1. Sigory, ¿xí ranabdiitzlo órni ma bilox bisuidylo libro reʼ?

LÓ LIBRO reʼ ma bisuidylo xidal cós ni sieed ló la Biblia, ma bisuidylo que sabanyno tipzó ló dzú ni sietra, láaca xi racno órni raityno né que gueʼet siás (Eclesiastés 9:5; Lucas 23:43; Juan 5:28, 29; Apocalipsis 21:3, 4). Sigory ma rieelo reunión ni rony testigos xtuny Jehová né raluladxlo que layibu napyibu religión ni rasuidy xinésni (Juan 13:35). Sigory láaca  ma gosalólo cadzaklo Jehová né ma goloʼlo guiclo gonylo ni nábu. Por ngú sigory ranabdiitzlo: «¿Xí más raquiin goni par guisoba ni ná Dios?».

2. ¿Xigony toib buñguieeu de gudx Etiopía goyonis?

² Ndeʼ ni gonabdiitz toib buñguieeu de gudx Etiopía ni bibany ló siglo primero. Después ni biás Jesús lad gueʼet, toibtica xpiimbu ni góc laa Felipe, bisuidybu buñguieeucu ni ná xtiitz Dios né golexabu que Jesús ngú Mesías. Buñguieeucu nigolú bidziguiaʼbu ni bisuidybu né órcuca goniʼbu: «¡Bibiʼ! Reʼ noʼ nís. ¿Xí láani racaa naʼ par tzonisa?» (Hechos 8:26-36).

3. a) ¿Xí buny mandary Jesús gony xpiin? b) ¿Ximod non tzonis toib buñ?

³ La Biblia nayadit rasetlaa que pal nainy gonylo ni ná Jehová non tzonislo. Jesús buny mandary xpiin: «Colgacné buñ de guirá gudx gac xpiina». Né láaca goniʼbu: «Colconis layibu» (Mateo 28:19). Né láacabu goyonisbu. Órni Jesús goyonis diti goyoʼ ni bixú nís guicbu, xalagary ngú guidopyzobu goyoʼ lainy nís (Mateo 3:16). Ló naareʼ, órni rionis toib buñ láaca guidopyzobu non tzoʼ lainy nís.

4. ¿Xí raslooy toib buñ órni rionis?

⁴ Órni rionis toib buñ raslooybu stipnés que nigolú nainy gacbu ximig Dios né raniiny gonybu xchiin Dios (Salmo 40:7, 8). Por ngú sigory ranabdiitzlo: «¿Xí non goni par labúu tzonisa?».

5. a) ¿Xí raquiin gonylo antes de tzonislo? b) ¿Xigony nigolú rasac reunión ni rony testigos xtuny Jehová?

⁵ Antes de tzonislo, non guimbulo Jehová né Jesús.  Ma gosalólo cayonylo láani portín ma casuidylo la Biblia (bíil Juan 17:3). Per noʼra stipnés cós ni raquiin gonylo. La Biblia ná: «Guientzaayto xi ngú ni raniiny Dios» (Colosenses 1:9). Reunión ni rony testigos xtuny Jehová sacné looy guidzaklo más Jehová. Ndeʼ nac toib razón par dipa gony faltlo reunión (Hebreos 10:24, 25).

6. ¿Non ganlo guiránac ni sieed ló la Biblia par labúu tzonislo la?

⁶ Jehová diti ranabbu ganlo guiránac ni sieed ló la Biblia par labúu tzonislo. Diti golésbu que buñguieeu de gudx Etiopía ñan guirácani antes de ñonis (Hechos 8:30, 31). Dipa sasianno de sasuidyno ni ná Jehová (Eclesiastés 3:11). Per par labúu tzonislo, non guimbulo né guicacuentlo tipnés galrrasuidy ni diti nagan ni sieed ló la Biblia (Hebreos 5:12).

7. ¿Ximod ni casuidylo ló la Biblia ma gocnéni looy?

