1-3. a) ¿Xigony raquiin que toib buñgonaʼ guicaa cuidad xiin par gac nayaa né guieen sacró? b) ¿Xigony nainy Jehová que lóono ni rasobno láabu gacno nayaa, né xí rachiin lóono gonyno láani?

TOIB buñgonaʼ rabiʼ pal xiin noctzay xhap par guireʼ tzee toib lagary. Rabiʼbu xiimbu pal ma góos o pal nayaa nac xhap. Buñgonaʼ reʼ nantzaybu que xiimbu raquiin gac toib mbiox nayaa par diti guixoʼ. Láaca nanbu que mod nac toib mbiox raslooyni xí clas buñ nac bixiosbu né xinaʼbu.

² Jehová, Bixiosno ni noʼ guibá, nainy láabu que lóono ni nacno buñ ni rasob gacno buñ nayaa. Ló xtiitzbu la Biblia ná: «Né buñ nayaa looy saclo nayaa» (Salmo 18:26). * Jehová nadxiʼbu lóono; nanbu que pal nacno buñ nayaa  más sacnéni lóono. Láaca rabésbu que lóono ni nacno Testigos xtunybu gacno buñ nayaa par que stipnés guiniʼ cós sacró de láabu. Scú láani, mod ractzayno né mod tzaay ni nacno sonyxiroʼni Jehová né sonyxiroʼni laabu (Ezequiel 36:22; bíil 1 Pedro 2:12).

³ Nantzayno que Dios nadxiʼbu buñ nayaa, por ngú rachiinni lóono gacno buñ de clas cú. Raniiny lóono que mod nabanyno gonyxiroʼni Dios, portín nadxiʼno láabu. Láaca nainy tzodieʼno ló xcalnadxiʼbu. Por ngú, nigoreʼ guisuidyno xigony raquiin gacno buñ nayaa, xí raduidyni diitz né ximod labúu gonyno láani. Ndeʼ sacné lóono guiduidyno cuent pal cayonyno láani o yaca.

4, 5. a) ¿Xí razón ni más rasac noʼ par gacno buñ nayaa? b) ¿Ximod riendxichni ló guirá ni Jehová bisaʼ que nacbu toib Dios nayaa?

⁴ Jehová ragonés lóono de xidal mod. Toibtica mod ngú guisuʼno mod nacbu. Xtiitzbu la Biblia raiby lóono: «Colguisuʼ Dios» (Efesios 5:1). Ndeʼ nac toib razón ni más rasac por ni raniiny gacno buñ nayaa: Jehová, Dios ni rony adorarno nacbu scú, guirá ni ronybu nayaditni (bíil Levítico 11:44, 45).

⁵ Jehová nacbu toib Dios nayaa, xomodca guirá ni ronybu né mod nacbu, né ndeʼ rientzaayni ló guirá ni bisaʼbu (Romanos 1:20). Jehová bunytzaay Gudxlio par gacni toib lagary nayaa ro cués buñ. Láabu bisaʼbu Gudxlio par stipláacani guisiáni buu né guisiáni nís. Radziguiaʼno ximod Gudxlio stipláacani labúu riaani. Riendxichni que «ni Bisaʼ gudxlio» rioʼ ló galrrasaʼ que guirá cós gac nayaa (Jeremías 10:12). Scúca lóono, láaca raquiin tzoʼno ló galrrasaʼ par gacno buñ nayaa.

6, 7. ¿Ximod nayadit bisetlaa Xiley Moisés que buñ ni rasob a Jehová raquiin gacyibu nayaa?

