Órni raniʼ buñ dioxh bandera. Testigos xtuny Jehová raluladxdo que órni buñ raniʼ dioxh bandera laʼga cayac cantar himno, nacni suusi nasanadxyibu dioxh né raslooyibu que napyibu confianz ló xcudxbu né ló buñchiin par guilaa layibu, xalagary gapyibu confianz lóo Dios (Isaías 43:11; 1 Corintios 10:14; 1 Juan 5:21). Toib buñ ni buñ bisanadx ngú góc Nabucodonosor ni buny mandary gudx Babilonia. Nabucodonosor par guislooybu que napbu galmandary né que rasanadxbu dioxh, bisaʼbu toib dioxh de or nasoʼ né buny mandarybu que guiráxadit buñ naxixip nisló dioxh ni bisaʼbu, laʼga stipnés cayony cantar toib himno. Per tzón mbioxhlas hebreos —Sadrac, Mesac né Abednego— diti gosaguelyibu nasanadxyibu dioxh reʼ, ná goyoʼ riesga ñaityibu (Daniel, capítulo 3).

Ló xtzúno, toib buñguieeu ni racaʼ historias ni laa Carlton Hayes ló xilibrobu El nacionalismo: una religión, raniʼbu «ximod rac xilanii toib gudx ló naareʼ» né nábu ndeʼ: «Bandera xtuny toib gudx rony representarni ni buñ rasanadx. [...] Buñguieeu rabeʼ xombrel guic órni radudyni; buñ racaʼ poesías ni raniʼ de láani; mbiox roʼol himnos par láani». Láaca náni que buñ ni rasanadx xcudx rony «xilaanini» —xomod lanii ni rac 16 de septiembre, Día de la Independencia de México—, láaca noʼ dzú ni rasanadxyibu «dioxh né héroes» né «templos» xtunyibu. Scúca, Diario Oficial de la Federación, de México, rasetlani que «Escudo, Bandera né Himno Nacionales, nacni ni rony Representar toib Gudx» né náni  que buñ «non guisanadx guirá ndeʼ». Né ma xidal íz, toib libro bisetlaa que «bandera né crois non guisanadx buñ láani» (The Encyclopedia Americana).

Ma ndeʼga, libro ni ma bisetlano golexani que himno xtuny stoib gudx nacni «diitz ni rasac buñ por xcudx, ló diitzreʼ buñ ranab lóo Dios conés né gan a xcudx né a buñ ni rasanir loni». Por ngú, testigos xtuny Jehová diti radudydo ló midid órni ranido que xilanii toib gudx o órni buñ raniʼ dioxh bandera né rony cantar himno, nacni ro rac adorar dioxh falz. Ló toib libro ni laa, Genio y figura del norteamericano, toib mextra ni laa D. W. Brogan bisetlaa de xidal mbiox scuel ni nac testigos xtuny Jehová ni diti gosaguel naniʼ dioxh bandera xtuny Estados Unidos né diti gosaguelyibu naniʼyibu juramento xtuny gudxcú. Goniʼbu ndeʼ: «Suprema Corte [ló xidal buelt ni bidopyibu] ma goniʼyibu que guirá lanii reʼ ni rac guirá dzú sieedni de religión».

Ná Testigos diti ronydo guirá lanii reʼ portín diti sieedni ló la Biblia. Stipnés buñ labúu gony láani pal raniiny layibu. Scúca, lóodo rapdo respet bandera portín rony representarni toib gudxrop né rasobdo buñ ni nap galmandary portín nacyibu «buñchiin» né guiráyibu nacyibu xomod ni cayony «xchiin Dios» (Romanos 13:1-4). Láaca rasobdo litz ni ná que guinabdo lóo Dios «por guirá ni rony mandary né por guirá buñchiin». Per ronydo láani par guiduidyibu lagary «guiguaʼ[do] goxtiguie né sacró ló ro cayen[do] Dios» (1 Timoteo 2:2).

