Para que toib ximigno tzó né lóono, raquiin guininéno láabu. Racadiagno láabu, né láabu racadiagbu lóono. Láaca ranino sacró de láabu a stipnés buñ. Né modreʼca nac si nainy gacno ximig Dios. Bibísi ximod ná la Biblia gonyno sobre ndeʼ.

Buny orar Jehová guirá dzú. «Né col gony orar guirá dzú.» (Romanos 12:12.)

Goolno xtiitz Dios, la Biblia. «Guirá ni caa lo la Biblia sieedni de Dios, rasuidyni buñ, rony censurar, rony corregir, né rasuidyni lóono ximod labúu guibanyno.» (2 Timoteo 3:16.)

Guisuidyno stipnés buñ xtiitz Dios. «Coltzé, né colgony más xpiin Jesús guidopy nac Gudxlio, [...] né colguisuidy layibu a guisobbu guirá ni bisuidy lóoto.» (Mateo 28:19, 20.)

 Guibigno ro noʼ ximig Dios. «Ni casané buñ tzaay, sac buñ tzaay.» (Proverbios 13:20.)

Tzoʼno lagary ro radop Testigos de Jehová guirá xomal. «Gonyno por gacnéno né gonladxno, né gonyno cós tzaay, [...] gony animarno saʼcano.» (Hebreos 10:24, 25.)

Gacnéno dxiin del Reino ni cayac. «Que cada toibto guiduidy ni ná xcalnabany, diti de mal gann ni por obligación, portín Dios ronladx guirá ni raduidy né rabaladx.» (2 Corintios 9:7.)