Moisés bibanybu 40 íz lainy gudx Madián. Ló dzúcu bunybu galtzeʼel né goyoʼ xiimbu. Toibtica dzú órni cayapbu xilieen gahxca dainy ni góc laa Sinaí bibiʼbu toib galrradziguiaʼ. Bibiʼbu toib yac ni cayalguii, ¡per diti raʼijni! Órni Moisés bibigax par guibiʼtzaybu láani, bicadiagbu toib rudx ni bireʼ ronoʼ yac cú, né rudxcu góoch láabu: «¡Moisés! Diti guibiglo más. Goleʼ xcalguitlo, portín sagaʼlo ló toib layoo ni nayadit». Jehová biquiimbu toib ángel par goninébu Moisés.

Moisés bidzuiby, por ngú bisiegbu lóbu. Rudxcu goniʼ: «Ma bibiʼya ximod guirá israelitas cadudyibu ló xiroʼ galnagan. Cueʼya layibu ladxña buñ egipcios né tzanéya layibu ló toib layoo nigolú sacróyen. Né raniiny naʼ que looy cueʼlo layibu lainy gudx Egipto». ¿Bidziguiaʼ Moisés ni gonab Dios láabu la?

Moisés gonabdiitz: «¿Xí gaabi layibu órni guinabdiitzyibu naʼ chú bixel looy?». Dios cuapy Moisés: «Góoch layibu que Jehová, Dios xtuny Abrahán, Dios xtuny Isaac né Dios xtuny Jacob bixel looy». Moisés goniʼ: «¿Xí goni pal diti raluladxyibu naʼ?». Jehová bislooy ximod ñacné láabu. Jehová góoch láabu nasalbu xiacbu layoo né órni bunybu láani, ¡xiacbu gocni toib beʼel! Después, Moisés gonás xobaʼan beʼelcu né gocni yac stoib. Ór cú Jehová góoch láabu: «Órni gonylo galrradziguiaʼ reʼ nislóyibu, sonyibu crer que naʼ bixela looy».

Per Moisés cuapy: «Diti naana raniya nisló buñ». Jehová biduidy xtiitz: «Naʼ gaabi looy xi guiniʼlo né láaca guixela buchlo Aarón gacné looy». Órni Moisés gon que Jehová sacné láabu, bibiguetbu Egipto né goynébu tzeelbu né ximbioxbu.