DITI xidzú de goló bisial Jesús chop buñ pobre ni diti labúu rabí, rieedbu toib ranch ni noʼ gahxca Jerusalén. Raibybu chop xpiimbu: Coltzó lainy ranchcu né cú sadzelto toib borlás, colguixach láamu né colguitné láamu ronoʼya.

Órni radxiinéyibu bor cú, Jesús rabuby láamu. Né guidopy ló néz goruby Jesús láamu par radxiin Jerusalén. Órni ma cadxinbu gahxca Jerusalén, xidalguixo buñ rareʼ racacuent láabu né xidalyibu rabeʼ tiplaʼ lairy ni nap né raguiʼx láani ló néz. Stipnésyibu raguiʼx xquix palmeras ló néz, né racaʼyibu rudx: ¡Dios guiduidy xilaay ni gony mandary ni sieed ni golúbu!

Lainy gudx Israel gocni scú órni toib ni radxiin gony mandary rioʼ lainy gudx Jerusalén rabuby toib bor par gudx guibí láabu. Ndeʼ ni rony Jesús. Né buñreʼ caslooy que rioladxyibu gony mandary Jesús layibu. Per diti guirá buñ rioladx gony mandary Jesús. Raduidyno cuent de láani órni Jesús radxiin lainy yoʼ xiroʼ ro rac adorar Jehová.

Lainy yoʼ xiroʼ reʼ, Jesús rasial buñ ni diti rabí né buñ xot né bisaʼ clas buñguitz. Órni mbioxien rabí ni rony Jesús, rony xiroʼyibu Jesús. Per ndeʼ rony que ni rasanir nisló israelitas par gony goʼox radzuitz, né raibyibu Jesús: ¿Racadiaglo xí láani caniʼ guirá mbiox ca la?

Jesús racapy: Scú, ¿xí diti ma bíilto ló Biblia ro náni de roʼ mbioxien Dios sony que guiré diitz ni gonyxiroʼ láabu la? Por ngú mbioxien diti rasian rony xiroʼyibu ni Dios biduidy par gony mandary.

¿Diti rioladxno gacno ximod guirá mbioxien reʼ la? Rioʼ ór noʼ tipnés buñ ni ná guisianno guinino de Gobierno xtuny Dios. Per lóono diti guisianno guinino de galrradziguiaʼ ni Jesús gony par buñ.

Dzú Jesús goyoʼ ló Gudxlio diti gocni ór par nasaló ñony mandarybu. ¿Pu dzú guidxin gacni? Xpiimbu goniiny ñan láani. Nigoreʼ guisuidyno láani.