1-3. ¿Xí enemig racanal guirácano, né xigony ni rasuidy la Biblia rony que rasacno sacró?

BUNYSI xpensarylo que toib buñ ni nigolú mal ni nac xi enemiglo caxony canal looy. Nigolú nadipbu né raxonybu más que looy. Nandxichlo que nacbu nigolú mal portín ma bibiʼlo láabu bigaitybu tipnés ximiglo. Ná caxonygoluʼlo diti ralsitlo de láabu. Ralooypani cuti biloxni. Per tisintiempsi noʼ ni radxin par guilaa looy. Láabu más nadipbu que xi enemiglo né raniʼbu que sacnébu looy. ¡Ndeʼ rony que rasaclo sacró!

² Láaca labúu guinino que toib enemig canal looy. Scú, guirácano canalni lóono. Xomod ma bisuidyno ló capítulo 6 la Biblia raniʼ que galgoity nac xomod toib enemig. Ni toib de lóono labúu guilaa o gony gann galgoity. Ma bibiʼno ximod enemig reʼ ma bigaity xfamilno o ximigno. Per Jehová más nadipbu que galgoity. Napbu galnadxiʼ né Salaabu lóono, ma bislooybu que labúu gonybu gann enemig reʼ. Né raduidybu xtiitzbu que sanitlóbu por tipzó galgoity ni nac toib enemig. La Biblia rasuidy que: «último enemig, galgoity, sanitlóni» (1 Corintios 15:26). ¡Ndeʼ nac diitz sacró!

³ Primer guisuidyno ximod galgoity, xi enemigno,  ragoʼ lóono ló galrrioop. Pal rasuidyno ndeʼ sacnéni lóono guienno toib cós ni sony que guisacno sacró. Xomod ma bienlo, Jehová raduidy xtiitz que gueʼet siás (Isaías 26:19). Jehová sony que sabanyibu stoib. Ndeʼ ni cabésno ni gony Jehová, portín láabu goniʼbu gonybu láani.

4. a) ¿Xigony ni gosac Jesús órni goity ximigbu rasuidy lóono xí rasac Jehová? b) ¿Chú layibu góc ximigdxin Jesús?

⁴ ¿Ma goity toibtica xhomilo o ximiglo ni nadxiʼlo la? Galrrioop, galnabann, né ni diti labúu ronyno xitcal ronyni que ralooypani diti gony guantaryno. Órni cadudyno ló galnagan reʼ raquiin ganno ni ná la Biblia par gacnéni lóono (bíil 2 Corintios 1:3, 4). La Biblia racné lóono guienno ximod rasac Jehová né Jesús órni raity toib buñ. Jesús ni góc xomodpa Bixios, gon balaati rioʼob órni raity toib buñ (Juan 14:9). Órni Jesús riée Jerusalén, riguenbu Lázaro, María né Marta ni golés gahxca gudx Betania. Layibu gocyibu ximigdxin Jesús. La Biblia ná: «Jesús gondxiʼ Marta, María né Lázaro» (Juan 11:5). Xomod ma bisuidyno ló capítulo 6, Lázaro goity.

5, 6. a) ¿Ximod gosac Jesús órni bibiʼbu xfamily né ximig Lázaro cayibdxaʼ? b) ¿Xigony rony animarni lóono ni gosac Jesús ni goity Lázaro?

⁵ ¿Ximod gosac Jesús ni ximigbu goity? La Biblia raslooy que órni Jesús goyguen xfamily né ximig Lázaro, layibu cayibdxaʼdootyibu ni goity Lázaro. Órni Jesús rabiʼ ximod cayibdxaʼyibu, «nigolú bioʼobni láabu né diti gosacbu sacró» láaca náni que «gosaló gorudxaʼbu» (Juan 11:3, 35). ¿Ni gosac Jesús bislooyni que diti noʼ ni labúu gonybu la? Yaca, diti scú láani. Jesús gonbu xí ni gonybu: toib galrradziguiaʼ (Juan 11:3, 4). Ná scú, Jesús gosac nabann né bioʼobni láabu xtol galgoity.

⁶ Ni gosac Jesús rony animarni lóono. Ndeʼ rasuidy  que Jesús né Bixiosbu, Jehová, rianladxyibu galgoity. ¡Per Jehová nap galnadip par gony gann enemig reʼ! Guibiʼno xí galrradziguiaʼ rony Jesús né xcalnadip Dios.

7, 8. ¿Xigony labúu guinino que xidal buñ ni goyee ro bigach Lázaro ñony pensary que diti labúu ñásbu, per xí buny Jesús?

