CAPÍTULO 3
Ni raniiny Dios par buñgudxlio
1. ¿Xí goniiny Dios par buñgudxlio?
DIOS bisaʼ Adán né Eva par nabanyibu sacró. Dios goniiny que nabésyibu lainy toib lagary móz, ñapyibu xiinyibu, ñonyibu guidopynac Gudxlio toib lagary sacró né ñanyibu guirá nimalien. Né ni raniiny láabu gonybu diti ma bialadxbu láani. Ngú ni raniiny Dios par buñgudxlio (Génesis 1:28; 2:8, 9, 15). (Bibiʼ ni ná nota 6, «Ni raniiny Dios par Gudxlio»).
2. a) ¿Ximod nanno que Dios sony cumplir ni ma goniʼ? b) ¿Xí clas buñ sabany ló Gudxlio, né por balac tiemp?
2 ¿Nálo que sioʼ dzú sabanyno ló toib lagary móz la? Jehová ná que scú. Raibybu lóono: «Ma goloʼya guicaʼ goni láani né sony cumplir ni ma goniya» (Isaías 46:9-11; 55:11). Dios sony cumplir ni ma goniʼ, né diti noʼ ni labúu guicaa loni. Láaca, Jehová «diti xilaʼsi bisaʼbu gudxlio» (Isaías 45:18). Dios goniiny nabany xidalguixo buñ ló Gudxlio. Per ¿xí clas buñ, né por balac tiemp nabanyibu loni? La Biblia ná que buñtzay né buñ ni rasob «xtunyibu sac gudxlio né sabanyibu loni por tipzó» (Salmo 37:29; Apocalipsis 21:3, 4).
3. Sigory, ¿xí ranabdiitzno órni rabiʼno buñ ni raxoʼ né raity?
3 Ló naareʼ buñ raxoʼsa né raity. Ló xidal lagary, radíilyibu né ragaity saʼyibu. Diti ngú ni goniiny Dios ñac. Per ¿xí góc? ¿Xigony diti ma góc cumplir ni goniiny Dios nírcu? Nosi la Biblia racapy galrranabdiitz reʼ.
XI ENEMIG DIOS
4, 5. a) ¿Chú láabu biquiin toib beʼel par biiy diitz né Eva? b) ¿Ximod toib buñtzay labúu guidxin gac toib buñ gobáan?
4 La Biblia raiby lóono que Dios nap toib enemig ni laa «Buñdzab». Lainy Lagary móz ni góc laa Edén, Buñdzab biquiimbu toib beʼel par biiybu diitz né Eva (Apocalipsis 12:9; Génesis 3:1). Buñdzab buny que Eva naluladx que beʼelcu caniné láabu. (Bibiʼ ni ná nota 7, «Buñdzab»).
5 Per ¿Dios bisaʼ Buñdzab la? Yaca. Órni Dios bunytzaay Gudxlio par Adán né Eva, goyoʼ xidal ángeles lainy guibá. Conforma godudy dzú, toibtica de guirá ángelescu bitzaʼ mod góc né bidxin gócbu Buñdzab (Job 38:4, 7). Per ¿ximod? Guibiʼno toib ejemplo, ¿ximod toib buñtzay labúu guidxin gac toib buñ gobáan? Órni toib buñ rál diti nacbu buñ gobáan. Per pal toib buñ rasobladx ni diti nac xtuny né diti rabeʼbu láani guicbu, pensary mal reʼ racni más nadip, né órni napbu oportunida par cuambu, rabambu. Modcu toib buñtzay radxin rac buñ gobáan (bíil Santiago 1:13-15). (Bibiʼ ni ná nota 8, «Ángeles»).
6. ¿Ximod toib ángel bidxin góc xi enemig Dios?
6 Ngú ni gosaclóo ángelcu. Órni Jehová bisaʼbu Adán né Eva, gochbu biinreʼ que ñoʼ xiinyibu par nadal buñ ló Gudxlio (Génesis 1:27, 28). Sigory ángelcu buny pensary modreʼ: «Guirá buñreʼ labúu guisanadx naʼ xalagary guisanadxyibu Jehová». Diti goleʼbu láani guicbu, goniiny láabu que buñ ñen láabu xalagary ñenyibu Jehová. Por ngú biscúbu né godxitquelbu Eva (bíil Génesis 3:1-5). Órni bunybu ndeʼ, bidxin gócbu Buñdzab. Modreʼ gócbu xi enemig Dios.
