1, 2. ¿Xí láani coʼno guicno órni gonyno toib galnakit?

BUNY xpensarylo que mápa mer guálaylo laidy toib cuánnax né ór cú rabiʼlo que cueʼni nayotz. ¿Xí láani gonylo? Noʼ tzón cós ni labúu gonylo: guálo guidopynacni ná nayotzni, guisapylo guidopyni o nosi cueʼlo ro nayotz par guálo ro natzaay. ¿Xí tzón cós reʼ gonylo?

² Galnakit ni gudxliogoxreʼ raduidy lóono nacni xomod cuánnax reʼ. Órni rabiʼtzayno láani raduidyno cuent que mod nacni nayotzni nisló Dios. ¿Xí láani gonyno ór cú? Tipnés buñ «ragaiby» guirácani né diti rabiʼ pal natzayni o nayotzni. Stipnés diti roo ni tiplaʼ par diti gonyni mal layibu. Per noʼ buñ rabeʼ tiplad galnakit ni diti tampa natzaay né nosi ronyibu galnakit ni natzaay. Por ngú, ¿xí láani gonyno par labúu tzodieʼno ló xcalnadxiʼ Dios?

3. ¿Xí guisuidyno nigoreʼ?

³ Xidalno rabeʼno tiplad galnakit ni diti tampa natzaay né nosi ronyno galnakit ni natzaay. Nantzayno que napno xi de tzoʼ nakitno, per nosi ronyno galnakit ni diti rony mal lóono. Par labúu gonyno ndeʼ raquiin ganno xí ngú cós tzaay né xí ngú cós mal. Per antes de guisuidyno ximod cuuno galnakit natzaay, guisuidyno ximod ndeʼ raguiñani dxiin ni ronyno par Jehová.

4. Ni ma góc dedicarno Dios, ¿ximod racnéni lóono guiyopytzayno galnakit?

⁴ Toib Testigo ni goyonis ló íz 1946, ma ndeʼga goniʼbu: «Napa costumbre diti guisnita ni toib discurs ni rioʼ órni rionis buñ né racadiagtzay láani, como si naʼ tzonisa». ¿Xigony ronybu ndeʼ? Láacabu rabexabu láani, «ni naʼ guisetnaladxi que góc dedicar a Jehová racnégoluʼni naʼ par diti guisiana láabu». Lóono láaca rasacno xomod hermano reʼ, par diti guisianno Jehová nigolú rasac guisetnaladxno ni ma gonino dzú góc dedicarno láabu. Gonino que guibanyno par gonyno xchiimbu (bíil Eclesiastés 5:4). Scú láani, ndeʼ raguiñani dxiin ni ronyno par Dios. Per láaca raguiñani stipnés cós ni ronyno laʼga nabanyno, xomod órni raguaʼno nakit. Modreʼ goniʼ Pablo órni bicaʼbu guiich ló hermanos ni goyoʼ ló xtzúbu: «Ná pal cayóto o cayeʼto, o cayonyto nitisi cós, colgony guirá cós par gonyxiroʼto Dios» (1 Corintios 10:31).

5. ¿Ximod racné Levítico 22:18-20 lóono guientzaayno diitz ni sieed ló Romanos 12:1?

⁵ Xomod rabiʼno, guirá ni ronyno laʼga nabanyno raguiñani mod rony adorarno Jehová. Ló  guiich ni bicaʼ Pablo ni bidxin lainy xcalnabany hermanos ni goyoʼ gudx Roma, bisetlabu: «Gony presentarto laidyto xomod sacrificio ni nabany, nayaa, ni guicacuent Dios, coʼto xcalrriento órni gonyto dxiinreʼ ni rasacgoluʼ» (Romanos 12:1). Órni Pablo bisetlaa «laidyto» láaca raguiñani pensary, galnabany, né galnadip. Guirá ndeʼ raquiinno láani par gonyno xchiin Dios (Marcos 12:30). Pablo goniʼ de dxiin ni ronyno par Jehová né guidopy galnabany. Diitz «sacrificio» raslooyni que gapno cuidad órni gonyno láani. ¿Xigony? Portín Xiley Moisés diti biduidyni lagary que buñ nascad a Dios nimal ni naguitz; Dios diti cuacuent nimal de clas reʼ (Levítico 22:18-20). Scúca, pal toib herman diti xinésni cayony adorarbu Jehová, Láabu diti sacacuentbu galrrascad reʼ. Per ¿ximod nasaclono ndeʼ?