⁶ ¿Xí stoib razón noʼ par gacno buñ nayaa? Raquiin  gacno buñ nayaa portín Jehová ni rony Mandary guibá né guidopynac Gudxlio, ranabbu que buñ ni rien láabu gac nayaa. Ley ni biduidybu gudx Israel biendxichni que galnayaa bidzaktzayni adoración. Ley reʼ bisetlaa que sumo sacerdote non ñásbu chop buelt antes de ñonybu dxiin Dzú ni Rasiá (Levítico 16:4, 23, 24). Ley reʼca goniʼ que guirá sacerdotes naguipyibu ñayibu né ñeʼyibu guirá ór antes de ninéyibu galrrascad nisló Jehová (Éxodo 30:17-21; 2 Crónicas 4:6). Láaca bisetlani setent mod ro toib buñ israelita rac buidy. Órni toib israelita rac buidy diti labúu rony adorarbu Dios, pal ñonybu láani labúu nadxin ñaitybu (Levítico 15:31). Láaca goniʼni ximod buñ ni rac buidy labúu gac nayaa stoib, ladni noʼ ñáasyibu né naguipyibu xhapyibu; pal diti ñonyibu ndeʼ, nadxin nanitlóyibu «lad congregación» (Números 19:17-20).

⁷ Ná ló naareʼ ma diti noʼno ló Xiley Moisés, láani ronyni que raduidyno cuent ximod rabiʼ Dios galnayaa. Nayadit rien que ló Ley reʼ Jehová raslooy que galnayaa nigolú raquiinni par gony adorarno láabu, né diti ma bitzaʼbu mod nac xpensarybu (Malaquías 3:6). Xomodca ló dzú ni ma godudy né ló naareʼ láabu nosi racacuentbu «adoración ni nac nayaa» (Santiago 1:27). Por ngú, galán guisuidytzayno ximod rarexa ni Jehová ranab lóono ló naareʼ.

8. ¿Xí clas galnayaa ranab Jehová gapno?

⁸ Ló la Biblia, órni rasetlani galnayaa diti nosi raduidyni diitz gac nayaa laidyno né lagary ronoʼno. Ni gacno buñ nayaa nisló Dios raduidyni diitz gacno nayaa ló guiráxadit ni cayonyno. Jehová ranab lóono gacno buñ nayaa ló tap cós: gony adorarno láabu nayaa, diti gonyno cós yox, xpensaryno gacni nayaa né gac nayaa laidyno né lagary ronoʼno. Guisuidyno xí raduidy diitz cada toib cós ni ma bisetlano.

9, 10. ¿Xí raduidy diitz gacno buñ nayaa órni gony adorarno Dios, né buñ ni racanal a Jesús xí rabeʼyibu tiplad?

 ⁹ Nayaa gony adorarno Jehová. Ndeʼ raduidy diitz diti guigotzto religión ni rony xinésni né religión falz. Israelitas órni bireʼyibu gudx Babilonia par guibiguetyibu gudx Jerusalén cuaʼyibu mandary reʼ: «¡Colguireʼ lagarycu, diti cannto cós buidy! [...] Coltzoʼ nayaa» (Isaías 52:11). Israelitas bibiguetyibu Jerusalén par gony adoraryibu Jehová stoib buelt. Por ngú, mod ñony adoraryibu Dios non ñacni nayaa né nabeʼyibu tiplad guirá cós ni diti rioladx Dios, lad guirá ndeʼ goyoʼ galrrasuidy né costumbres xtuny religión de gudx Babilonia.

¹⁰ Ló naareʼ, lóono ni rasobno Jehová non gapno cuidad diti gac buidyno né religión falz (bíil 1 Corintios 10:21). Xcalrrasuidy religión falz noʼni ló guidopynac Gudxlio né pal diti racaano cuidad labúu gony buidyni lóono. Ló xidal gudxrop noʼ costumbres, cós ni ronyibu radzakni né religión falz xomod galrrasuidy ni ná que alma diti raity (Eclesiastés 9:5, 6, 10). Buñ ni racanal Jesús rabeʼyibu tiplad guirá costumbres falz reʼ. * Diti guiduidyno lagary que ni raiby stipnés buñ lóono gony que ma diti guisobno ni ná la Biblia né ma diti gony adorarno Dios de toib mod nayaa (Hechos 5:29).

11. ¿Xí raduidy diitz gacno buñ nayaa nisló Dios, né xigony nigolú rasacni?