⁷ La Biblia rabexa que «pal diti napno fe, Dios diti sioladx ni gonyno» (Hebreos 11:6). Por ngú non gaplo fe par labúu tzonislo. La Biblia láaca rasetlani que tipnés buñ ni bibany gudx Corinto bicadiag xpiin Jesús né «buny crer né goyonis» (Hechos 18:8). Modcuca, ni casuidylo ló la Biblia ma gocnéni looy gaplo fe ló ni ma goniʼ Dios gony né ló xcalgoity Jesús, né naplo confianz que Dios sabeʼ lóono ló galkié né ló galgoity (Josué 23:14; Hechos 4:12; 2 Timoteo 3:16, 17).

8. ¿Xí sachiin looy guiniʼlo ni casuidylo?

⁸ Fe ni naplo sácni más nadip laʼga casuidylo ni ná la Biblia né laʼga cabiʼlo ximod cayacnéni looy.  Sachiinni looy guiniʼlo ni casuidylo (Jeremías 20:9; 2 Corintios 4:13). Per ¿chú layibu non gaibylo láani?

9, 10. a) ¿Chú layibu labúu gaibylo ni casuidylo ló la Biblia? b) ¿Xí non gonylo pal ma nainy looy guireʼlo yoʼ por yoʼ né congregación?

⁹ Labúu gaibylo xfamilo, ximiglo, xpesinlo o xcompañerlo ni rinélo scuel o ni ronynélo dxiin xi casuidylo ló la Biblia. Né galán pal ronylo ngú. Per biyopy mod buny láani né gop respet layibu. Después labúu guireʼlo yoʼ por yoʼ né herman. Órni ma rasaclo que noʼlo puext, labúu guininélo Testigo ni casuidy looy la Biblia né labúu gaibylo láabu que ma nainy guireʼlo yoʼ por yoʼ. Pal rabiʼbu que ma noʼlo puext né rasoblo ni ná la Biblia, guiropcato sadopto né chop ancianos ni noʼ lainy congregación.

¹⁰ Ló reunióncu, ancianos saniné looy par ganbu pal rienlo né raluladxlo tipnés galrrasuidy ni diti nagan ni sieed ló la Biblia, né pal rasoblo xilitz la Biblia. Láaca sabiʼyibu pal nigolú nainy looy gaclo testigo xtuny Jehová. Bisetnaladx que ancianos ran guirá herman ni noʼ lainy congregación, ladcu noʼlo. Por ngú diti guidzuibylo guininélo layibu (Hechos 20:28; 1 Pedro 5:2, 3). Órni ma bilox reunióncu, ancianos saiby looy pal ma labúu guireʼlo yoʼ por yoʼ né congregación.

11. ¿Xigony nigolú rasac guitzaʼlo mod naclo antes de guireʼlo yoʼ por yoʼ né congregación?

¹¹ Sigory ancianos saiby looy que raquiin guitzaʼlo mod naclo antes de salólo guireʼlo yoʼ por yoʼ né congregación. ¿Xigony nigolú rasac guitzaʼlo mod naclo? Órni rasaano yoʼ por yoʼ, rony representarno  Dios. Por ngú mod nabanyno non gonyxiroʼni Dios (1 Corintios 6:9, 10; Gálatas 5:19-21).

12. ¿Xigony guiráno non gac arrepentirno?

¹² Noʼra tipnés cós ni non gonylo antes de tzonislo. Apóstol Pedro goniʼ: «Colgac arrepentir né colguibiguet ronoʼ Dios par guiá xcalkiéto» (Hechos 3:19). ¿Xí radudy diitz gac arrepentir buñ? Guislooyno que rioʼobni lóono por guirá cós mal ni bunyno ló dzú ni see. Por ejemplo, pal ma bunylo galyoxh non gac arrepentirlo. ¿Né pal guirá ór ronylo xtem por gonylo xinésni ga? Ná scú non gac arrepentirlo, portín guiráno ronyno galkié né raquiinno guitudy Dios xcalkiéno scásiʼ (Romanos 3:23; 5:12).

