Xhoon íz gop Josías órni gosaló buny mandarybu gudx Judá. Ló dzúcu buñ bieen dioxh falz né bunyibu galchiser. Dzú ni Josías gop 16 íz, biyopybu mod ñembu Jehová xinésni. Órni gopbu 20 íz gosaló binitlóbu guirá dioxh falz ni bieen buñ né binitlóbu guirá altar ni goyoʼ guidopy lainy gudxcú né órni ma gopbu 26 íz gosaló bunytzaaybu yoʼ ro bienyibu Jehová.

Órni casiáyibu lainy templo, sacerdote Hilquías bidzelbu rollo ro sieed Xiley Jehová, sigory Moisés bicaʼ Leycu. Safán ni góc secretary goyné Leycu ronoʼ Josías né gosaló bíilbu láani fuers. Josías bicadiag ni náni né biduidybu cuent que ma por xidal íz diti cayonyibu ni ná Jehová. Ór cú Josías gochbu Hilquías: «Jehová nigolú cadzuitz né lóono. Goniné láabu par gaibybu lóono xi non gonyno». Jehová bixel Huldá ni goniʼ profecías, naniʼ ndeʼ: «Gudx Judá ma bisian naʼ. Satuidy layibu ló castig, per diti soni láani ló xtzú Josías, portín láabu nacbu buñdxo».

Órni Josías bicadiagbu ni ná Jehová, goyeebu lainy templo né bitopbu guirá buñ de gudx Judá. Después bíilbu ni ná Ley xtuny Jehová par bicadiag guirá buñcu láani. Josías né guirá buñcu biduidyibu xtiitzyibu guisobyibu Dios né guidopy xcalnabanyibu.

Por xidal íz gudx Judá ma diti bunyibu lanii Pascua. Per Josías bíilbu ló Ley xtuny Dios que Pascua non gacni guirá íz, por ngú gochbu buñ: «Gonyno lanii Pascua par Jehová». Después,  Josías bixelbu buñ ñonytzaay xidal galrrascad par Jehová, né biyopybu tipnés buñ ni ñoʼol canción lainy templo. Ór cú ma bunyibu Pascua né después bunyibu Lanii Páa sin Levadur ni gocla gatz govitz. Desde dzú bibany Samuel góc laniicu scú, después de ngú godudy xidal íz par buny Josías láani stoib. Josías nigolú goniiny nasob ni ná xiley Dios. ¿Looy ga? ¿Láaca rioladxlo guisuidylo ni ná Jehová la?