7. a) ¿Xigony goity Adán né Eva? b) Golexa xigony guiráno raityno né rioʼxno.
7 Dios diti bidudybu permís ñooyibu xcaa toibtica yac ni gosagaʼ lainy lagary mózcu. Gochbu biinreʼ pal ñooyibu xcaani ñaityibu. Per diti bisobdiitzyibu né godóyibu láani (Génesis 2:17; 3:6). Adán né Eva bunyibu galkié né conforma godudy dzú goityibu, xomodpa goniʼ Jehová (Génesis 3:17-19). Órni Adán né Eva goyoʼ xiinyibu, bitudyibu galkié reʼ xiinyibu né por ngú láaca goityibu (bíil Romanos 5:12). ¿Ximod xiin Adán né Eva gop galkié? Buny pensary que cabeʼlo páa né ragoʼlo láani lainy casolej ni ma bitach. Órni ma gooy páa reʼ diti sareʼtzayni. Órni Adán diti bisobbu Dios, bidxin gócbu buñ galkié. Guiráno nacno xiin Adán, por ngú guiráno láaca nacno buñ galkié xomod láabu. Né guiráno rioʼxno né raityno (Romanos 3:23). (Bibiʼ ni ná nota 9, «Galkié»).
8, 9. a) ¿Xí goniiny Buñdzab que naluladx Adán né Eva? b) ¿Xigony diti bigaityca Jehová guirá ni cualó láabu?
8 Órni Buñdzab buny gan que Adán né Eva diti nasob Dios, gosaló bikíilbu stipnés buñ par nacaló a Jehová. Buñdzab goniiny que Adán né Eva naluladx que Dios rascú, diti rony mandary galán né que diti ronladx layibu. Buñdzab bidudy diitz que buñgudxlio diti raquiin conés Dios layibu. Láaca bidudybu diitz que Adán né Eva stipláacayibu labúu ganyibu xi ngú cós tzaay né cós mal. ¿Xí ñony Jehová? Labúu nanitlóbu guirá ni cualó láabu né modcu nanitlóbu xcalnayaʼyibu. Per pal ñonybu ngú diti naslooybu que Buñdzab rascú.
9 Jehová diti bigaityca guirá ni cualó láabu, xalagary ngú bidudybu lagary que ñonyibu mandary láacayibu por tidxó tiemp. ¿Xigony? Portín modreʼ Jehová naslooy que Buñdzab rascú né que Jehová nan xi ngú ni más galán par lóono. Sasuidyno más de tema reʼ ló capítulo 11. Né looyga, ¿ximod rabiʼlo ni buny Adán né Eva? ¿Galán ngú ni biluladxyibu Buñdzab xalagary nasobdiitzyibu Dios la? Jehová bidudy guiráni layibu: diti gopyibu galkié, bibanyibu lainy toib lagary móz né Dios bidudy layibu toib dxiin natzatz. Per Buñdzab dipa buny xitcal por layibu. Pal looy ñoʼlo cú, ¿xí ñonylo?
10. ¿Xí raquiin coʼno guicno gonyno?
10 Xomodca Adán né Eva, ma riaʼanni ladxñano pal guisobno Jehová o guisobno Buñdzab. Pal rasobno Jehová xomod ni rony mandary, sacnéno láabu guislooybu que Buñdzab nac moxter (Salmo 73:28; bíil Proverbios 27:11). Goxeʼsi buñ ni noʼ ló Gudxlio rasob ni ná Dios. Dios diti rony mandary Gudxlio. Pal láabu diti rony mandarybu, ¿chú rony láani?
¿CHÚ RONY MANDARY GUDXLIOGOXREʼ?
¿Labúu nadudy Buñdzab a Jesús guirá gobiernos ni noʼ ló gudxliogoxreʼ pal diti ñacni xtunybu la?
11, 12. a) ¿Xí raslooy lóono ni góoch Buñdzab a Jesús? b) ¿Xí textos raslooy que Buñdzab rony mandary gudxliogoxreʼ?