¹¹ Gacno nayaa par diti gonyno cós yox. Ndeʼ raduidy diitz diti gonyno galyoxh (bíil Efesios 5:5). Nigolú rasac diti gonyno cós yox par gacno buñ nayaa. Xomod guisuidyno ló capítulo ni sietra, par tzodieʼno ló xcalnadxiʼ Dios raquiin cueʼno «galyoxh tiplad». Portín buñ ni rony galyoxh né diti rac arrepentir «diti sioʼyibu lainy Gobierno xtuny Dios» (1 Corintios 6:9, 10, 18). Nisló Jehová nacyibu  «buñ ni raduidy yoʼob stipnés por cós dzab» ni ronyibu né pal diti racyibu buñ nayaa, xalagaryibu «gac [...] ni rarop galgoity» (Revelación 21:8).

12, 13. ¿Ximod radzak xpensaryno né ni ronyno, né ximod labúu gapno pensary nayaa?

¹² Xpensaryno gacni nayaa. Guirá ni noʼ guicno rachiinni lóono gonyno láani. Pal raduidyno lagary tzoʼ pensary mal lainy bichoguicno né lainy xcalnabanyno sadxin midid sonyno cós buidy ni cayonyno pensary (Mateo 5:28; 15:18-20). Per pal ragoʼno lainy xpensaryno cós nayaa né natzaay ndeʼ sony que gonyno cós tzaay (bíil Filipenses 4:8). ¿Ximod labúu gac xpensaryno nayaa? Primer raquiin cueʼno tiplad nitisi galnakit ni labúu gony buidy xpensaryno. * Né ni rarop non coʼno ló xpensaryno pór cós nayaa, labúu gonyno láani pal rolno Xtiitz Dios guirá dzú (Salmo 19:8, 9).

¹³ Par tzodieʼno ló xcalnadxiʼ Dios, nigolú raquiin gacno nayaa órni guienno láabu, diti gonyno cós yox, xpensaryno gacni nayaa né gacno nayaa ló nitisi cós ni gonyno. Guionca cós ni ma bisetlano sasuidyno láani ló stipnés capítulos ni sieed ló libro reʼ. Per nigoreʼ nosi guisuidytzayno ximod gac nayaa laidyno né lagary ronoʼno.

14. Ni gacno nayaa, ¿stipnés diti non tzoʼ ló galrrasaʼ la?

¹⁴ Nigolú rasac que lóono né guirá cós ni napno gacni nayaa. Ni gacno nayaa, ¿stipnés diti non tzoʼ ló galrrasaʼ la? Yaca, diti nacni scú. Xomod ma bisuidyno, Jehová ranab lóono gacno buñ nayaa diti nosi par tzeeni lóono galán, láaca portín mod rabiʼ buñ lóono scú sabiʼyibu Dios. Guisetnaladxno mbiox ni bisetlano ló párrafo toib: pal  ñacbu toib mbiox buidy ni diti ractzay, ñonyno pensary que scúca nac bixiosbu né xinaʼbu. Scúca, pal mod nacno diti rienni sacró, láaca sasianno mal Bixiosno ni noʼ guibá, né stipnés buñ labúu guiniʼ mal ni rasuidyno. Non guisetnaladxno diitz ni ná: «Diti cayonyno xitcal par guirel ñeʼ buñ, par diti tzoʼ ni guiniʼ mal de dxiin ni cayonyno; xalagary ngú, raslooyno que nacno ni rony xchiin Dios» (2 Corintios 6:3, 4). Guisuidyno nigoreʼ pu lagary raquiin gacno buñ nayaa.

15, 16. ¿Xí láani non gonyno par guienni que nacno buñ nayaa, né xí clas lairy non guacno?

¹⁵ Laidyno gacni nayaa né mod ractzayno láaca gacni nayaa. Ná costumbre ni nap toib gudx gadzé mod nacni de stipnés gudx, guirá lagary noʼ siil nís né noʼ xoboo par gáas buñ guirá dzú né par guicaano cuidad que lóono  né xiinno gacno buñ nayaa. Pal napno costumbre guieer ñano né nís né xoboo órni guáno guet o gonytzaayno galrro, né después ni tzoʼno coraa o guitzaʼno xhap badaʼ. Ndeʼ labúu gony que diti guixoʼno né gaityno. Láaca sacnéni par diti tzogoluʼ bacterias né virus ni rony que buñ raxoné galrradudy. Lagary ro yadi drenaje labúu guicach buñ xcuʼ xomod buny gudx Israel láani (Deuteronomio 23:12, 13).

