1, 2. a) ¿Xí rony que toib galrrascad rasac par looy? b) ¿Xigony labúu guinino que ni Jesús goity por lóono nacní toib galrrascad ni más rasac ni cuaʼno?

¿XÍ GALRRASCAD ni rasac ma cuaʼlo toibtica buelt? Toib galrrascad diti raquiin gacni car par guisacni par toib buñ. Toib galrrascad rasacni órni ronyni que rabaladxlo, o racaʼlo láani órni merpa caquiinlo.

² De guirá galrrascad ni labúu guicaʼlo, noʼ toib galrrascad ni más rasac. Ndeʼ nac galrrascad ni Dios biduidy buñgudxlio. Jehová ma biduidy xidal galrrascad lóono, per galrrascad ni más rasac láani ngú ni biduidybu Xiimbu Jesucristo goity por lóono (bíil Mateo 20:28). Xomod guisuidyno ló capítulo reʼ, ni Jesús goity por lóono nacní toib galrrascad ni más rasac ni cuaʼno, portín ronyni que labúu guiguaʼno goxtiguie né labúu guicaʼno ni merpa caquiinno. Ni Jesús goity por looy raslooyni balaati nadxiʼ Jehová looy.

3. ¿Xí biquiin Dios par bilaa lóono né xí raquiin guientzaayno par labúu guisac galrrascad reʼ par lóono?

³ Scú, Jesús goity por lóono, galrrascad ni Dios biduidy buñgudxlio par guilaa de galkié né galgoity (Efesios 1:7). Par labúu guientzaayno xí ni rasuidy la Biblia de xcalgoity Jesús, raquiin guisetnaladxno xí góc lainy lagary sacroyen de Edén. Nosi pal rienno xí bisnit Adán órni bichébu labúu guientzaayno xigony goity Jesús por lóono, ndeʼ nac toib galrrascad ni rasac ni Dios biduidy lóono.

4. ¿Xí láani biduidy diitz par Adán ni diti gopbu galkié?

⁴ Órni Jehová bisaʼ Adán noʼ ni cuaʼbu ni nigolú rasac: diti gopbu galkié. Bunysi pensary ni labúu ñony Adán. Dios bisaʼtzay xpensary né guidopyzoo Adán par dipa naxoʼ, ñoʼx né ñaity. Xomod toib buñ ni diti gop galkié bidzaktzaybu Jehová. La Biblia raniʼ que Adán góc «xiin Dios» (Lucas 3:38). Por ngú bidzaktzaybu Jehová, xomod radzak saʼ toib mbiox né bixios ni nap galnadxiʼ. Jehová goniné Adán, xiimbu, né biduidy dxiin sacró láabu né góoch xí clas buñ non gacbu (Génesis 1:28-30; 2:16, 17).

5. ¿Xí raslooy la Biblia órni raniʼ que Adán goyaʼ «xomod nac Dios»?

⁵ Adán goyaʼ «xomod nac Dios» (Génesis 1:27). Per ndeʼ diti bislooy que Adán goyaʼ merpa xomod nac Dios. Xomod ma bisuidyno ló capítulo 1 Jehová nac toib Espíritu (Juan 4:24). Scú, Jehová diti nac xomod lóono de beʼel né runy. Por ngú, órni la Biblia raniʼ que Adán goyaʼ xomod nac Dios raslooyni que Adán gopbu galnadxiʼ, galnann, bunybu xinésni né gopbu galnadip. Adán láaca gócbu xomod bixiosbu, portín golúbu ni náni láabu gonybu. Scú láani, Adán diti goyaʼbu xomod toib nimal. Stip  láabu labúu nabúbu xí ngú cós tzaay né cós yox. Pal láabu nabúbu nasobbu Dios, labúu nabanybu tipzó ló Gudxlio.

6. ¿Xí bisnit Adán órni diti bisobbu Dios, né xí gosaclóo guirá xiimbu?

