César Augusto ni buny mandary Imperio romano buny mandarybu que guirá buñ judíos nabiguetyibu gudx ro golyibu par guicá laayibu ló toib guiich. Por ngú José né María goyeeyibu Belén, lagary ro golés xfamily José. Né ló dzúcu mápa mer gál xiin María.

Órni bidxinyibu Belén diti bidzelyibu yoʼ ro gaisyibu por ngú biaʼanyibu lainy xcorraa nimal né cú gool Jesús. María bichel lairy nagoch láabu né godiʼx láabu lainy toib canoo.

Gahxca Belén, tipnés buñ cayap xiil laidy dainy gueʼelcu. Tisintiempsi, bidxin toib ángel ronoʼyibu né bibiʼyibu xcalnadip Jehová xomod toib guii ni bigoo layibu. Buñcu bidzuibyibu, per ángelcu góoch layibu: «Diti guidzuibyto, sitnéya diitz sacró ni gaabi lóoto. Dzureʼ gool Mesías lainy gudx Belén». Órcuca  bibiʼyibu xidal ángeles lainy guibá ni ná: «Gonyxiroʼno Jehová lainy guibá né guiguaʼ buñ goxt ló gudxlio». Né ór cú ángeles binitcayibu. ¿Xí buny guirá buñcu ór cú?

Guirá buñcu gosaló goninéyibu saʼyibu: «Tzoʼno Belén nigoreʼca». Órcuca goyoʼyibu néz né goyeeyibu né bidzelyibu José, María né badaʼyencu lainy xcorraa nimal.

Guirá buñ ni bicadiag ni góoch ángelcu a buñ ni ran xiil bidziguiaʼyibu. María buny pensary ló diitz ni goniʼ ángelcu né dipa bialadxbu láani. Guirá buñcu bibiguetyibu goyguenyibu xilieen xtunybu laidy dainy, né biduidyibu guixquix Jehová por guirá ni bibiʼyibu né ni bicadiagyibu.