⁷ Lázaro bigach lainy bileʼ né Jesús gonab nabeʼyibu guiee ni nasieg roʼ bileʼ cú. Marta goniʼ que diti labúuni portín ma godudy tap govitz de goló goitybu né ma caxinbu (Juan 11:39). Par toib buñgudxlio, Jesús ma diti labúu ñonybu xitcal.

⁸ Órni goleʼyibu guiee cú, Jesús bicaʼ rudx: «¡Lázaro, bireʼ!» ¿Xí góc ór cú? «Buñguieeu ni góc gueʼet bireʼ» (Juan 11:43, 44). ¿Labúu gonylo pensary balaati bibaladx buñreʼ la? Bisanbu, xhomilbu, ximigbu né buñ ni rabés gahx, gondxichyibu que Lázaro ma goity, per nigoreʼ Lázaro ma noʼ né layibu stoib. Ni góc ralooypani diti nigolú. Nandxichno que xidalyibu goduʼdx Lázaro né bibaladxyibu. ¡Por ngú labúu guinino que Jehová sony gann galgoity!

9, 10. a) ¿Ximod bislooy Jesús chú biduidy galnadip láabu par golísbu Lázaro? b) ¿Ximod racné lóono golno historias ni la Biblia rasetlaa que gueʼet bibany stoib?

⁹ Jesús diti goniʼbu que por xcalnadipbu bunybu galrradziguiaʼ reʼ. Órni yása guicaʼbu rudx Lázaro goninébu Jehová, modreʼ bislooybu que Jehová ngú ni labúu ralís gueʼet (bíil Juan 11:41, 42). Per ndeʼ diti góc primer buelt ro Jehová biquiin xcalnadip modreʼ. Ni Lázaro biás nacní toibtica ló gaʼ buelt ni rasetlaa Xtiitz Dios ro raniʼ que buñ bibany stoib. * Órni rolno historias reʼ nigolú  rioladxno láani. Rasuidyni lóono que Jehová ragobioo guirá clas buñ. Portín golísbu mbioxhlas, buñgol, buñguieeu, buñgonaʼ, israelitas né ni diti góc israelitas. Órni rolno historias reʼ rabiʼno balaati bibaladxyibu. Guibiʼno ximod, órni Jesús golís toib nidxigonaʼyen ni goity, bixiosbu né xinaʼbu «nigolú bidziguiaʼyibu» (Marcos 5:42). Scú, Jehová biduidy layibu mod par nabaladxyibu ni diti ñaladxyibu.

¹⁰ Scú láani, guirá gueʼet ni Jesús golís goity stoib. ¿Bislooy ndeʼ que diti biquiin ni bunybu la? Yaca, diti scú láani. Historias xtuny la Biblia raslooyni que galrradziguiaʼ reʼ nigolú góc, né raduidyni confianz lóono que sácni stoib.

11. ¿Ximod historia ni Lázaro biás lad gueʼet racné lóono guienno que galgoity nac xomod ná Eclesiastés 9:5?

¹¹ La Biblia rasuidy que gueʼet «diti nan xitcal» (Eclesiastés 9:5). Diti nabanyibu stoib lagary né diti rienyibu xitcal. Ni gosaclóo Lázaro raslooyni que scú nacní. ¿Órni biásbu goniʼbu ximod nac guibá la? O ¿Bitzuibybu buñ que noʼ toib lagary ro raʼij buñ la? Yaca, la Biblia diti rasetlaa xitcal ni goniʼ Lázaro. Ló tap govitz ni Lázaro góc gueʼet «diti [gon] xitcal». Lázaro gotiasy ló galgoity (Juan 11:11).

12. ¿Xigony nandxichno que ni góc né Lázaro nigolú gocni?

¹² Ni gosaclóo Lázaro, láaca rasuidy lóono que nigolú riás gueʼet; diti nacní toib cuent. Jesús golís Lázaro nisló xidalguixo buñ. Ná buñ ni gosanir ló religión bianladxyibu Jesús, bisetyibu que galrradziguiaʼ reʼ nigolú gocni. Ndeʼ ni goniʼyibu: «¿Xí láani gonyno, portín buñguieeu reʼ rony xidal galrradziguiaʼ?» (Juan 11:47). Xidal buñ goyeyibu ronoʼ Lázaro, né gopyibu fe lóo Jesús. Ni góc né  Lázaro gocni prueby que Dios bixel Jesús ló Gudxlio. Biendxich que scú gocni, por ngú tipnés judíos ni gosanir ló religión ni nagudx xcalnabany biyopy mod nagaityibu Jesús né Lázaro (Juan 11:53; 12:9-11).

13. ¿Xigony nandxichno que Jehová labúu salís gueʼet?

