Goyoʼ toib lagary lainy gudx Israel niis ro ralainy Govitz né buñ ni bibany cú bunyibu crer que vitzón labúu ragonésni buñ. Toib goxin, bibiʼyibu toib vitzón ni racaptzadit lainy guibá né gosaani lainy guibá né cuanalyibu láani. «Vitzóncu» goyné layibu dada Jerusalén. Órni bidxinyibu cú gonabdiitzyibu buñ: «¿Pu noʼ nidxiyen ni gony mandary buñ judíos? Portín raibydo guixixipdo nislóbu».

Herodes, ni buny mandary Jerusalén, gonbu que gool toib badaʼ ni gony mandary. Goyoʼbu galrrasaʼ né gonabdiitzbu tipnés sacerdotes: «¿Pu non gál badaʼ ni gony mandary?». Layibu cuapyibu: «Profetas goniʼ que non gálbu lainy gudx Belén». Ór cú Herodes bixelcaʼ guirá buñ ni sieed niis ro ralainy Govitz né góoch Herodes layibu: «Coltzé Belén né colguiyopy nidxiyencu. Órni ma bidzelto láabu guieedto gaibyto naʼ pu noʼbu, portín láaca nainy naʼ tzaʼya guixixiba nislóbu». Per diti nigolú ni goniʼbu.

Ór cú «vitzón» gosaló gosaani stoib né cuanalyibu láani dada Belén. Né «vitzóncu» gosagadzuni laidy toib yoʼ, buñreʼ goyoʼyibu né bidzelyibu Jesús né María. Layibu bixixipyibu né biscadyibu ór, incienso né mirra a Jesús. Per ¿Jehová bixel guirá buñcu ronoʼ Jesús la? Yaca.

Gueʼelcu Jehová ló toib bacaʼal gochbu José: «Herodes ná guigaity Jesús. Bixony goyee Egipto né goyné tzeʼel lo né xiingaʼnienlo. Cú cuésto né naʼ gaabi lóoto pu dzú guibiguetto, dzú ma diti tzoʼ badaʼca ló riesga». Órcuca José né xfamily goyoʼyibu néz seeyibu Egipto.

Jehová láaca gochbu guirá buñ ni sieed niis ro ralainy Govitz que diti nabiguetyibu ronoʼ Herodes. Herodes bidzuitzgoluʼ órni biduidybu cuent que guirá buñcu diti bibiguet ronoʼbu. Diti bidzelbu Jesús por ngú buny  mandarybu ñaity guirá badaʼ ni nap xiz Jesús lainy gudx Belén. Per diti labúu bigaitybu Jesús, portín ór cú Jesús ma noʼbu Egipto.

Después goity Herodes. Ór cú Jehová gochbu José: «Ma labúu guibiguetto portín ma goity ni ná nagaity Jesús». José, María né Jesús bibiguetyibu Israel né goylésyibu toib gudxyen ni góc laa Nazaret.