¿RASETNALADXLO que ma bicadiaglo de tzón mbioxhlas reʼ la? Scú láani, nacyibu ximig Daniel ni diti gosaguel ño galrro ni diti góc galrro nasac par layibu. Babilonios goleʼ laayibu Sadrac, Mesac né Abednego. Bibiʼ layibu nigoreʼ. ¿Xigony diti caxixipyibu nisló dioxh de or nasoʼ xomod cayony stipnés buñ láani? Guibino xigony cayacni scú.

¿Rasetnaladxlo xiley Jehová ni láacabu bicaʼbu ni góc laa Chii Diitz la? Ni primer ngú: Nosi naʼ gony adorarto diti a stipnés dioxh. Mbioxhlas reʼ casobdiitzyibu ley reʼ, ná naganni.

Nabucodonosor, ni rony mandary gudx Babilonia, bixelcaʼbu xidal buñxirop par guieen a dioxh ni bisaʼbu. Gochbu a guirá buñ: Órni guicadiagto xirudx dxitguic nimal, arpas né stipnés guip ni racudx buñ, colguixixip né colguien dioxh de or ni bisaʼya. Ni diti guixixip né guieen dioxh reʼ, órcuca tzó ni guisal layibu lainy horno laguii.

Órni Nabucodonosor racadiag que Sadrac, Mesac né Abednego diti bixixip, radzuitzgolúbu. Raxelcaʼbu tzón mbioxhlas reʼ guieed ronoʼbu. Raduidybu stoib oportunida mbioxhlas reʼ. Per layibu napyibu confianz lóo Jehová. Né raniyibu: Dios ni rony adorardo labúu guilaa lóodo. Ná diti gonybu láani, lóodo diti guixixipdo nisló dioxh de or ni bisaʼlo.

Órni Nabucodonosor bicadiag ndeʼ, nigolú bidzuitzbu. Noʼ toib horno gahx ronoʼbu, né rony mandarybu: ¡Colcoʼ guii lainy horno ca par guidzaʼni, como si natzaʼto láani gatz buelt! Ór cú ronybu que tipnés buñguieeu ni más nadip ni noʼ lad xidalguixo soldad ni napbu, racadoʼyibu Sadrac, Mesac né Abednego né rasalyibu mbioxhlas reʼ lainy horno. Horno cú nigolú radudylaʼni né belguii ni rabeʼni ragaity guirá buñguieeu nadip reʼ. Per ¿xí rac né tzón mbioxhlas ni bisalyibu lainy horno cú?

Nabucodonosor raguixlóo lainy horno, né radzuibygolúbu. ¿Diti bicadoʼno tzón buñguieeu né bisalno layibu lainy horno laguii la? ranabdiitzbu.

Scú láani, ngú bunydo, racapy xomósbu.

Nabucodonosor ná: Naʼ rabíya tap buñguieeu casaa ló guii. Diti cadoʼyibu, né diti cayaʼijyibu. Né ni rasaʼ tap ni noʼ cú ralooypani toib dioxh láabu. Nabucodonosor raguixlóo roʼ horno cú né racaʼbu rudx: ¡Sadrac! ¡Mesac! ¡Abednego! ¡Colguireʼ, lóoto ni rony xchiin Dios ni noʼ más Guiaʼ!

Órni rareʼyibu lainy horno, buñ labúu rabí layibu diti noʼ xí gocyibu. Nabucodonosor raniʼ: ¡Gonyxiroʼno Dios ni rony adorar Sadrac, Mesac né Abednego! Bixelbu ángel xtunybu né bilaa layibu portín diti noʼ chú labúu buny par naxixipyibu né nienyibu a stoib dioxh xalagary Jehová.

¿Diti rasuidy ndeʼ lóono toib mod galán par diti guisianno Jehová la?