6, 7. Toib herman, ¿ximod labúu ñony buidybu guidopynac laidybu, né balaati naguiixbu ni ñonybu ndeʼ?

⁶ Pablo gochbu hermanos de Roma: «Diti guiduidyto lagary gonysa mandary galkié lóoto» (o xomod ná stoib Biblia ni laa, La Palabra de Dios para Todos «ni tiplaʼyen laidyto »). Scúca Pablo góoch layibu: «[Colguigaity] cós ni rony laidyto» (Romanos 6:12-14; 8:13). Láabu goniʼbu ximod tipnés buñ biquiin laidy par gony cós mal. Pablo goniʼ ndeʼ: «Roʼyibu pórsi cós mal» rareʼ. «Ñeʼyibu rac naguel par guixuʼ runy.» «Diti noʼ galnadzuʼpy xtuny Dios nisló bisalóyibu.» (Romanos 3:13-18.) Toib herman labúu naquiin laidy par ñony galkié, né modreʼ ñony buidybu guidopynac laidybu. Por ngú pal toib herman nompa nabiʼ cós yox, xomod pornografía, né galrradíil ro raxú runy, caduidybu «lagary gonysa mandary galkié» bisalóbu, né scá cayony buidybu guidopynac laidybu. Ma diti labúu ñonycuentbu  láacabu Dios xomod toib galrrascad ni nayaa, portín diti cayony adorarbu Jehová de toib mod nayaa (Deuteronomio 15:21; 1 Pedro 1:14-16; 2 Pedro 3:11). ¡Por xtol galnakit ni nayotz, naguiixbu nigolú car!

⁷ Rientzaayno que galnakit ni ronyno labúu tzanéni lóono gonyno cós mal o cós tzaay. Scú láani, raniiny lóono que galnakit ni gonyno diti guixinni galrrascad ni raduidyno Dios, xalagary ngú gonyni que galrrascad cú guisac más nisló Dios. Guisuidyno nigoreʼ ximod ganno pal toib galnakit natzayni o nayotzni.

8, 9. a) ¿Xí chop clas galnakit noʼ? b) ¿Xí galnakit rabeʼno tiplad, né xigony?

⁸ Chopsi clas galnakit noʼ par herman: galnakit ni diti non gonybu, né galnakit ni labúu gonybu pal xcalrriembu raduidy lagary láabu. Ni primer guisuidyno nigoreʼ láani ngú: galnakit ni diti non gony buñ ni rasob Dios.

⁹ Xomod ma bisuidyno ló primer capítulo de libro reʼ, noʼ galnakit ni rabeʼ loguiaʼ pensary né cós ni la Biblia rianladx, xomod ni rareʼ ló televisión, ni sieed ló Internet, películas né canción. Ni ma bisetlano rabeʼ loguiaʼni o ronyni que buñ gony cós yox, galrradíil ro raxú runy, galchiser né pornografía. ¿Xí gonyno órni tzoʼ galnakit ni rabeʼ loguiaʼ cós ni xiley né xilitz la Biblia rianladx? Non cueʼno láani tiplad (Hechos 15:28, 29; 1 Corintios 6:9, 10; Revelación 21:8). Modreʼ guislooyno a Jehová que nigolú rasac par lóono chop cós ni rony mandarybu gonyno: «Colguianladx cós mal» né «Birestzoo de cós mal». Láaca pal rasobno  ndeʼ raslooyno que napno «fe ni rareʼ desde lainy galnabany» (Romanos 12:9; Salmo 34:14; 1 Timoteo 1:5).

10. ¿Ximod rony pensary tipnés buñ, né xigony rioʼyibu ló riesga órni nac xpensaryibu scú?

¹⁰ Noʼ buñ ná que diti mal láani guibiʼbu cós yox ni riendxich que la Biblia rianladx. Layibu raniʼyibu: «Diti láacani ngú guibiʼ buñ láani ló televisión, que gony buñ láani». Per buñ ni nac xpensary modreʼ rascúbu láacabu né modreʼ rioʼyibu ló riesga (bíil Jeremías 17:9). Pal nigolú rioladxno guibiʼno ni Jehová rianladx, ¿labúu guinino que rianladxno cós mal la? Órni guirási ór rabiʼno cós mal xcalrrienno raxinni, ndeʼ labúu gony que tzaguiabno ló galkié o ma diti guibiʼno mal cós yox ni rony stipnés buñ (Salmo 119:70; 1 Timoteo 4:1, 2).