11 Jesús gon chú merpa rony mandary gudxliogoxreʼ. Toibtica dzú, Buñdzab bislooy a Jesús «guirá gobierno ni noʼ ló gudxliogoxreʼ né gloria xtunyni». Né gochbu Jesús: «Guirá ndeʼ guidudi looy pal raxixiplo toibsi buelt par gony adorarlo naʼ» (Mateo 4:8, 9; Lucas 4:5, 6). Ni goniʼ Buñdzab raslooyni lóono que guirá gobiernos ni noʼ nacni xtunybu, pal diti ñacni xtunybu diti nadudybu láani Jesús. Riendxichni que guirá gobiernos ni noʼ nacni xtuny Buñdzab.
12 Sigory ranabdiitzlo: «¿Buñdzab rony mandary gudxliogoxreʼ la? ¿Xí diti Jehová ni nap xiroʼgolu galnadip bisaʼ guibá né Gudxlio la?» (Apocalipsis 4:11). Scú pue. Per Jesús nayadit goniʼ que Buñdzab «rony mandary gudxliogoxreʼ» (Juan 12:31; 14:30; 16:11). Apóstol Pablo goniʼ que Buñdzab nac «dios xtuny gudxliogoxreʼ» (2 Corintios 4:3, 4). Né apóstol Juan bicaʼ que «guidopynac gudxliogoxreʼ noʼni ladxña Buñdzab» (1 Juan 5:19).
XCUDXLIOGOX BUÑDZAB SANITLÓNI
13. ¿Xigony raquiinno toib Gudxlio copy?
13 Conforma radudy dzú más cayacxiroʼ galnagan ló gudxliogoxreʼ. Guirá lad noʼ guerr, noʼ buñ ni diti rony xinésni, noʼ buñ ni racachlan mod nac né ragaity saʼ. Buñgudxlio diti labúu rabeʼyibu galnagan ná ronyibu xtem. Por ngú, mápa mer guinitló Dios gudxliogoxreʼ ló guerr ni laa Armagedón né sonybu toib Gudxlio copy ro gac xinésni (Apocalipsis 16:14-16) (Bibiʼ ni ná nota 10, «Armagedón»).
14. a) ¿Chú láabu golú Dios par gac Rey ló Gobierno xtunybu? b) ¿Xí goniʼ la Biblia de Jesús?
14 Jehová saquiin Gobierno ni noʼ guibá par gonybu xinésni ló Gudxlio. Gobierno reʼ laani Gobierno xtuny Dios. Dios golúbu Jesús par gac Rey ló Gobierno reʼ. La Biblia goniʼ de goló xidal mil íz que Jesús sony mandary xomod «Príncipe de Paz» né que xcalmandarybu dipa sadudy xtzúni (Isaías 9:6, 7). Jesús bisuidy xpiin guinab gobierno reʼ órni goniʼbu: «Guieed Gobierno xtunylo. Gac ni nálo, xomod lainy guibá, láaca ló gudxlio» (Mateo 6:10). Ló capítulo 8 sasuidyno que Gobierno xtuny Dios sioʼni xalagary guirá gobiernos ni noʼ (bíil Daniel 2:44). Después, Gobierno reʼ sonyni Gudxlio toib lagary móz. (Bibiʼ ni ná nota 11, «Gobierno xtuny Dios»).
MÁPA MER SABANYNO LÓ TOIB GUDXLIO MÓZ
15. ¿Chú layibu ngú «gudxlio copy»?
15 La Biblia ná: «Noʼ toib guibá copy né toib gudxlio copy xomod bidudybu xtiitzbu guidudybu lóono, né lagarycu guirá buñ sony xinésni» (2 Pedro 3:13; Isaías 65:17). Rioʼ ór, órni la Biblia raniʼ de «gudxlio» radudyni diitz buñ ni rabés ló Gudxlio (Génesis 11:1). Por ngú, «gudxlio copy» ni ritlaa ló texto reʼ radudyni diitz buñ ni guisob ni ná Dios né ni guicacuent Dios. Guiráyibu sabanyibu ló toib Gudxlio móz.
16. a) ¿Xí galrrascad guidudy Dios guirá ni guibany ló Gudxlio copy? b) ¿Xí non gonyno par labúu guibanyno tipzó?