¹³ ¿Mal láani gonyno crer que buñ ni ma goity guiás la? Yaca, Jesús biduidy xtiitz que sioʼ dzú «guirá ni noʼ lainy baʼ conmemorativas sien xirudxbu» né siás (Juan 5:28). Jehová ngú ni Bisaʼ guirá ni nabany. ¿Labúu guiluladxno que Jehová guilís gueʼet la? Scú, guirá ndeʼ labúu sadxin sácni pal Jehová rasetnaladx layibu. ¿Labúu guisednaladxbu xhomilno, né ximigno ni ma goity la? ¡Jehová nanbu laa xidalguixo millón vitzón ni noʼ guibá! (Isaías 40:26). Scú láani, Jehová labúu guisetnaladx xhomilno, né ximigno ni ma goity, par guiásyibu merpa xomod gocyibu.

14, 15. Xomod goniʼ Job, ¿balaati raniiny Jehová guilís gueʼet?

¹⁴ Por ngú, ¿balaati midid rioʼ Jehová ló galrasaʼ por buñ ni ma goity? La Biblia rasuidy que Jehová raniiny guilís buñ ni ma goity. Job ni buny ni ná Dios gonabdiitzbu: «Pal toib buñguieeu raity, ¿labúu sabanybu stoib la?». Job goniʼ que cuésbu lainy baʼ dada guidxin ór Dios guisetnaladx láabu. Por ngú gochbu Jehová: «Looy sacaʼlo rudx, né naʼ sacabi looy. Nigolú saniiny looy guibiʼlo dxiin ni bunylo né ñalo» (Job 14:13-15).

¹⁵ ¡Bunysi pensary ló ndeʼ! Jehová nigolú raniiny guilís gueʼet. ¿Rony animarni lóono ganno que Jehová nigolú raniiny gonybu láani la? Per ¿ximod gac ndeʼ ló dzú ni sietra? ¿Chú layibu guiás stoib, né pu lagary?

16. ¿Ximod guibany buñ ni guiás ló Gudxlio?

¹⁶ Órni rolno ló la Biblia ni rasetlaa que buñ ni goity  nírcu biás, xiroʼ rasuidyni lóono xí ni gac ló dzú ni sietra. Buñ ni bibany stoib biguaʼyibu né xhomilyibu né ximigyibu. Órni buñ ni ma goity siás scúca sácni, per más sacroyen. Xomod ma bisuidyno ló capítulo 3 ni raniiny Dios ngú guidopy Gudxlio guidxin gac toib lagary móz. Scú, gueʼet diti siás ló toib Gudxlio ro bidza guerr, cós mal, né galguitz. Sabanyibu ló Gudxlio goxtiguie né sacró por tipzó.

17. ¿Balac buñ guiás stoib?

¹⁷ ¿Chú layibu guiás stoib? Jesús goniʼ que «guirá ni noʼ lainy baʼ conmemorativas sien xirudxbu né sareʼ» (Juan 5:28, 29). Né scúca caa ló Revelación 20:13 ni ná: «Né nisdaʼ bunycuent guirá gueʼet ni goyoʼ lainyni, né galgoity né Baʼ bunycuent gueʼet ni goyoʼ lainyni». (Bibiʼ apéndice ni laa, «¿Xí láani ngú Seol né Hades?».) Baʼ reʼ ro xidalguixo buñ riée sadachni, órni xidal millón de buñ ni ma goity guiás. Pablo goniʼ: «Siás gueʼet ni buny xinésni né ni diti buny xinésni» (Hechos 24:15). ¿Xí raduidy diitz ndeʼ?

18. ¿Chú layibu noʼ lad «ni buny xinésni» ni ma goity ni guiás, né ximod racnéni looy ni Jehová salís buñ ni ma goity?

¹⁸ Órni la Biblia raniʼ «ni buny xinésni», ladni noʼ xidalguixo buñ ni la Biblia rasetlaa ni bibany dzú yása guieed Jesús ló Gudxlio, xomod Noé, Abrahán, Sara, Moisés, Rut, Ester, né stipnés ni buny ni ná Dios. Ló capítulo 11 de Hebreos rasetlani de stipnés buñguieeu né buñgonaʼ ni gop fe. Per lad buñ «ni rony xinésni» láaca noʼ buñ ni rien Jehová ni raity ló xtzúno. Ni napnó confianz que Jehová salís gueʼet ronyni que diti guidzuibyno gaityno (Hebreos 2:15).

19. ¿Chú layibu ngú «ni diti buny xinésni», né xí guiduidy Jehová layibu por galnadxiʼ ni nap?