11. ¿Ximod diitz ni sieed ló Gálatas 6:7 rac cumplirni órni ronyno galnakit?

¹¹ Ndeʼ ni merpa gosaclóo tipnés herman. Guirási ór bibiʼyibu galyoxh né ndeʼ buny que biabyibu loni. Mális bunyibu láani bisuidyibu que «nitisi cós ni buñ cadxiʼp, láaca satopbu xcaani» (Gálatas 6:7). Per lóono diti noʼ xi portín guisaclono cós mal ni ma gosacloyibu. Pal ronyno por coʼno lainy xpensaryno cós tzaay, pór cós tzaay sonyno pensary (bibiʼ cuadriyen ni ná « ¿Xí clas galnakit non goni?», ni sieed ló página 67).

12. ¿Ximod gonyno ni ná Gálatas 6:5 órni gonyno toib galnakit, né pu guidzelno galrracné par gonyno toib cós galán?

¹² Guinino nigoreʼ ni rarop clas galnakit ni diti sieed ló la Biblia ni labúu gonyno o yaca. Órni nacni modreʼ, cada toib non guibiʼ pal sacnéni láabu o yaca (bíil Gálatas 6:5). Per diti nosi xcalrrienno labúu conés lóono.  Láaca noʼ stoib cós ni labúu gacné lóono cuuno galnakit. Scú láani, napno xilitz la Biblia, guirá litz reʼ raslooyni lóono mod nac xpensary Jehová. Por ngú, pal rasuidytzayno láani saduidyno cuent «xí ngú ni raniiny Jehová gony» ló guirá cós ni gonyno laʼga nabanyno né órni rioʼno ló galnakit (Efesios 5:17).

13. ¿Xí láani sacné lóono cueʼno tiplad nitisi galnakit ni Jehová rianladx?

¹³ Rientzaayni, diti guirá herman toibsi mod rabiʼ  galnakit (Filipenses 1:9). Láaca, cada herman rioladx gony toib cós órni rony toib galnakit. Por ngú, diti labúu cuésno que guiráyibu gonyibu toibsi cós. Per ná diti toibsi mod nac xpensaryno rasac gonyno pensary ló xilitz Dios né guiduidyno lagary que conésni xpensaryno né xcalnabanyno. Modreʼ dzúna dzú sabeʼno tiplad nitisi galnakit ni Jehová rianladx (Salmo 119:11, 129; 1 Pedro 2:16).

14. a) ¿Xí láani non guicaano cuidad órni gonyno toib galnakit? b) ¿Xí sacné lóono par coʼno primer lagary Gobierno xtuny Dios?

¹⁴ Nigolú, raquiin guinabdiitzno lóocano xi clas galnakit cayonyno, portín ndeʼ saslooy ximod rabiʼno cós tzaay né cós mal. Per diti ngúsi, láaca raquiin guicaano cuidad ndeʼ: balaati tiemp rasnitno ló galnakit. ¿Xigony? Portín modreʼ sanno pal galnakit nigolú rasacni más par lóono. Diti guialadxno que par toib cristiano cós ni más guisac par láabu ngú guiniʼbu de Gobierno xtuny Dios (bíil Mateo 6:33). ¿Xí sacné lóono coʼno primer lagary láani? Guicanalno litz ni goniʼ Pablo: «Colguicaatzay cuidad que mod rasaato diti gacni xomod buñ ngaʼal, sino xomod buñ ni noʼ xcalrrien, colguiquiin xtiempto galán» (Efesios 5:15, 16). Pal racaʼno ló toib guiich balaati tiemp guiquiinno par toib galnakit ndeʼ sacné lóono gapno más tiemp par cós «ni más rasac», cós ni racné lóono guibigaxno Jehová (Filipenses 1:10).

15. ¿Xí más non gonyno órni gonyno toib galnakit?

