1, 2. Ló naareʼ, ¿pu lagary labúu guilaano?

BUNY pensary que laʼga seelo ló néz, rasaló rioxcaay guibá, tisintiempsi riapynís. Raniʼ guisioʼo né rasaló riab guié, ór cú raxonylo rayopylo toib lagary ro labúu guilaguiélo. ¡Balaati rabaladxlo ni bidzelo ro labúu bilaalo!

² Ló naareʼ, scúca nac lagary ro nabanyno. Cayacxiroʼ cós mal ló gudxliogoxreʼ. Sigory ranabdiitzlo: «¿Pu lagary labúu guilaano?». Toib buñ ni bicaʼ la Biblia goniʼ: «Naʼ saabi Jehová: Looy naclo ro racachlana né naclo xomod toib muro ni ralaa, Dios xtuni ni napa confianz» (Salmo 91:2). Ló naareʼ, Jehová labúu gacné lóono né galnagan ni cacalóno, né ló dzú ni sietra sacaʼno galnasác.

3. ¿Xí non gonyno par labúu gacné Jehová lóono?

³ ¿Ximod ralaa Jehová lóono? Labúu gacnébu lóono guicalóno nitisi galnagan. Láaca, más nadipbu que nitisi buñ ni ná gony mal lóono. Ná pal rasaclono cós mal nigoreʼ, labúu gapno confianz que Jehová sasial lóono ló dzú ni sietra. La Biblia raiby lóono tzodieʼno ló xcalnadxiʼ Dios (Judas 21). Non guidzakno Jehová par labúu gacnébu lóono órni cacalóno galnagan. Per ¿ximod labúu gonyno láani?

4, 5. ¿Ximod ma bislooy Jehová que nadxiʼ lóono?

⁴ Par gacno ximig Jehová, non guientzaayno que  nigolú nadxiʼbu lóono. Buny pensary guirá ni ma buny Jehová por lóono. Bisaʼbu Gudxlio, ni nac toib lagary sacróyen ronoʼgolu yac móz né nimal. Láaca bidudybu galrroníx lóono né siil nís. Per diti ngúsi, Jehová ma bisuidy lóono ló la Biblia ximod laabu né xi clas Dios nacbu. Per ni máspa, bislooybu que nadxiʼbu lóono órni bixelbu Xiimbu Jesús goity por lóono (Juan 3:16). Por xcalgoity Jesús, sacaʼno galnasác ló dzú ni sietra.

⁵ Jehová ma goloʼ toib Gobierno lainy guibá. Gobierno reʼ mápa mer sabeʼni galrrioʼob né sonyni que Gudxlio gacni toib lagary móz, ro guibanyno goxt né nakit (Salmo 37:29). Jehová láaca ma bislooy que nadxiʼ lóono portín ma bisuidybu lóono ximod guibanyno galán. Láaca, raibybu lóono guininéno láabu né puextca noʼbu guicadiagbu guirácano. Xomod ma bisuidyno, Jehová nigolú nadxiʼbu guirácano.

6. ¿Ximod labúu guislooylo que rasac par looy xcalnadxiʼ Jehová?

⁶ ¿Ximod labúu guislooylo que rasac par looy xcalnadxiʼ Jehová? Bidudy guixquix láabu por guirá ni ma bidudybu looy. Nabanni, per ló Gudxlio bidza buñ ni diti radudy guixquix. Né scúca góc ló xtzú Jesús. Toibtica buelt, Jesús bisial chii buñ ni gop lepra, per nosi toib bidudy guixquix láabu (Lucas 17:12-17). Nainy gacno xomod buñguieeucu né guirá ór guislooyno que radudyno guixquix Jehová.

7. ¿Ximod non gandxiʼno Jehová?

⁷ Láaca non guislooyno que nadxiʼno Jehová. Jesús gochbu xpiimbu que non gandxiʼyibu Jehová né guidopy xcalnabanyibu, guidopynacyibu né guidopy  xpensaryibu (bíil Mateo 22:37). ¿Xí radudy diitz guirá ndeʼ?

8, 9. ¿Ximod raslooyno Jehová que nadxiʼno láabu?

⁸ ¿Nosi guinino que nadxiʼno Jehová la? Yaca. Pal nadxiʼno Jehová né guidopy xcalnabanyno, guidopynacno né guidopy xpensaryno, saslooyno láani por mod ronyno (Mateo 7:16-20). La Biblia nayadit rasuidy pal nadxiʼno Dios sasobdiitzno ni rony mandarybu. ¿Naganni la? Yaca. Portín ni rony mandary Jehová diti naganni (bíil 1 Juan 5:3).

