Primer enemig xtuny Dios ngú Buñdzab. Láabu nacbu toib ángel ni diti bisobdiitz a Jehová. Buñdzab cacalóbu Dios, né ragob xidal galnagan ro noʼ buñgudxlio. Buñdzab toib buñ mal láabu, né rascugolubu né ragaitygolubu buñ (Juan 8:44).

Stipnés ángeles láaca góc toibsi né Buñdzab para que diti ñonybu mod ni na Dios. Biblia rimbu layibu ángeles xtuny Buñdzab. Ximod ca Buñdzab, guirá ángeles xtunybu nac xi enemig buñ. Rioladxbu gonybu mal buñ (Mateo 9:32, 33; 12:22). Jehová sanitló Buñdzab né guirá xpiin pór tipzó. Ma didxo si dzú napbu par gonybu mal a buñgudxlio (Revelación 12:12).

Si nainy gacno ximig Dios, diti gonyno ni na Buñdzab gonyno. Buñdzab né ángeles xtuny rianladxbu Jehová. Nacyibu enemig xtuny Dios né láaca nainy layibu gacno enemig xtuny Dios. Por ngú, raquiin ganno chú nainy gonyno ni ná: Buñdzab o Jehová. Si nainy guibanyno tipzó, raquiin gonyno xchiin Dios. Buñdzab nantzaay ximod guiscú buñ de xidal mod né raquiimbu xidal mod par gonybu láani. Né mod reʼ ronybu par guiscubu xidalguixo buñ (Revelación 12:9).