¹⁵ Órni guiyopyno toib galnakit láaca galán gonyno stoib cós. ¿Xí láani? Guisetnaladxno cuánnax ni ma bisetlano ló párrafo toib. Par gandxichno que diti cayóno cuánnax ni nayotz, diti nosi rabeʼno ro nayotz cú láaca rabeʼno tiplaʼ ni natzaay ni caa roloo ni nayotz. Lóono rabeʼno tiplad guirá galnakit ni xilitz la Biblia  rianladx; per láaca naní guicno órni rabeʼno tiplad nitisi cós ni moda rabiʼno que diti natzaay o rabiʼno que sonyni mal ni radzakno Jehová (Proverbios 4:25-27). Ni gacné lóono ngú, guisobno guiráxadit xilitz la Biblia.

16. a) ¿Ximod raslooytzayno que ronyno pensary mod nac xpensary Jehová? b) ¿Xí láani gonyno dzúna dzú laʼga nabanyno?

¹⁶ Órni rabúno galnakit ni nainy gonyno, ni nirdiguié coʼno cuent ngú mod nac xpensary Jehová. La Biblia raniʼ xi láani rasac Jehová né xi rony mandarybu. Guisuidyno diitz ni bicaʼ Salomón de cós ni Jehová rianladx. Ladni noʼ «loch buñ ni raniʼ pór galrrascú, né ña buñ ni raxú xiruny buñ ni diti nap dool, toib galnabany ni rasaʼ cós mal, ñeʼ buñ ni raxony par gony cós mal» (Proverbios 6:16-19). Órni lóono ma nanno mod nac xpensary Jehová, ¿xí láani gonyno? Salmista rabexa láani scareʼ: «Lóoto ni nadxiʼto Jehová, colguianladx cós mal» (Salmo 97:10). Por ngú, galnakit ni gonyno guislooyni que rianladxno guirá ni Jehová rianladx (Gálatas 5:19-21). Né non gonyno láani pal noʼno nisló stipnés buñ o noʼno toibno, ór cú más rientzaayni xi clas buñ nacno (Salmo 11:4; 16:8). ¿Raniiny lóono né guidopy xcalnabanyno guibanyno mod rioladx Jehová la? Pal scú láani, guirási ór sasetnaladxno xilitz  la Biblia órni coʼno guicno gonyno toib cós. Por ngú, dzúna dzú laʼga nabanyno gonyno láani (2 Corintios 3:18).

17. Antes de gonyno toib galnakit, ¿xí non guinabdiitzno lóocano?

¹⁷ ¿Xí más non gonyno par ganno pal toib galnakit rioladx Jehová láani? Guinabdiitzno lóocano: «¿Ximod raguiñani naʼ né ni radzaʼga Dios?». Guislooyno láani modreʼ, antes de guibiʼno toib película non guinabdiitzno lóocano: «¿Xí guisac xcalrriena órni guibiʼya película reʼ?». Guisuidyno xidal litz ni guiquiinno órni guicalóno galnagan reʼ.

18, 19. a) ¿Ximod racné lóono litz ni sieed ló Filipenses 4:8 par guiyopyno galnakit ni natzaay? b) ¿Xí stipnés litz labúu gacné lóono? (Bibiʼ ñeʼ guiich.)

¹⁸ Toib litz ni más rasac ngú ni sieed ló Filipenses 4:8 ni ná: «Guirá cós ni nigolú, guirá ni raquiin guicaʼ respet, guirá ni nac xinésni, guirá ni nac nayaa, guirá ni nap galrronladx, guirá ni galán guisetlaa buñ, nitisi mod galán ni napto né nitisi cós ni labúu gonyxiroʼ buñ, diti guisianto gonyto láani». Órni Pablo goniʼ diitzreʼ diti goniʼbu de galnakit, xalagary ngú goniʼbu ni raquiin gonyno pensary, láani ngú ló cós ni rioladx Dios (Salmo 19:14). Per diitzreʼ láaca raguiñani órni guinino de galnakit. ¿Ximod?