⁶ Nayadit bienni que Adán nigolú car godixbu ni diti bisobbu Dios portín goitybu xomod goniʼ Dios. Adán biché né bidxinbu gócbu buñ galkié né ma diti cuaʼbu xilaay Jehová (Génesis 3:17-19). Ná nabanni, Adán bisnitbu nabanybu tipzó né gócbu buñ galkié, per diti nosi láabu láaca guirá xiimbu góc buñ galkié. Xtiitz Dios ná: «Por toibsi buñguieeu [Adán], galkié goyoʼ ló gudxliogox, né galgoity goyoʼni por galkié, né modreʼ galkié golaani guirá buñgudxlio portín guiráyibu ma bichéyibu» (Romanos 5:12). Scú, guirácano cuaʼno xcalkié Adán. La Biblia raniʼ que Adán «bitoʼ» guirá xiin toibsi né láabu né scú goyoʼno ló xomandary galkié né galgoity (Romanos 7:14). Por ni Adán né Eva bichéyibu cuti biloxni par layibu, portín stip layibu golúyibu diti guisobyibu Dios. Per ¿xí nasaclóo guirá xiinyibu, ladni lóono?

7, 8. ¿Xí chop cós labúu gac órni noʼ ni rony toib galkié?

⁷ Jehová godixbu par labúu nalaabu buñgudxlio. ¿Ximod ngú riax par guilaa toib buñ? Riaxni de chop mod. Primer, láani ngú sac ni raguiix buñ par labúu guilaa toib buñ o par siʼ toib cós. Láaca raslooyni ndeʼ órni raquiin bidxiich par guiax né guilaa toib buñ ni noʼ lachquiip. Ni rarop, láani ngú órni noʼ ni riax né non quiixbu midid gaxt bunyni. Pal toib buñ rony toib galkié non quiixbu balaati gosacni.

 ⁸ Xomod ma bienno Adán bituidy galkié a guirá xiin. ¿Ximod labúu guiax ni bisnit Adán né labúu guireʼno ló xomandary galkié né xomandary galgoity? Guibiʼno ximod Jehová bilaabu buñ de guirá ndeʼ, né ximod racné ndeʼ looy.

9. ¿Ximod non ñax ni buny Adán?

⁹ Ni binit góc toib buñ ni diti gop galkié, por ngú ni toib buñgudxlio labúu naguiix ni ma binit (Salmo 49:7, 8). Biquiingoluʼ ñax midid rasac ni bisnit Adán. Modreʼ gocni xomod raniiny Jehová que gacni merpa xinésni xomod sieed ló Xtiitzbu, «vida por vida» (Deuteronomio 19:21). Por ngú, ¿xí láani labúu naguiix alma xtuny Adán ni bisnitbu órni bichébu? Biquiinni toib alma ni diti gop galkié ni biax «midid gosac» ni bisnit Adán (1 Timoteo 2:6).

10. ¿Ximod bilaa Jehová lóono?

¹⁰ ¿Ximod bilaa Jehová lóono? Bixelbu xiimbu ni diti gop galkié xomod toib espíritu ló Gudxlio. Per Jehová diti bixel nitisi ángel. Láabu bixelbu toib ni más nadxiʼbu, toibguielot Xiimbu (bíil 1 Juan 4:9, 10). Jesús gosaguel bisiambu guibá lagary ro rabésbu (Filipenses 2:7). Xomod ma bisuidyno ló capítulo 4 Jehová buny toib galrradziguiaʼ biquiimbu toib mbioxhlas ni góc laa María par nasann xiimbu. Biquiimbu espíritu santo xtunybu par ñal Jesús sin galkié (Lucas 1:35).

11. ¿Ximod xcalgoity toib buñguieeu bilaa xidalguixo buñ?

¹¹ ¿Ximod toib buñguieeu labúu nalaa xidalguixo buñ? ¿Ximod xidalguixo buñ bidxin góc buñ galkié? Bisednaladx órni Adán bichébu gócbu buñ  galkié, per diti nosi láabu láaca guirá xiimbu bidxin góc buñ galkié. Adán nosi bisiané lóono galkié né galgoity. Jesús, ni la Biblia rabeʼ laa «último Adán», diti gop galkié, diti biché (1 Corintios 15:45). Scú láani Jesús goyoʼbu xalagary Adán par labúu nalaabu lóono. Jesús bisobtzaybu Dios né goitybu sin toib galkié, modreʼ godixbu xcalkié Adán par labúu guibanyno tipzó. Modreʼ Jesús buny que guirá xiin Adán gap confianz guibany tipzó (Romanos 5:19; 1 Corintios 15:21, 22).