¹⁶ Láaca raquiin guieer xhapno guirá ór. Diti fuerspa raquiin gacni lairy nigolú car né lairy copy ni pénsa careʼ, xalagary ngú raquiin gacni lairy sacró, lairy nayaa né coʼno xcalrrienno órni gactzayno (bíil 1 Timoteo 2:9, 10). Guirá ór né rotísi lagary ro tzoʼno mod ractzayno raquiin guienni sacroyen, modreʼ sonyni que «xcalrrasuidy Dios ni Ralaa lóono guienni mózdiguieʼ» né gonyxiroʼni láabu (Tito 2:10).

17. ¿Xigony lidxno né stipnés cós ni napno non guienni sacró?

¹⁷ Yoʼ ro rabésno né stipnés cós ni napno non gacni nayaa. Lidxno non gacni nayaa né guienni sacró, ná pal nacno buñ ric o yaca. Scúca pal napno camión ni rinéno reunión né ni rinéno órni rasuidyno stipnés buñ, raquiin gacni nayaa nislainy né nixitzni. Diti guialadxno que toib yoʼ nayaa o cós ni napno raslooyni xí clas buñ nacno. Ni lóono rasuidyno a stipnés buñ ngú que Jehová nac toib Dios nayaa, láabu guinitlóbu «guirá ni caxin gudxlio» né guiquimbu Gobierno xtunybu par gonybu Gudxlio reʼ toib lagary móz (Revelación 11:18; Lucas 23:43). Por ngú, mod racaano cuidad lidxno né stipnés cós ni napno guislooyni que napno costumbre gacno buñ nayaa xomod buñ ni guibany ló Gudxlio móz.

18. ¿Ximod raslooyno que napno respet Lagary ro radopno?

¹⁸ Lagary ro radopno. Por ni nadxiʼno Jehová, rachiinni lóono gapno respet Lagary ro rony adorarno láabu. Órni stipnés buñ radop né lóono, raniiny lóono que guiniʼyibu  sacró de lagary ro ronyno xireunionno. Raquiin guisiáno né gonytzaayno láani par guienni sacró né stipnés buñ guioladx láani. Raslooyno respet Lagary ro radopno pal ronyno rutirigaʼlni lóono par guicaano cuidad láani. Toib privilegio nacni par lóono gacnéno gac «reglar» Lagary ro radopno (2 Crónicas 34:10). Scúca non gonyno órni tzoʼno Lagary ro rac samblia.

19. ¿Xí raquiin cueʼno tiplad par gacno buñ nayaa, né ximod ragonés la Biblia lóono?

¹⁹ Par gacno buñ nayaa, raquiin cueʼno tiplad guirá cós ni rony buidy laidyno xomod gues, galrrasoch né remeidy ni doctor diti ma biduidy lóono ni rony que ma digaldi guisianno láani o cós ni rasnit xcalrrienno. La Biblia diti raloyñatzay laa guirá cós buidy né costumbre buidy ni noʼ ló naareʼ, per sitnéni litz ni labúu gacné lóono guiduidyno cuent ximod rabiʼ Jehová láani. Guisuidyno nigoreʼ gáay litz ni non guisobno por ni nadxiʼno Dios né ndeʼ sacné lóono tzodieʼno ló xcalnadxiʼbu.

20, 21. ¿Xí cós rioladx Jehová cueʼno tiplad, né xí razón ni más rasac noʼ par gonyno láani?

²⁰ «Por ngú, ni napno promesas reʼ, lóoto ni nadxiʼya, gac nayaano de guirá ni rony buidy beʼel laidyno né ni rony buidy espíritu, por ni radzuibyno Dios gac nayaditno.» (2 Corintios 7:1.) Jehová raniiny cueʼno guirá cós ni rony buidy lóono né ni rony buidy espíritu xtunyno ndeʼ raduidy diitz guirá ni noʼ ló xpensaryno. Por ngú non cueʼno tiplad guirá cós ni ma diti labúu rasianno ni rony mal lóono né rony mal xpensaryno.

