Par guirá buñ ni nadxiʼ a Jehová:

Jesús goniʼ ndeʼ: «Lóoto simbuto ni nigolú, ne ni nigolú salaa lóoto» (Juan 8:32). ¡Diitzreʼ nigolú racnéni lóono! Scú láani, labúu guimbuno ni nigolú, ná nabanyno «ló dzú ni ma guidubylagaʼ» ro nogoluʼ galrrascú (2 Timoteo 3:1). ¿Rasetnaladxno ximod nigolú bibaladxno órni bisuidyno ni nigolú ló Xtiitz Dios la? ¡Nigolú gosacno sacró!

Rasacgoluʼ guimbutzaayno ni nigolú né guisuidyno láani a stipnés, láaca rasac guibanyno mod casuidyno. Par gonyno ngú, raquiin tzodieʼno ló xcalnadxiʼ Dios. ¿Ximod labúu gonyno láani? Jesús cuapy galrranabdiitz reʼ gueʼel órni ma yaaca gaitybu. Láabu gochbu xpiimbu: «Pal rasobto ni roni mandary lóoto, siodieʼto ló xcalnadxiʼya, xomod naʼ ma bisobba ni rony mandary Bixiosa né nodieʼya ló xcalnadxiʼbu» (Juan 15:10).

Guiduidysino cuent, Jesús goyodieʼ ló xcalnadxiʼ Dios por ni bisobbu Bixiosbu. Né scúca non gonyno ló naareʼ. Par tzodieʼno ló xcalnadxiʼ Dios non guisobno Jehová laʼga nabanyno. Gueʼel cuca Jesús goniʼ: «Pal nanto cós reʼ, dichós lóoto pal ronyto láani» (Juan 13:17).

Né guidopy xcalnabanydo rabésdo que libro reʼ gacné lóono gonyno xinésni né «tzodieʼto ló xcalnadxiʼ Dios né [...] guibanyto tipzó» (Judas 21).