12. ¿Xí bislooy Jesús né guirá galrrioop ni godudybu ló?

¹² La Biblia ralooytzay ximod Jesús godudy ló galrrioop dzú ma gaitybu. Nigolú bunynaa buñ láabu né bigalxigaʼyibu Jesús ló yac nadop dada goitybu (Juan 19:1, 16-18, 30; bibiʼ apéndice ni laa, «Buñ ni racanal Jesús, ¿non guiquiinyibu crois la?»). ¿Xigony biquiinni que Jesús nadudy ló galrrioop? Ló capítulo ni sietra sasuidyno ni goniʼ Buñdzab que ni toib buñ sony ni ná Dios órni cadudy ló galnagan. Ni Jesús buny guantary galrrioop bislooytzaybu que Buñdzab pór galrrascú goniʼ. Jesús bislooy que toib buñ ni diti nap galkié né ni rabú gony ni ná, labúu guisob Jehová ná Buñdzab coʼ láabu ló galnagan. ¡Balaati bibaladx Jehová órni bibiʼbu Xiimbu ni nadxiʼbu diti biché! (Proverbios 27:11.)

13. ¿Ximod goleʼ Dios lóono ló galkié?

¹³ ¿Ximod goleʼ Dios lóono ló galkié? Dzú 14 de nisán íz 33 Ló Xtzúno beʼo judío, Jehová biduidy lagary que Xiimbu ni diti gop galkié, goity por lóono «toib buelt por tipzó» (Hebreos 10:10). Tzón govitz de goló goitybu Jehová golís láabu xomod toib ángel. Órni bidxinbu guibá bunycuentbu Dios ni  gosac xcalgoitybu ni bunybu órni goitybu por xcalkié Adán ni bituidy a guirá xiin (Hebreos 9:24). Jehová cuaʼ ni rasac xcalgoity Jesús xomod toib ni riax par guilaa buñ de ló xomandary galkié né xomandary galgoity (bíil Romanos 3:23, 24).

14, 15. ¿Xí non gonyno par «labúu tudy xcalkiéno scásiʼ»?

¹⁴ Ná nacno buñ galkié labúu guicaʼno xcalnasác Jehová ni nigolú rasac, portín Jesús goity por lóono. Guibiʼno ximod galrrascad ni más rasac ni biduidy Dios racné lóono ló naareʼ né ló dzú ni sietra.

¹⁵ Galkié radudy scásiʼ. Ni nacno buñ galkié naganni par gonyno xinésni. Guiráno rachéno por ni ranino o por ni ronyno. Ni Jesús goity por lóono, «labúu tudy xcalkiéno scásiʼ» (Colosenses 1:13, 14). Par tudy xcalkiéno scásiʼ non gac arrepentirno por ni bunyno cós mal. Láaca gacno buñdxo né non guinabno lóo Jehová guituidy xcalkiéno scásiʼ ló fe ni napnó de xcalgoity Xiimbu Jesús (bíil 1 Juan 1:8, 9).

16. ¿Xigony labúu guienno Dios né galrrien nayaa, né ximod racnéni lóono ni gapnó galrrien nayaa?

¹⁶ Galrrien nayaa nisló Dios. Órni galrrien guirá ór rachiin lóono por toib cós mal ni ma bunyno ronyni que gonyno pensary que diti rasacno nisló Dios. Ni Jesús goity por lóono ndeʼ rony que Jehová ratuidy scásiʼ xcalkiéno, né por ni ronladxbu lóono raduidybu lagary guienno láabu né galrrien nayaa ná nacno buñ galkié (Hebreos 9:13, 14). Né scú labúu raninéno láabu né confianz guirá ór (Hebreos 4:14-16). Órni xcalrrienno rac nayaa raguaʼno goxt, xpensaryno noʼ sacró né ronyni que raguaʼno sacrodiguieʼ.

17. ¿Xí galnasác labúu guicaʼno por ni Jesús goity por lóono?

