HISTORIA 93
Jesús rayaʼan xidalguixo buñ
TOIB cós nadzuʼpy góc. Mer ma bigaityibu Juan ni Ragonis. Herodías, tzeʼel ni rony mandary nigolú bianladxbu Juan. Né bunybu gann que Herodes ñony mandary guiroc guic Juan.
Órni Jesús ran ndeʼ rioʼ nabann né riebu sit toib lagary ro diti noʼ buñ. Per buñ racanal láabu. Órni rabíbu xidalguixo buñ ronladxbu guirá buñreʼ, né por ngú ranibu de Gobierno xtuny Dios, né rasialbu guirá buñguitz.
Gueʼel cú xpiimbu rieed ronoʼbu né raniʼ: Mápa cayogueʼel, né lagary reʼ nigolú sitni. Bixel guirá buñreʼ par guiyopyibu ni guáyibu lainy ranch ni noʼ gahx.
Jesús racapy: Layibu diti guieyibu, lóoto colguiduidy ni guáyibu. Rabíbu Felipe né ranabdiitzbu: ¿Pu lagary labúu siino xiroʼ galrro par guirá buñ ni dxee reʼ?
Felipe racapy láabu: Nigolú xiroʼ bidxiich saquiino par siino galrro, par sigaʼl guáyibu. Andrés raniʼ: Mbioxhlasien reʼ napbu gáay páa né chop beel. Ndeʼ diti sigaʼl par guirá buñreʼ.
Jesús raniʼ: Colgaiby guirá buñ cuubu ló guixbataʼ. Ór cú Jesús raduidybu guixquix Jehová por galrro né rasaló ratzobu páa. Xpiimbu raduidyibu páa né beel guirá buñ ni dxee cú. Noʼ 5,000 buñguieeu, né láaca noʼ xidalguixo buñgonaʼ né mbiox. Guirá buñ ro né radza lainy. ¡Órni xpiin Jesús rasaló ratopyibu ni bian, rian doce dzoim!
Jesús nigoreʼ rony que xpiimbu rioʼ lainy bark par tudyibu nisdaʼ Galilea. Gueʼel reʼ rac toib buroʼdant né ronyni xcuann ló nisdaʼ né rasisni bark. Xpiin Jesús radzuibygolú. Ór cú galagueʼel, rabíyibu toib buñ sieed casaa ló nisdaʼ. Racadzuʼpyibu rudx, portín diti nambu chú cabíyibu.
Jesús ná: Diti guidzuibyto. ¡Naʼ ndeʼ! Per layibu diti raluladxyibu, ór cú Pedro raniʼ: Pal Jesús looy, góoch naʼ saaya ló nisdaʼ par guidxin ronoʼlo. Jesús racapy: ¡Godaʼ! ¡Pedro rietj lainy bark né rasaa ló nís! Ór cú radzuibybu né rasaló raguichbu, per Jesús ralaa láabu.
Stoib ór, Jesús láaca raduidybu ni guá xidalguixo buñ. Ronybu láani né gatz páa né chop tzón beel. Láaca rioʼ xiroʼ galrro par guiráyibu. ¡Sacroyen rasacno órni rabino ximod Jesús ranbu buñ! ¡Órni láabu gony mandarybu Gobierno xtuny Dios diti sioʼno ló galrasaʼ!
