac nabann por looy. Per naʼ ma bidudi xtiidza a Jehová né nigoreʼ non goni ni ma goniya.

Órni xiindzap Jefté ran xí ni goní bixiosbu primer rioʼbu nabann portín guisiambu bixiosbu né ximigbu. Per laʼga nabanybu sonybu dxiin lainy yoʼ ro rac adorar Jehová gudx Siló hasta guidxin dzú gaitybu. Por ngú raibybu a bixiosbu: Pal looy ma biduidylo xtiitzlo a Jehová, non gonylo láani.

Por ngú xiindzap Jefté riée Siló laʼga nabanybu ronybu xchiin Jehová lainy yoʼ ro rac adorar Jehová lainy gudx Siló hasta guidxin dzú gaitybu. Buñgonaʼ gudx Israel riée riguen a xiindzap Jefté tap govitz ló toib íz né raguaʼyibu sacró laʼga noyibu né mbioxhlas reʼ. Buñ nadxibu xiindzap Jefté portín láabu ronybu ni ná Dios, Jehová.