Votación. Buñ ni nigolú racanal Jesús rony respetaryibu derech ni nap buñ par gony votar. Diti ronyibu campaña par guicaayibu ló buñ par diti gony votar né láaca rasobyibu buñchiin órni ma cayony mandary. Per diti rioʼyibu lad partid (Mateo 22:21; 1 Pedro 3:16). Per ¿xí láani gony toib herman pal lainy xcudxbu buñchiin rony lafuers buñ par tzee gony votar o buñ rabiʼ mal buñ ni diti rony votar? Pal xcalrriembu raduidy lagary tzeebu ronoʼ urnas, labúu gonybu láani. Modreʼ, cayonyibu xomod buny Sadrac, Mesac né  Abednego, layibu órni gosacloyibu ndeʼ, xomod ma bisetlano goyeeyibu lagary ni góc laa Dura. Per par diti guiché toib herman nisló Jehová non guisetnaladxbu xhoop litz ni guisetlano:

1. Testigos «diti [nacdo] de gudxliogoxreʼ» (Juan 15:19).

2. Lóodo rony representardo Cristo né Gobierno xtuny (Juan 18:36; 2 Corintios 5:20).

3. Guirá herman ló toibsi cós ronydo crer né napdo toibsi clas galnadxiʼ xomod ni nap Cristo (1 Corintios 1:10; Colosenses 3:14).

4. Buñ ni rony votar por toib buñchiin labúu guinino que napbu dool por ni ndeʼ gony (bibiʼ litz ni sieed ló 1 Samuel 8:5, 10-18 né 1 Timoteo 5:22).

5. Órni israelitas gonabyibu toib buñ par gony mandary layibu, Jehová nayadit bibiʼ que goleʼyibu tiplad derech ni napbu par gony Mandarybu (1 Samuel 8:7).

6. Lóodo ni racanaldo Jesús raniiny guisuidydo de Gobierno xtuny Dios a buñ de guirá clas partid sin tzoʼ ni guicaa lóodo (Mateo 24:14; 28:19, 20; Hebreos 10:35).

Dxiin ni ranab buñchiin. Noʼ gudxrop ranab a buñ ni diti ná gony xchiin militar par gony stipnés dxiinien por tidxó tiemp. ¿Xí láani gonyno pal noʼno ló galnagan reʼ? Guinabno lóo Jehová né guisuidyno ximodpa gonyno láani, sigory guinabno a toib ni nadip xfe par guilitz lóono. Modreʼ gonyno ni xcalrrienno raduidy lagary lóono (Proverbios 2:1-5; Filipenses 4:5).

Xtiitz Dios ranab guisobno «gobiernos né buñchiin» né tzoʼno puext par gonyno cós tzaay né gacno «buñ ni rioʼ ló razón» (Tito 3:1, 2). Ni ma nanno ndeʼ guinabdiitzno lóocano: «¿Pal goni ndeʼ sonyni que galsita de xcudx Jehová o saca toibsi né religión falz la?» (Miqueas 4:3, 5; 2 Corintios 6:16, 17). «¿Sac nagann par naʼ gony cumplir ni ranab Dios naʼ o sacaani naʼ par diti gony cumplir láani la?» (Mateo 28:19, 20; Efesios 6:4; Hebreos 10:24, 25.) «¿Sapa más tiemp par gony  dxiin ni ranab Jehová naʼ hasta labúu gaca ni raxal néz la?» (Hebreos 6:11, 12.)

Pal xcalrrien toib herman raduidy lagary láabu gonybu toib dxiinien ni ranab buñchiin xalagary tzeebu lachquiip, stipnés herman non gap respet ni ma goloʼbu guicbu gonybu (Romanos 14:10). Né scúca non gacni pal láabu diti nábu gonybu dxiinreʼ (1 Corintios 10:29; 2 Corintios 1:24).