16 Jesús bidudy xtiitz que Dios sadudy «galnabany tipzó» a guirá buñ ni guibany ló Gudxlio copy (Marcos 10:30). ¿Xí non gonyno par labúu guibanyno tipzó? Galrracapy reʼ labúu guidzelno láani ló Juan 3:16 né 17:3 (bíil láani). Nigoreʼ guienno ximod ná la Biblia guibanyno ló toib Gudxlio móz.
17, 18. ¿Ximod nanno que ló Gudxlio móz saguaʼno goxtiguie né diti sioʼ ni satzuiby lóono?
17 Cós mal, guerr, buñ ni ragaity saʼ né galrradíil ma diti sioʼni. Ma diti sioʼ buñ mal ló Gudxlio (Salmo 37:10, 11). Ló Gudxlio sioʼ buñ ni gandxiʼ né guisob ni ná Dios. Buñ saguaʼ goxtiguie por tipzó (Salmo 72:7). Dios sanitló guerr (Salmo 46:9; Isaías 2:4).
18 Guirá ni rien Jehová diti sadzuiby. Ló xtzú israelitas órni layibu bisobyibu Dios, diti noʼ xi gocyibu né diti bidzuibyibu (Levítico 25:18, 19). Ló Gudxlio móz, láaca diti sioʼ ni satzuiby lóono. Guirá ór saguaʼno goxtiguie (bíil Isaías 32:18 né Miqueas 4:4).
19. ¿Xigony napno confianz que sioʼ galrro par guirá buñ ni guibany ló Gudxlio copy?
19 Sioʼ galrro par guiráxadit buñ. La Biblia ná: «Sioʼgolu ni guá buñ ló gudxlio, laidy dainy sioʼgoluni» (Salmo 72:16). Jehová «sadudy galnasác lóono», né «gudxlio sadudy xcaa» (Salmo 67:6).
20. ¿Ximod nanno que Gudxlio sácni toib lagary móz?
20 Guidopynac Gudxlio sadxin sácni toib lagary móz. Sacróyen sac lidxno né guirá lagary sioʼ guieʼ móz (bíil Isaías 65:21-24 né Apocalipsis 11:18). Guidopynac Gudxlio sácni mózdiguieʼ xomod góc Edén. Jehová sadudy guirá ni guiquiinno. La Biblia rasetlaa ni gony Dios: «Raxalo ñalo né radudylo ni raniiny xcalnabany guirá ni nabany» (Salmo 145:16).
21. ¿Ximod nanno que buñgudxlio saguaʼ toibsi né nimal?
21 Buñgudxlio saguaʼ toibsi né nimal. Nimal ma diti sonyimu xitcal buñgudxlio. Nimal ni nadzuʼpy ma diti sonyimu xitcal mbioxien (bíil Isaías 11:6-9; 65:25).
22. Golexa xi láani gony Jesús por guirá buñ ni caxoʼ.
22 Ni toib buñ saxoʼ. Órni Jesús goyoʼ ló Gudxlio bisialbu xidal buñ (Mateo 9:35; Marcos 1:40-42; Juan 5:5-9). Jesús nac Rey de Gobierno xtuny Dios né por ngú sasialbu guirá buñguitz. Ni toib buñ saniʼ: «Caxoʼya» (Isaías 33:24; 35:5, 6).
23. ¿Xí láani gony Dios por guirá buñ ni ma goity?
23 Buñ ni ma goity siás stoib. Dios radudy xtiitz que xidalguixo buñ sabany stoib. «Siás gueʼet ni buny xinésni né ni diti buny xinésni» (Hechos 24:15; bíil Juan 5:28, 29).
24. ¿Xí rasaclo ni guibanylo ló toib Gudxlio móz?
24 Guirácano coʼno guicno xi láani gonyno: ¿sasuidyno de Jehová né sasobno láabu o gonyno ni náapano la? Pal rasobdiitzno Jehová, ¿sabanyno goxt ló dzú ni sietra. Jesús gochbu toib buñguieeu ni golxigaʼ cueʼbu ni ma yaaca gaity: «Sioʼlo né naʼ lainy Lagary móz» (Lucas 23:43). Guisuidyno más de Jesucristo né ximod gony cumplirbu guirá ni ma goniʼ Dios gony.
