Guirá cós mal ni cayac lo Gudxlio raduidyni diitz que Lagary mózcu ma noʼ gax. Biblia ma xidzú raniʼ que sabiʼno dzú nagann nir guieed Gudxlio móz reʼ. Ne ma nabanyno dzúcu. Ndeʼ guirá cós ni goní la Biblia ni gac:

Xiroʼ guerr. «Gudxrop né gudxrop sadíil, né gobierno láaca sacaló saʼ gobierno.» (Mateo 24:7.) Guirá diitz reʼ ma góc cumplir. Íz 1914 ma goyoʼ chop guerr lo guidopy Gudxlio né láaca guerr más mitien. Millón de buñ ma goity lo guerr.

Noʼ xidal clas de galguitz. Sioʼ «en guirá lagary galguitz» (Lucas 21:11). ¿Cayac cumplir diitz reʼ la? Scú. Cáncer né galguitz de galnabany, né tuberculosis, xilanal, sida né stipnés clas de galguitz, ma bigaity millón de buñ.

Galsii. Lo guidopynac gudxlio noʼ buñ ni diti nap ni gua. Millón de buñ raity de galrralán guirá íz. Ndeʼ raduidy diitz que Gudxlio móz ma noʼni gax. La Biblia ná: «Sioʼ galsii de galrro» (Marcos 13:8).

 Xo rodann. «Sioʼ [...] xo rodant guirá lagary xitzca saʼ.» (Mateo 24:7.) Ndeʼ láaca ma cayac cumplir ló xtzúno. Más de tip millón buñ ma goity por guirá xo rodant ni gosaló goduidy de goloo 1914.

Buñ mal. Guirá buñ «sonladx bidxiich» né «por lásibu tzóbu xcalrasaʼ». «Sonladxibu pór cós ni rony que rioʼ nakit buñ, né diti sagoyibu cuent Dios». Guirá bimbiox ma «diti rasob bixios» (2 Timoteo 3:1-5). ¿Raduidylo cuent que scú nacní lo xtzúno la? Diti ronybu mod ni na Dios, né pór si galnagan ragobu ro noʼ ni ná guisuidy de Dios.

Pór cós mal. Láaca sioʼ «buñ mal ni diti sonladx saʼ» (Mateo 24:12). Looy láaca raduidylo cuent que guirá cós mal reʼ cayac xiroʼ lo naareʼ. Lo guirá lagary, guirá buñ radzuiby que tzó ni cuann layibu, guiscú, o noʼ ni gony láabu.

Guirá ndeʼ raduidy diitz que Reino xtuny Dios ma noʼni gax. Biblia ná: «Ór ni guibito que guirá ndeʼ ma cayacni, guiduidyto cuent que Gobierno xtuny Dios ma noʼ gax» (Lucas 21:31). Pero ¿xí ngú Reino xtuny Dios? Láani ngú Gobierno xtuny Dios ni noʼ lainy guibá que gony que Gudxlio reʼ gac toib Lagary móz. Sioʼni xí lagary guirá buñchiin ni noʼ ló Gudxlio (Daniel 2:44).