¹⁹ Xidal millón buñ ni goity né diti labúu bislooy que gondxiʼyibu né diti bisobyibu Dios, ¿xí gac né layibu?  Buñ «ni diti buny xinésni» Dios diti sialadx layibu. Láaca guiásyibu né gapyibu tiemp par ganyibu né gonyibu ni ná Dios. Ló tipmil íz buñ ni ma goity guiás né guiguaʼyibu ló Gudxlio toibsi né buñ ni cayony ni ná Jehová. Ndeʼ sac tiemp sacroyen, ni la Biblia raniʼ Día del Juicio. *

20. ¿Xí láani ngú Gehena, né chú layibu riée lagarycu?

²⁰ ¿Raduidy diitz ndeʼ que guirá buñ ni ma goity guiás la? Yaca, diti scú láani. La Biblia raniʼ que tipnés gueʼet noʼ ló «Gehena» (Lucas 12:5). Diitz Gehena ritlani portín scú góc laa toib lagary ni goyoʼ gudx gool Jerusalén ro bisapy buñ guix. Lagary reʼ bisaʼijyibu gueʼet, nimal ni ma goity né guix. ¿Chú gueʼet bisapy judíos lagary reʼ? Nosi buñ ni diti noʼ razón par guigach né guiás lad gueʼet. Por ngú, diitz Gehena radzaktzayni, né raduidytzayni diitz que buñ ni riée lagary reʼ ranitlóyibu por tipzó. Ná Jesús guiniʼ chú guibany né chú yaca, Jehová nac Juez né ni nábu gac (Hechos 10:42). Dios dipa salís buñ ni nambu nac buñ mal né ni diti ná guitzá mod nabany.

21, 22. a) ¿Xí stoib mod riás buñ ni raity? b) ¿Chú láabu góc primer ni biás xomod toib espíritu?

²¹ La Biblia láaca raniʼ stoib mod ni riás buñ ni ma goity, riásyibu xomod toib espíritu par guibanyibu guibá. Xtiitz Dios nosi toib buelt rasetlaa ni biás xomod toib espíritu, ndeʼ góc Jesús.

²² Órni Jesús goity xomod buñgudxlio, Jehová diti biduidy lagary que Xiimbu Jesús ni buny ni nábu ñaʼan lainy Baʼ (Salmo 16:10; Hechos 13:34, 35). Dios golís  Jesús, per diti xomod toib buñgudxlio. Pedro rabexa que Cristo «goitybu xomod buñgudxlio per biásbu xomod toib espíritu» (1 Pedro 3:18). ¡Ndeʼ góc toib galrradziguiaʼ rodann! Jesús bibany stoib xomod espíritu ni nap galnadip (bíil 1 Corintios 15:3-6). Jesús góc primerdiguieʼ ni bibany modreʼ, per láaca noʼ stipnés ni riás modreʼ (Juan 3:13).

23, 24. ¿Chú layibu nac «tidxo xiil» xtuny Jesús, né balac gacyibu?

²³ Órni Jesús gonbu que mápa mer guibiguetbu guibá, gochbu ni cuanal láabu: «gony puext toib lagary par lóoto» (Juan 14:2). Ni guié guibá Jesús goleʼ laayibu «tidxo xiil» (Lucas 12:32). Tidxo buñ ni guié guibá ni buny ni ná Jesús, ¿balacyibu? Xomod ná Revelación 14:1, rolno ni bicaʼ Juan: «Bibiʼya, né ¡colguibiʼ!, Xilieen [Jesucristo] sagaʼ laidy dainy ni laa Sión, né ni noʼ né láabu ngú 144,000 ni caa lacaa laabu né laa Bixiosbu».

²⁴ Ni nac 144,000 —ladyibu noʼ ni góc xpiin Jesús—, riásyibu par guibanyibu guibá. ¿Pu dzú rac guirá ndeʼ? Pablo bicaʼ que ndeʼ rac órni ma noʼ Jesús (1 Corintios 15:23). Xomod guisuidyno ló capítulo 9 rabésno ló dzú ni ma guidubylagá. Ló xtzúno ma tidxósi riaʼan de 144,000 órni raityibu órcuca riásyibu par guibanyibu guibá (1 Corintios 15:51-55). Per par xidalguixo buñ ni ma goity guiás par guibany ló Gudxlio lainy toib lagary móz.

25. ¿Xí guisuidyno ló capítulo ni sieed?

²⁵ Scú, Jehová nigolú sony gann galgoity ni nac xi enemigno, né sanitlóbu láani por tipzó (bíil Isaías 25:8). Per sigory ranabdiitzlo: «¿Xí tzaguny lainy guibá guirá buñ ni guiás?». Sadxin sacyibu ni gony mandary né Jesús ló Gobierno móz ni tzó guibá. Ló capítulo ni sieed guisuidyno más de Gobierno reʼ.