13. ¿Xí radudy diitz guisian buñ mod nac?

¹³ ¿Nosi raquiin guioʼobni lóono por cós mal ni ma bunyno la? Yaca. Apóstol Pedro láaca goniʼ: «Colguibiguet ronoʼ Dios». Ndeʼ radudy diitz guisianlo nitisi cós mal ni bunylo ló dzú ni see né salólo gonylo xinésni. Buny pensary que seelo toib lagary ro diti rimbulo. Órni ma noʼlo ló néz, radudylo cuent que gonáslo stoib lad. ¿Xí ñonylo? Nandxichno que nasagadzulo, nabiguetlo né nayopylo néz ni riné looy lagarycu. Scúca órni rasuidylo la Biblia, radudylo cuent que noʼra tipnés cós ni raquiin guisianlo. Por ngú non guisaguelo guisianlo mod naclo né salólo gonylo xinésni.

14. ¿Xí non gonyno par gac dedicarno Dios?

¹⁴ Stoib cós ni rasac gonylo antes de tzonislo láani  ngú gac dedicarlo Dios. Órni toib buñ ma nainy gac dedicarbu Dios, ronybu toib oración a Jehová ro radudybu xtiitzbu que nosi Jehová non gony adorarbu né más sasac par láabu gonybu xchiin Dios laʼga nabanybu (Lucas 4:8).

15, 16. ¿Xigony toib buñ rac dedicar Dios?

¹⁵ Órni raibyno Jehová que nosi xchiimbu gonyno, nacni suusi órni toib buñguieeu radudy xtiitz gandxiʼ toib buñgonaʼ laʼga nabanybu. Bunysi pensary de toib buñguieeu ni noʼ xinoby. Conforma radudy dzú, buñguieeu reʼ rimbubu más xinobybu, radxin midid ronladxbu más gonaʼcu né dada nainy gonybu galtzeʼel né xinobybu. Ná nacni toib dxiin rodann, rasaguelbu racacuentbu dxiinreʼ portín nadxiʼbu xinobybu.

¹⁶ Conforma más rimbulo Jehová, ronladxlo láabu más né dada ronylo rutirigaʼlni looy par gonylo xchiimbu. Por ngú rac dedicarlo Dios. Jesús gochbu xpiimbu: «Pal noʼ ni ná guieed guicanal naʼ, ma diti guibanybu par láasibu» (Marcos 8:34). Ndeʼ radudy diitz guisobno Jehová gac nitisi gac. Né más sasac par looy gonylo ni ná Jehová xalagary gonylo ni raniiny looy (bíil 1 Pedro 4:2).

17. ¿Xigony tipnés buñ diti rac dedicaryibu Jehová?

¹⁷ Tipnés buñ diti ná gac dedicaryibu Jehová portín radzuibyibu diti gony cumpliryibu ni ma goniʼyibu. Sigory diti nainy layibu guisioʼobyibu xcalnabany Jehová. O sigory ronyibu pensary que Jehová diti sanab cuent layibu por ni yása gac dedicaryibu Dios.

18. ¿Xí sacné looy par diti guidzuibylo guichélo né guisioʼoblo xcalnabany Jehová?

 ¹⁸ Galnadxiʼ ni naplo Jehová sacnéni looy par diti guidzuibylo guichélo né guisioʼoblo xcalnabanybu. Láaca sacnébu looy gonylo rutirigaʼlni looy par gony cumplirlo ni ma goniʼlo gonylo (Eclesiastés 5:4; Colosenses 1:10). Né diti sasac naganlo gonylo xchiimbu. Apóstol Juan goniʼ: «Scareʼ non gandxiʼno Dios: guisobno ni rony mandarybu lóono, né diti nagan ni rony mandarybu lóono» (1 Juan 5:3).

