DIBUJ ni rabilo reʼ nacní toib Gudxlio móz, né raibyno que scareʼ nac ni bilooy Dios a Isaías. Isaías bibany después de Jonás.

Paraíso rarexani scareʼ «lagary sacroyen» o «Gudxlio móz». ¿Noʼ toib dibuj ni rasetnaladxlo órni rabilo dibuj reʼ la? Scú láani, rasetnaladxlo lagary sacroyen ni Dios bisaʼ par Adán né Eva. Per ¿sácni ló guidopynac Gudxlio la?

Jehová góoch a Isaías buñguieeu ni raquiimbu par guiniʼ xí gac dzú ni sietra que guicaʼbu ximod gac Gudxlio móz ni Jehová guiduidy xcudx. Goníbu: Lob né xiil saguaʼyimu sacró. Yósien né betz ons lassien guáyimu toibsi, né mbioxien gap layimu ni badaʼ ni kit ro xcarió toib beʼel ni rot né ragaity diti noʼ xí gacbu.

Nga diti sadxin dzú sac, nac xpensary xidal buñ. Guirá ór cayac xiroʼ galnagan ló Gudxlio né diti saloxni, per bunysi xpensarylo, ¿ximod góc lagary ni Jehová biduidy ro golés Adán né Eva?

Dios goloʼ Adán né Eva lainy toib lagary sacroyen. Layibu bisnityibu lagary sacroyen reʼ portín diti bisobdiitzyibu Jehová, por ngú bioxyibu né goityibu. Dios raduidy xtiitz a guirá ni nadxi láabu que sacaʼyibu guirá cós ni Adán né Eva bisnit.

Ló Gudxlio móz ni sietra diti noʼ chú sony mal né diti noʼ chú sanitló cós ni noʼ ló Gudxlio reʼ. Buñ saguaʼ goxtiguie. Guirá buñ sac nasacdxiich né sabaladx xomod goniiny Dios ñac nirdiguié. Ló historias ni sietra guisuidyno ximod gac ndeʼ.