⁹ Órni rasobdiitzno Jehová, rabanyno nakit né ma diti nac nacsi nabanyno (Isaías 48:17, 18). Per ¿xí sacné lóono diti guiañ gacno ximigbu? Guibiʼno guidoni.

10. ¿Xigony diti guiañ guisuidylo de Jehová?

¹⁰ ¿Ximod bidxin góclo ximig Jehová? Órni bisuidylo la Biblia bimbutzaaylo Jehová né gosaló bidzaklo láabu. Mod radzakno Jehová nacni xomod guii. Par diti guioʼyni, non coʼlo yac loni. Ndeʼ radudy diitz que guirá ór guisuidylo ni ná Jehová xomod cayonylo láani nigoreʼ, par diti guiañ guidzaklo láabu (Proverbios 2:1-5).

11. Ni casuidylo ló la Biblia, ¿ximod sacnéni looy?

¹¹ Conforma casuidylo la Biblia, sasuidylo cós ni sadxin lainy xcalnabanylo. Cuá cuidad ximod gosac chop xpiin Jesús órni golexabu xi radudy diitz tipnés profecías. Layibu goniʼyibu: «¿Xí diti biaan xcalnabanyno órni sieedbu caninébu lóono ló néz, órni cabexatzaybu Escrituras lóono la?» (Lucas 24:32).

12, 13. a) ¿Xí labúu nasaclóo galnadxiʼ ni napno Dios? b) ¿Xí non gonyno par diti guichich galnadxiʼ ni napno Jehová?

 ¹² Ni bisuidy Jesús guiropca xpiin bidxinni lainy xcalnabanyibu. Sigory láaca nigolú bibaladxlo órni gosalólo bienlo ni ná la Biblia. Por ngú, labúu bimbulo Jehová né bidxin midid gondxiʼlo láabu. Nandxichno que diti nainy looy guichich galnadxiʼ ni naplo Jehová (Mateo 24:12).

¹³ Nigoreʼ ni ma naclo ximig Dios, non gonylo xtem par diti guiañ guidzaklo Jehová. Par labúu gonylo láani diti guiañ guisuidylo de Jehová né de Jesús. Láaca, non gonylo pensary ló ni casuidylo né ximod guisoblo láani (Juan 17:3). Órni goʼol lo o guisuidylo la Biblia, gonabdiitz looyca: «¿Xí rasuidy ndeʼ naʼ de Jehová? ¿Xigony non gandxiʼya Dios né guidopy xcalnabani né guidopynaca?» (1 Timoteo 4:15).

14. ¿Ximod racné oración lóono par gac nadip galnadxiʼ ni napno Jehová?

 ¹⁴ Pal naplo toib ximigdxinlo, nandxichno que guirá ór raninélo láabu. Ndeʼ rony que más radzakto saʼto. Modcuca, galnadxiʼ ni napno Jehová rac nadipni órni raninéno láabu guirá ór (bíil 1 Tesalonicenses 5:17). Oración nacni toib galrrascad rodann xtuny Bixiosno ni noʼ guibá. Guirá ór non guinino ni noʼ lainy xcalnabanyno (Salmo 62:8). Diti guinino láani de memory. Pal guirá ór rasuidyno la Biblia né raibyno Dios ni noʼ lainy xcalnabanyno, galnadxiʼ ni napno Jehová sac nadipni más.

15, 16. ¿Xigony nigolú rasac guiniʼlo xtiitz Dios?

¹⁵ Par diti guiañ gacno ximig Jehová láaca non gaibyno stipnés buñ ni ronyno crer. Toib privilegio rodann láani gaibyno stipnés ni ma nanno de Jehová (Lucas 1:74). Láaca, nacni toib mandary ni bidudy Jesús guirá cristianos ni rasuidy xinésni. Por ngú guiráno non guinino diitz sacró de Gobierno xtuny Dios. ¿Ma cayonylo láani la? (Mateo 24:14; 28:19, 20).

¹⁶ Par apóstol Pablo nigolú gosac naniʼbu xtiitz Dios, por ngú goniʼbu que nacni xomod toib cós ni rasac (2 Corintios 4:7). Diti noʼ cós ni más rasac que gaibylo stipnés ni ná Jehová né ni raniiny gonybu. Órni raniʼlo xtiitz Dios nacni toib mod ni rony adorarlo Jehová, né par láabu nigolú rasac gonylo xchiimbu (Hebreos 6:10). Órni raniʼlo xtiitz Dios racnélo stipnés gac ximig Dios né racnéni looyca. Láaca órni raniʼlo xtiitz Dios labúu sabanylo tipzó né buñ ni racadiag looy láaca labúu sabany tipzó  (bíil 1 Corintios 15:58). ¿Noʼ stoib dxiin ni gony que guisaclo más sacró la?