¹⁹ Gonabdiitz looyca: «¿Película ni rabiʼya, videojuegos, canción o stipnés cós ragoʼni cós nayaa lainy bichoguica la?». Órni ralox rabiʼno toib película, gonyno pensary xí cós riaʼan lainy bichoguicno. Pal rasetnaladxno cós natzaay ni nayaa ni racné lóono nacni portín golúno toib película sacró. Per pal lainy xpensaryno rieed pór cós buidy nacni portín diti golúno sacró (Mateo 12:33; Marcos 7:20-23). ¿Ximod rony mal lóono pal pór cós yox ronyno pensary? Ronyni que ma  diti raguaʼno goxt, raxinni xcalrrienno né láaca raxinni mod radzakno Dios (Efesios 5:5; 1 Timoteo 1:5, 19). Guirá galnakit nayotz reʼ ronyni mal buñ por ngú non cueʼno láani tiplad (Romanos 12:2). * Nainy gacno xomod salmista ni gonab lóo Jehová: «Buny que bisalóya tudyni delant par diti guibiʼni cós ni diti raquiin» (Salmo 119:37).

20, 21. ¿Ximod labúu guisobno litz ni sieed ló 1 Corintios 10:23, 24 órni gonyno toib galnakit?

²⁰ Pablo rasetlaa stoib litz ni non guisetnaladxno órni coʼno guicno gonyno toib cós. Láabu goniʼbu: «Guirá cós labúu gacni, per diti guirá cós natzaayni. Guirá cós labúu gacni, per diti guirá cós ṟacnéni. Que ni toib buñ guiyopy ni gacné láasibu, xalagary ngú guiyopybu ni racné a stoib buñ» (1 Corintios 10:23, 24). ¿Xí láani sacné lóono guisobno litz reʼ órni cayopyno galnakit natzaay? Guinabdiitzno lóono: «¿Ximod guibiʼ stipnés buñ galnakit ni naʼ golúya?».

²¹ Sigory xcalrrienno raduidy lagary «gacni», o gonyno láani. Per pal rabiʼno que stipnés herman ni diti tampa nadip xcalrrien diti ronybu pensary xomod lóono, sigory sayopyno stipnés galnakit. ¿Xigony? Portín diti nainy lóono gacno toib yac ni guirel ñeʼbu laʼga cayonybu xchiin Dios. Pal ñonyno láani ñacni suusi cachéno «contra [xhermanno]» né xomod goniʼ Pablo láaca cachéno «contra Cristo». Nigolú raquiin guicaatzayno cuidad diitzreʼ: «Diti guichelto ñeʼ» stipnés buñ  (1 Corintios 8:12; 10:32). Lóono ni nigolú racanalno Jesús, diti ronyno galnakit ná nanno que labúu «gacni», per diti «racnéni» xhermanno. Modreʼ rasobno litz galán ni biduidy Pablo lóono né galrronladx (Romanos 14:1; 15:1).

22. ¿Xigony non gapno respet mod nac xpensary stipnés xhermanno?

²² Per pal nacno buñ ni diti tampa nadip xcalrrien non tzoʼno ló galrrasaʼ por xhermanno diti por lóosino. Pal ronyno scú, diti nadip gac xtiitzno que stipnés herman gony galnakit ni rioladxno. Pal xpensaryno ñacni scareʼ, ñacni suusi nabésno que guiránac camión ni see ló carreter toibsi midid naxonyni xomod nainy lóono. Por ngú, pal stipnés herman rony galnakit ni diti rioladxno gonyno, per xilitz la Biblia diti rabiʼ mal láani, ¿xí láani gonyno? Por galnadxiʼ sapno respet ni nainy gonyibu. Modreʼ, «guirá buñgudxlio» labúu guibiʼ que nacno buñ ni rioʼ ló diitz (Filipenses 4:5; Eclesiastés 7:16).

23. ¿Xí láani non gonyno par guiyopyno galnakit ni natzaay?

²³ Ló tidxósi diitz, ¿xí láani non gonyno par guiyopyno galnakit ni natzaay? Ni primer gonyno ngú guicaano cuidad pal napni cós yox ni la Biblia rianladx; modreʼ sabeʼno láani tiplad. Né órni nainy gonyno toib galnakit per la Biblia diti raniʼ xitcal de láani, non guisuidytzayno xi ná xilitz la Biblia. Láaca sabeʼno tiplad guiráxadit ni labúu gony mal xcalrrienno né sioʼno puext guisianno de gonyno ni rioladxno par diti gonynano xcalrrien stipnés buñ, né máspa pal nacyibu xhermanno. Pal ronyno por guiyopyno galnakit ni natzaay sonyxiroʼno Dios né siodieʼno ló xcalnadxiʼbu, lóono né guiráca xfamilno.