MA GODUDY chop govitz, nigoreʼ ma nóono dzú juevy goxin. Jesús né doce xpiin bidxinyibu lainy cuart xiroʼ ni sob guic yoʼ par guáxtzuyibu, ndeʼ ni rimbuno xomod Pascua. Ni cabilo careʼ roʼ puert, ngú Judas Iscariote. Séebu sagudxbu guirá ni rasanir nisló israelitas par gony goʼox ximod labúu guigaʼ Jesús.

Toib dzú antes, Judas gochbu guirá buñreʼ: ¿Xí guiduidyto naʼ pal racnéya lóoto guigaʼ Jesús? Layibu racapyibu: Treint nilas de plata. Nigoreʼ Judas sée par guidop toibsi né layibu né guilooy pu lagary noʼ Jesús. ¿Diti nac ndeʼ toib cós nadzuʼpy la?

Pascua raloxni, né nigoreʼ Jesús rasaló stoib galrroxtzu ni nigolú rasac. Raduidybu xpiimbu tlá páa né ranibu: Colguá láani, portín ndeʼ nacní xomod ladi ni guidudi lóoto. Láaca raduidybu tipcop vino, né ranibu: Colgueʼ láani, portín ndeʼ nacní xomod xiruni ni guixúya por lóoto. La Biblia rimbu láani xomod Galrroxtzu ni rasetnaladx Jesús.

Israelitas godóyibu Pascua, bunyibu láani guirá íz xomod toib galrrasenaladx órni ángel xtuny Dios godudy lidxyibu dzú ni goyoʼyibu gudx Egipto, per ángel reʼ bigaity guirá xiin lagol egipcios. Nigoreʼ Jesús nainy que guirá ni racanal láabu guisetnaladx láabu, né ximod goitybu por layibu. Por ngú galrroxtzu reʼ racni guirá íz.

Ralox rooyibu Galrroxtzu ni rasetnaladx Jesús. Raibybu xpiimbu que gapyibu balory né gac nadip fe xtunyibu. Ralox ronyibu guirá ndeʼ roʼolyibu cánticos par gonyxiroʼyibu Dios né rieyibu stoib lad. Sigory ma gac tayoo ndeʼ. ¿Pu séeyibu nigoreʼ?