DITI xidzú ni ma gaity David, gochbu Salomón ximod ná Dios non guisaʼbu yoʼ xiroʼ ro rac adorar Jehová. Tap íz de goló cayony mandary Salomón, rasaló rasaʼbu yoʼ xiroʼ ro rac adorar Jehová, né par guisloʼoxbu láani rinéni gatz íz gorol. Xidal mil buñguieeu bunyibu dxiin par labúu ñaʼ yoʼ xiroʼ reʼ, xiroʼ bidxiich góc gaxt portín goynéni xidal or né plata.

Yoʼ xiroʼ reʼ napni chop cuart ni más rasac, xomod gop yoʼ ro rac adorar Jehová ni bisaʼyibu nirdiguié. Per cuart ni nap yoʼ xiroʼ reʼ chop midid más xiroʼni que yoʼ ro rac adorar Jehová ni bisaʼyibu nirdiguié. Salomón rony que caj ni rasetnaladx acuerdo ni buny Jehová né Israel tzóni lainy cuart ni noʼ más lanioʼ, né stipnés cós ni gop yoʼ ro rac adorar Jehová ragoʼyibu láani lainy stoib cuart cú.

Órni ralox riaʼ yoʼ xiroʼ reʼ, rac toib lanii roʼ. Salomón raxixip nisló yoʼ xiroʼ reʼ né raninébu Jehová, mod rabilo ló dibuj reʼ. Guidopynac guibá diti rigaʼlni par looy, ná Salomón, por ngú, yoʼ xiroʼ ni bisaʼya láaca diti sigaʼlni par looy. Dios xtuni, ranába lólo bicadiag xcudxlo órni layibu guininéyibu looy né guicaʼyibu lóoyibu niis lagary reʼ.

Órni Salomón ralox raniné Jehová, rietj guii guibá, né rasaʼijni guirá nimal ni biscatyibu Jehová. Né toib guii rasanídxich guidopynac lainy yoʼ xiroʼ reʼ. Ndeʼ raduidy diitz que Jehová cacadiag, né rabaladxbu que ma sob yoʼ xiroʼ reʼ, né que Salomón caniné láabu. Nigoreʼ yoʼ xiroʼ ni bisaʼ Salomón radxiin rac lagary ro rony adoraryibu Jehová, né diti raquiinyibu yoʼ mitien ni bisaʼyibu nirdiguié.

Por xidal íz Salomón gop galnann órni buny mandarybu, né buñ rabaladx. Per Salomón rabesné xidal buñgonaʼ de stipnés gudx ni diti rony adorar Jehová. ¿Labúu rabilo toibtica de layibu cayen toib dioxh la? Radxiin midid guirá buñgonaʼ reʼ ronyibu que Salomón guieen stipnés dioxh. ¿Nanlo xí rasaló rac nigoreʼ la? Salomón racbu toib buñ ni nigolú nagudx xcalnabany, nigoreʼ gudx ni rony mandarybu ma diti rabaladx.

Ndeʼ rony que Jehová radzuitz, né raibybu Salomón: Cueʼya looy ló galmandary reʼ né guidudi láani a stoib buñguieeu. Diti goni láani laʼga nabanylo, soni láani órni xiinlo ma cayony mandary. Per sasiana tidxo buñ ni xiinlo gony mandary. Guibino guidoni ximod rac guirá ndeʼ.