²¹ La Biblia raduidy toib razón ni rasacgoluʼ par gac nayaano «de guirá ni rony buidy» lóono. Guibiʼno ximod 2 Corintios 7:1 rasaló raniʼni: «Por ngú, ni napno promesas reʼ». ¿Xí promesas rasetlani? Xomod sieed ló versículos ro Jehová raduidy xtiitz: «Naʼ sacacuent lóoto. Né naʼ saca  bixiosto» (2 Corintios 6:17, 18). ¡Gonysino pensary! Jehová raduidy xtiitz gandxiʼdot lóono xomod toib buñguieeu randxiʼdot xiin. Per Jehová raduidy xtiitz gony ndeʼ, nosi pal rabeʼno tiplad «guirá ni rony buidy beʼel laidyno né ni rony buidy espíritu». Nigolú ngaʼal ñacno pal por ni diti nainy lóono guisianno guirá cós ni nac buidy nisló Jehová nasnitno privilegio ni napno ni guibigaxno láabu.

22-25. ¿Xí litz ni sieed ló la Biblia labúu gacné lóono par diti tzaguiabno ló nitisi cós ni rastoʼby lóono?

²² «Non gandxiʼlo Jehová, Dios xtunylo né guidopy xcalnabanylo né guidopynaclo né guidopy xpensarylo.» (Mateo 22:37.) Jesús bisetlaa que mandary reʼ rasacni más que stipnés mandary ni noʼ (Mateo 22:38). Gandxiʼno Jehová né guidopy xcalnabanyno, guidopynacno né guidopy xpensaryno. Por ngú, raquiin cueʼno tiplad nitisi cós ni labúu guigaity lóono naguel né guisnit xpensaryno ni biscad Jehová lóono.

²³ «[Jehová] ronybu que buñ guibany né raduidybu buu buñ né guiráxadit cós.» (Hechos 17:24, 25.) Ni lóono nabanyno nacni toib galrrascad xtuny Dios, né por ngú raniiny guislooyno respet por galrrascad reʼ. Non cueʼno tiplad nitisi cós ni gony que guixoʼno. Pal diti ronyno láani saslooyno que diti napno respet vida ni Jehová biscad lóono (Salmo 36:9).

²⁴ «Naplo xí de gandxiʼlo saʼlo xomodca looy.» (Mateo 22:39.) Xidal ór buñ ni nap costumbre de coʼ laidy nitisi cós ni rony mal láabu, rastoʼbybu láacabu, né láaca buñ ni ragoo láabu. Órni toib buñ ragob gues, goʼox reʼ ronyni mal stipnés buñ. Buñ ni rony ndeʼ diti casobbu mandary xtuny Dios ni ná que gandxiʼno saʼno né raslooybu que diti nadxiʼbu Dios (1 Juan 4:20, 21).

²⁵ «Góoch layibu guirá ór que tzoʼyibu xan xomandary né guisobyibu gobiernos né buñchiin.» (Tito 3:1.) Ló xidal gudxrop gobiernos diti raduidy lagary gap buñ o cob buñ  guix xomod mariguan. Por ngú lóono ni rasobno Jehová diti ronyno láani (Romanos 13:1).

26. a) ¿Xí non gonyno par tzodieʼno ló xcalnadxiʼ Dios? b) ¿Xigony más galán gacno buñ nayaa nisló Dios?

²⁶ Par tzodieʼno ló xcalnadxiʼ Dios, diti nosi raquiin gacno nayaa ló chopsi cós ni ma bisetlano, láaca raquiin gacno nayaa ló guirá ni ronyno laʼga nabanyno. Nandxichno que sac nagann par lóono guisianno mod gócno né cueʼno tiplad guirá cós ni rony buidy lóono, per labúu sonyno gan láani. * ¡Diti noʼ stoib cós más galán que guibanyno nayaa! Pal Jehová canab láani lóono, nacni par tzoʼno galán (bíil Isaías 48:17). Ndeʼ rony que rasacno sacró guislooyno que rony adorarno Jehová, Dios ni nadxiʼgoluno né ni nadxiʼgolu lóono.