Ló xtzú Jesús órni goloʼyibu reunión ni máspa bunyibu ngú bíilyibu cánticos, gonabyibu lóo Dios, bíilyibu né bisuidyibu la Biblia (1 Corintios 14:26). Órni looy guieedlo ro radopdo saduidylo cuent que scúca ronydo.

Racnéni lóodo portín ni rasuidydo rareʼni ló la Biblia. Guic xomal, radopdo par guicadiagdo toib discurs de 30 minut ni raslooy lóodo ximod ni sieed ló la Biblia racnéni lóodo né guiendo ximod nac ló dzú ni nabanydo. Láaca rac animar a guirá ni dxee ló reunión guiyopyibu textos ló la Biblia. Ralox discurs reʼ maca rasaló rasuidydo La Atalaya, raclani tip ór, ló reunión reʼ guirá ni dxee cú labúu guiniʼyibu xí bieenyibu ló revista La Atalaya ni cayoldo xomal cú. Ni rasuidydo raslooyni xidal mod ximod labúu guisobdo litz ni Dios raduidy ló la Biblia. Ló guidopy Gudxlio más de tigayoʼ chii mil congregación rasuidydo guiich reʼca.

Racnéni lóodo guisuidytzaydo a stipnés buñ. Lainy xomal láaca rapdo toib reunión ni radzoo tzón midid ni laa, Mod nabanyno né mod ronyno Xchiin Dios, rareʼni ló guiich ni laa, Ni non gonyno ló reunión guiich reʼ racaʼdo láani guirá beʼo. Primer midid ni rasuidydo ló reunión reʼ laa, Cós ni rasac ni sieed ló la Biblia, reʼ rarexa ni rasetlaa tipnés textos de la Biblia ni ma bíildo lainy xomal. Ni rarop midid laani, Gacno toib galán Mextra, ló midid reʼ raslooyibu lóodo ximod guininédo buñ ni ná la Biblia. Rioʼ toib herman ni ralitz lóodo pal noʼ ro racladx goldo o guinido más galán (1 Timoteo 4:13). Ni rion midid laani, Mod non guibanyno, ló midid reʼ rasuidydo ximod guisobdo guirá ni rasuidydo ló la Biblia. Ló último midid reʼ rioʼ galrranabdiitz né galrracapy ndeʼ rony que guientzaaydo ni ná la Biblia.

Órni guidoplo né lóodo, sadziguiaʼlo mod riendo la Biblia (Isaías 54:13).

• Órni looy tzélo reunión, ¿xí saduidylo cuent?

• De guirá reunión ni rapdo, ¿xí reunión raniiny looy tzélo?