 ¹⁷ Cabésno guibanyno tipzó ló Gudxlio móz. Romanos 6:23 ná: «Galkié riaxni né galgoity». Né looca versículo reʼ ná: «Per galrrascad ni Dios raduidy nacní par guibanyno tipzó por Cristo Jesús Señor xtunyno». Ló capítulo 3 bisuidyno xí galnasác tzó ló Gudxlio móz ni sietra (Revelación 21:3, 4). Guirá galnasác reʼ né ni guibanyno nasac por tipzó ló Gudxlio sácni portín Jesús goity por lóono. Pal nainy guicaʼno guirá galnasác reʼ raquiin guislooyno que rasac par lóono galrrascad ni Dios biduidy.

18. ¿Xigony guixquixpano Jehová por ni biduidybu xiimbu goity por lóono?

¹⁸ ¿Xigony guixquixpano Jehová por ni biduidybu xiimbu goity por lóono? Scú, toib galrrascad rasacni órni rinéni tiemp, xtem o bidxiich. Xcalnabanyno rasisni portín rabiʼno balaati nadxiʼ Jehová lóono. Ni Jesús goity por lóono nacní toib galrrascad ni más rasac ni Dios biduidy lóono, portín  nigolú bioʼobni Jehová. «Nigolú gondxiʼ Dios buñgudxlio por ngú biduidybu toibguielot Xiimbu», scú ná Juan 3:16. Ni goity Jesús por lóono ndeʼ toib prueby ni raslooy balaati nadxiʼ Dios lóono. Ndeʼ láaca nac stoib prueby balaati nadxiʼ Jesús lóono ni gosaguel goity por lóono (bíil Juan 15:13). Ni Jesús goity por lóono nandxichno que Jehová né Jesús nadxiʼyibu lóono por tigaano (Gálatas 2:20).

19, 20. ¿Ximod labúu guislooyno que rasac par lóono ni goity Jesús ni nac galrrascad ni Dios biduidy?

¹⁹ ¿Ximod guislooylo que rasac par looy galrrascad ni Dios biduidy Xiin? Ni primer gonylo ngú, guimbulo Jehová ni Biduidy galrrascad reʼ (Juan 17:3). Par labúu guimbulo Jehová non tzó ni gacné looy guisuidylo la Biblia né libro reʼ. Conforma guimbulo más a Jehová, xcalnadxiʼlo sácni más nadip. Né galnadxiʼ reʼ sonyni que gonylo cós ni guibaladx Jehová (1 Juan 5:3).

²⁰ Gop fe ni Jesús goity por lóono. Jesús láacabu goniʼbu: «Ni nap fe lóo Hijo sabany tipzó» (Juan 3:36). ¿Ximod labúu guislooyno que napnó fe lóo Jesús? Diti nosi guinino que napnó fe. Santiago 2:26 raniʼ diitzreʼ: «Fe pal diti noʼ ni ronyni diti nabanyni». Scú, fe ni nac xinésni raslooyno que napnó láani por ni ronyno. Toib mod ni guislooyno que napnó fe ngú gonyno por guisuʼno Jesús mod ranino né mod ronyno (Juan 13:15).

21, 22. a) ¿Xigony raquiin tzóno Memorial ni rac guirá íz? b) ¿Xí guientzaayno ló capítulo 6 né 7?

²¹ Goyee Memorial guirá íz. Goxin 14 de nisán íz 33 Jesús goniʼ que gac toib lanii ni diti rac guirá dzú ni la Biblia rabeʼ laa, «Cena del Señor» (1 Corintios 11:20; Mateo 26:26-28). Láaca laani Memorial  ni rasetnaladx xcalgoity Jesús. Jesús bunybu ndeʼ par gacnébu xpiimbu né guirá ni racanal láabu guisetnaladx que goitybu sin galkié par guilaabu buñ. Jesús goniʼ de Memorial órni buny mandarybu gac ndeʼ: «Diti guisian gonyto láani par guisetnaladxto naʼ» (Lucas 22:19). Memorial rasetnaladx lóono balaati nadxiʼ Jehová né Jesús lóono ni goitybu por buñgudxlio. Labúu guislooyno balaati rasac xcalgoity Jesús pal rioʼno Memorial ni rac guirá íz. *

²² Ni Jehová biduidy Xiin xomod toib galrrascad nacní toib ni rasacgoluʼ (2 Corintios 9:14, 15). Xcalgoity Jesús ni nac toib galrrascad labúu gacnéni dada buñ ni ma goity, guienno ximod rarexani ló capítulo 6 né 7.