Jehová ranab lóono gapno «galnadxiʼ ni diti raché né ni diti radudy xtzú» (Miqueas 6:8). Ndeʼ nigolú rasac lainy galtzeʼel, portín pal diti noʼ galnadxiʼ ni diti raché diti noʼ confianz. Né confianz raquiingoluʼni par niʼs galnadxiʼ.

Ló xtzúno, ni buñ gac fiel tzeʼel noʼni ló riesga. Par diti guibíl xcaltzeelo, raquiin gonylo chop cós.

NI NÁ LA BIBLIA: «Guientzaayto xí láani ngú ni más rasac» (Filipenses 1:10). Xcaltzeelo ngú ni más rasac laʼga nabanylo. Non guisacni más par looy.

Jehová raniiny que tzoʼlo galrrasaʼ por tzeʼel lo né guibaladxlo né láabu (Eclesiastés 9:9). Nayadit raniʼ Jehová que dipa guixacladxlo de tzeʼel lo, xalagary ngú non guiyopylo mod par guibaladx tzeʼel lo (1 Corintios 10:24). Buny que tzeʼel lo guiduidy cuent que looy raquiinlo láabu né que rasacbu par looy.

NI LABÚU GONYLO:

• Goleʼ tiemp par gooylo diitz né tzeʼel lo, né bicadiag ni raniʼbu

• Diti nosi guiniʼlo «naʼ», xalagary ngú goniʼ «lóodo»

NI NÁ LA BIBLIA: «Nitisi buñ ni cabiʼ toib buñgonaʼ né nainy tzonébu gonaʼ reʼ ma bunybu galyoxh né gonaʼ reʼ lainy xcalnabanybu» (Mateo 5:28). Pal noʼ ni diti rasian rony pensary ló galyoxh, labúu guinino que ma cascúbu tzeelbu.

Jehová ná que raquiin gaplo xcalnabanylo (Proverbios 4:23; Jeremías 17:9). Par gonylo ndeʼ raquiin gaplo cuidad xí cós rabiʼlo (Mateo 5:29, 30). Bisuʼ ni buny Job, toib buñguieeu ni bibany nírcu, láabu diti bunybu pensary gonybu galyoxh né mbioxhlasien (Job 31:1). Goloʼ guiclo que dipa guibiʼlo galyoxh. Né goloʼ ló xpensarylo que dipa guiniiny looy guioladxlo buñ ni diti nac tzeʼel lo.

NI LABÚU GONYLO:

• Buny que stipnés guiduidy cuent que nigolú nadxiʼlo tzeʼel lo

• Gop respet mod rasac tzeʼel lo né golsit de nitisi buñ ni radzaklo pal tzeʼel lo moda rasac malbu