ÓRNI David ragaity Goliat, Abner ni rony mandary xidalguixo soldad de Israel riné láabu ronoʼ Saúl. Saúl rony que David gony mandary xidalguixo soldad, né láaca ronybu que David cués lidxbu.

Órni guirá soldad rabiguet radíil né filisteos, buñgonaʼ roʼol toib canción: Saúl ma bigaity miles, per David bigaity chii miles. Saúl rianladx David portín rasanadxyibu más David que láabu. Per Jonatán xiingaʼn Saúl diti rianladxbu David, láabu nadxibu David né David láaca nadxi láabu. Por ngú raniyibu que diti guisianyibu de gac ximigdxin saʼyibu.

David roʼoltzaaybu arpa, né Saúl rioladx racadiag mod roʼol David láani. Per toibtica dzú xcalrrianladx Saúl riné láabu gonybu toib cós mal David. Laʼga David cayoʼol arpa, Saúl ralís lanza né ranibu: ¡Guitzaʼis David cué yoʼ!, né rasalbu láani. Per David rarecueʼ. Stoib ór, Saúl rasal lanza ca stoib buelt ronoʼ David per láaca rachébu. David nigoreʼ nann que napbu xi de gapbu más cuidad guirá ór.

¿Rasetnaladxlo xí goní Saúl gony la? Láabu goníbu que guiduidybu xiindzapbu gac tzeʼel buñguieeu ni guigaity Goliat. Radxiin ór, Saúl raibybu David que labúu guicaʼbu Mical, per nír guigaitybu 100 filisteos. ¡Bunysi xpensarylo! Ni nainy Saúl ngú que filisteos guigaity David. Per diti racni scú, né Saúl raduidy xiindzap par gac tzeʼel David.

Toibtica dzú Saúl raibybu Jonatán né a guirá xomós que nainy láabu guigaitybu David. Per Jonatán raiby láabu: Diti gonylo mal David. Láabu ni toib buelt ma bunybu mal looy. Láabu ma gocnébu looy. Goyoʼbu puext ñaitybu órni bigaitybu Goliat né órni bibilo láabu bibaladxlo.

Saúl racadiag ni raiby Jonatán láabu, né raduidybu xtiitzbu que diti sonybu mal David. Ronyibu que rabiguet David lidx Saúl né láabu rasaló rony dxiin né Saúl stoib. Per toibtica dzú órni David nipeen noʼ cayoʼol arpa, Saúl ná guigaity láabu stoib buelt né lanza. David rarecueʼ, né lanza reʼ racáni cué yoʼ. ¡Ndeʼ ni rion buelt ni rony Saúl láani láabu! ¡Nigoreʼ David ma nann que non guixonybu!

Gueʼel cú David riée lidx, per Saúl raxel tipnés buñ par guigaity láabu. Mical nann xí láani ná bixiosbu gony. Raibybu David: Bireʼ goxin reʼ, portín guixí ma gueʼet looy. Goxin cú Mical racnébu David par guirébu niis roʼ toib bentan. Yaaca gatz íz David rioʼ nagach né diti rioʼbu toibsi lagary par diti guidzel Saúl láabu.