¡GANNLO! ¿Xí láani cayac reʼ? ¿Gocnaa mbiox ni náaxh layoo la? ¡Bibiʼ, toibtica buñguieeu ni careʼ roʼ yoʼ, láabu ngú Pablo! ¿Labúu rabilo Timoteo ca la? ¿Roʼ bentan birexcoo mbiox ca, né biabbu la?

Scú láani, nga ni gosaclobu. Pablo cagoʼ toib discurs par guicadiag guirá buñ ni racanal Jesús ni rabés lainy gudx Troas. Láabu ma nambu que sacla par guibíbu guirá buñ de Troas portín stoib dzúcu tzóbu lainy toib bark tzébu stoib lad. Por ngú xtiscursbu gocla hasta galagueʼel.

Mbioxhlas reʼ ni góc laa Eutico, roʼ bentan gorúbu, né gonás bacaʼal láabu. ¡Birexcobu roʼ bentan de tzón píis! Por ngú, buñ ni dxee cú noyibu ló galrasaʼ xomod rabilo ló dibuj. Órni tipnés buñguieeu ralís mbiox reʼ, ¡ma gueʼet láabu!

Órni Pablo raduidy cuent que mbiox reʼ ma goity, ratbu laidy né raguʼdxbu mbiox reʼ. Ór cú ranibu: Diti tzóto ló galrasaʼ. ¡Láabu nasaʼcbu! ¡Né scú láani! ¡Nacní toib galrradziguiaʼ! ¡Pablo buny que nabanybu stoib! Xidalguixo buñ ni dxee rabí láani né rabaladxyibu.

Guiráyibu rabiguet stoib lainy yoʼ de tzón píis né rooyibu galrro. Guidopynac gueʼel ragoʼ Pablo discurs. ¡Per labúu guinino que Eutico ma diti saisybu stoib! Ór cú Pablo, Timoteo né ni rony compañer layibu rioʼyibu lainy bark. ¿Nanlo pu lagary rieyibu la?

Pablo ma casloʼoxbu ni rion buelt ni láabu riebu ranibu xtiitz Dios lainy xidal gudx. Lósi gudx ni laa Éfeso goyoʼbu tzón íz. Por ngú ni rion buelt ni casaabu caniʼbu xtiitz Dios goclabu más que ni rarop buelt.

Órni bireʼyibu Troas, bark ni noyibu lainy goclani tidxo dzú gudx ni laa Mileto. Né como Éfeso diti nigolú sit riaʼanni de gudx ni laa Mileto, Pablo raxelcaʼ tipnés buñguieeu ni nap más íz ni noʼ lainy congregación de gudx reʼ par guieed ronoʼbu né guininébu biinreʼ por último. Per órni bark reʼ rareʼ, ¡nigolú nabann rioʼyibu órni Pablo rasian layibu!

Radxiin dzú bark reʼ rabiguet Cesarea. Laʼga Pablo rian lidx Felipe, toib buñguieeu ni raniʼ xi gac dzú ni sietra ni laa Ágabo nábu que órni Pablo guidxin Jerusalén noʼ ni sagoʼ láabu press. Né ngú ni rac, mod goní Ágabo. Né órni Pablo ma godudy chop íz press gudx Cesarea, raxelyibu Pablo gudx Roma ronoʼ César, buñguieeu ni rony mandary Roma, par guinibu pal Pablo nap dool. Guisuidyno xí láani rac órni séebu Roma.