17. ¿Xigony raquiin guinino xtiitz Dios?

¹⁷ Nigolú raquiin guinino xtiitz Dios. La Biblia ná: «Goniʼ xtiitz Dios; buny láani nimaca» (2 Timoteo 4:2). Buñ caquiin guicadiag diitz sacró de Gobierno xtuny Dios. Láaca la Biblia ná: «¡Xtzú rodann Jehová noʼni gaxtiguié! ¡Noʼni gax né naguel cabigaxni!». Fin xtuny gudxliogoxreʼ «¡sadxinni órni non guidxinni!» (Sofonías 1:14; Habacuc 2:3). Mápa mer Jehová sanitló xcudxliogox Buñdzab. Antes de guidxin dzúcu, non gaibyno stipnés buñ que raquiin tzoʼyibu xilad Jehová.

18. ¿Xigony non guidopno par gony adorarno Jehová?

¹⁸ Jehová raniiny que lóono ni nacno cristianos ni rony xinésni non guidopno par gony adorarno láabu. La Biblia ná: «Non tzoʼno galrrasaʼ por saʼno par gony animarno saʼno guislooy galnadxiʼ né gonyno dxiin galán, dipa guisianno de tzoʼno reunión, xomod tipnés buñ ni ma biaʼ diti riee. Xalagary ngú, gony animarno saʼno, máspa ni ma cabiʼno que xtzú Dios ma cabigaxni» (Hebreos 10:24, 25). Non gonyno rutirigaʼlni lóono par dipa gony faltno reunión. Ló reunión, rony animarno né racnéno saʼno.

19. ¿Xí sacné lóono gandxiʼno xhermanno?

¹⁹ Ló reunión sadzelo buñ ni gac ximigdxinlo. Layibu sacnéyibu looy gonylo xchiin Jehová. Simbulo xidal clas herman ni cayony xtem par gony adorar Jehová. Per xomodca looy, layibu láaca nacyibu buñ galkié né rachéyibu. Órni guichéyibu, gosaguel bitudy scásiʼ xcalkiéyibu (bíil Colosenses 3:13). Guirá  ór bibiʼ cós sacró ni rony herman. Ndeʼ sacné looy gandxiʼlo layibu né guidzaklo más Jehová.

20, 21. ¿Xí láani ngú «galnabany ni nigolú»?

²⁰ Jehová raniiny que guirá ximigbu guibany sacró. La Biblia rasuidy que ló dzú ni sietra ma diti sabanyno xomod ló naareʼ.

²¹ Ló dzú ni sietra sabanyno tipzó, diti nosi sabanyno setent o ochent íz. Sacró «sabanyno tipzó» ló toib Gudxlio móz, ro diti saxoʼno, ro guibanyno goxtiguie né nakit. Ndeʼ ni ná la Biblia «galnabany ni nigolú». Jehová radudy xtiitz guicaʼno láani, per non gonyno rutirigaʼlni lóono par tzagaʼlno láani (1 Timoteo 6:12, 19).

22. a) ¿Ximod labúu guicaʼno «galnabany ni nigolú»? b) ¿Xigony por stiplóocano dipa labúu nabanyno tipzó?

²² ¿Ximod labúu tzagaʼlno «galnabany ni nigolú»? La Biblia ná que buñ non «gacyibu buñtzay, gonyibu xidal cós galán» (1 Timoteo 6:18). Ndeʼ radudy diitz que guisobdiitzno ni casuidyno ló la Biblia. Per galnabany tipzó diti labúu guicaʼno láani por xtem ni ronyno. Ná gonyno xtem diti labúu sacaʼno láani stiplóocano. Nacni toib galrrascad ni Jehová radudy lóono ná diti non guicaʼno láani (Romanos 5:15). Bixiosno ni noʼ guibá raniiny láabu guidudybu galrrascad reʼ xpiimbu.

23. ¿Xigony non coʼlo guiclo gonylo xinésni nigoreʼ?

²³ Gonabdiitz looyca: «Né naʼ, ¿rony adorar Dios xomod nainy láabu la?». Pal radudylo cuent que non guitzaʼlo mod naclo, bunyca láani. Órni napno confianz lóo Jehová né ronyno xtem por guisobdiitzno láabu, labúu ralaano ronoʼbu. Jehová salaabu  xpiimbu ló dzú ni ma cadubylagaʼ gudxliogoxreʼ. Né después sonybu que guibanyno tipzó ló Gudxlio móz, mod ma goniʼbu. Pal ragoʼlo guiclo gonylo xinésni nigoreʼ, labúu sabanylo tipzó.