19. ¿Xigony diti non guidzuibylo gac dedicarlo Jehová?

¹⁹ Diti fuerspa gacno buñ ni diti nap galkié par gac dedicarno Jehová. Láabu dipa rabésbu gonyno cós ni diti labúu gonyno (Salmo 103:14). Láaca, Jehová sacné looy gonylo xinésni (Isaías 41:10). Xomod ná la Biblia: «Láabu sony nadopbu xinéslo». Por ngú gop confianz lóo Jehová né guidopy xcalnabanylo (Proverbios 3:5, 6).

20. ¿Xí non gonylo órni ma góc dedicarlo Jehová?

²⁰ ¿Raluladxlo que ma noʼlo puext gac dedicarlo Jehová la? Órni ma góc dedicarlo Jehová, sioʼlo puext par tzonislo.

21, 22. ¿Ximod labúu guislooylo nisló stipnés buñ que naplo fe?

²¹ Góoch toib anciano ni noʼ lainy congregación xtunylo que ma góc dedicarlo Jehová né ma nainy looy tzonislo. Né tipnésyibu sadop né looy par ganyibu pal ma rienlo tipnés galrrasuidy ni diti nagan ni sieed ló la Biblia. Pal rabiʼyibu que ma noʼlo puext, saibyibu looy que ma labúu tzonislo ló samblia ni rony testigos xtuny Jehová. Ló sambliacu sioʼ  toib discurs ro guirexa xi radudy diitz tzonis buñ. Hermano ni guitudy discurscu sony chop galrranabdiitz ni diti tampa nagan a guirá ni tzonis. Órni ma cuapylo galrranabdiitz reʼ, saniʼlo nisló stipnés buñ que naplo fe (Romanos 10:10).

²² Después de ngú, sionislo. Guidopyzolo sioʼ lainy nís. Órni ma goyonislo  saslooylo guirá buñ ni dxee lagarycu que ma góc dedicarlo Dios né de goló dzúcu ma naclo testigo xtuny Jehová.

23. ¿Xí radudy diitz tzonis buñ xomod goniʼ Jesús?

²³ Jesús gochbu xpiimbu ndeʼ: «Colconis layibu ló laa Bixiosa, ló laa Xiimbu, né ló laa espíritu santo» (bíil Mateo 28:19). ¿Xí radudy diitz ndeʼ? Que racacuentno xcalmandary Jehová, que rasac par lóono xcalgoity Jesús né dxiin ni bidudy Dios láabu né que racacuentno mod raquiin Jehová espíritu santo xtuny par gony cumplirbu ni nábu (Salmo 83:18; Mateo 28:18; Gálatas 5:22, 23; 2 Pedro 1:21).

24. ¿Xigony rasac tzonislo?

²⁴ Nigolú rasac tzonislo. Órni rioʼlo lainy nís, nacni suusi «ñaitylo» ndeʼ radudy diitz que ma bisianlo cós mal ni bunylo ló dzú ni see. Né órni rareʼlo lainy nís, rasalólo ronylo xchiin Jehová. Modreʼ raslooylo que de goló dzúcu ma naclo xpiin Dios. Bisetnaladx que diti góc dedicarlo toib buñ, toib gudx o toib dxiin. Looy ma góc dedicarlo Jehová.

25. ¿Xí guisuidyno ló último capítulo?

²⁵ Ni ma góc dedicarlo Jehová sacnéni looy guidzaklo más láabu (Salmo 25:14). Per órni buñ ma goyonis diti por ngú ma bilaabu. Apóstol Pablo bicaʼ: «Colgony dxiin par guilaato» (Filipenses 2:12). Órni ma goyonislo casalólo casaalo ló néz ni tzané looy guibanylo tipzó. Per ¿xí raquiin gonylo par diti guiañ gaclo ximig Jehová? Último capítulo ni sieed ló libro reʼ rabexa galrranabdiitz reʼ.