Labúu guimbuno Jehová al goolno la Biblia. Ma goduidy xidal íz, que Jehová buny que chop tzón buñ Gudxlio bicaʼ xpensarybu. Guirá guiich reʼ lá, rimbuno láani xomod Biblia. Nigoreʼ labúu guimbuno Dios al goolno la Biblia. Ndeʼ sitné xtiitz Jehová, né por ngú rimbuno láani xomod xtiitz Dios. Labúu guiluladxno ni raniʼ la Biblia, Jehová diti rascú. «Dios nagann par guiscú.» (Hebreos 6:18.) Scú nacní, Xtiitzbu raniʼ pór nigolú (Juan 17:17).

Biblia ni Jehová biscat lóono ngú ni más rasac. Láani nacní xomod toib guiich que toib Padre ni ronladx raxelbu lo guirá xiimbu. Né raiby lóono ximod gony Jehová lo Gudxlio reʼ de gonybu láani toib lagary sacroyen ro guibanyno. Láaca raniʼ xi buny Dios, né xi cayonybu nigoreʼ, né xigonybu para guirá xiimbu ni cayony ni nábu. Láaca racnébu lóono ximod labúu tuidyno lo galnagan né guibanyno content (2 Timoteo 3:16, 17).

 Guirá Testigos de Jehová nacbu ximig Dios; né sacnébu looy guienlo ni raniʼ né ni rasuidy la Biblia. Nosi gaipylo láabu que nainy looy guisuidylo la Biblia. Diti saguiixlo láabu par guisuidybu looy (Mateo 10:8). Láaca labúu guidoplo né layibu. Né reunión ni ronybu rac guirá xomal ro radopyibu. Si pal rielo xi reuniónyibu sasuidylo más de Jehová.

Labúu simbuuno Dios por guirá cós ni ma bunybu. Xomod na la Biblia: «Dios bisaʼ guibá né Gudxlio» (Génesis 1:1). Ór ni Jehová bisaʼ «guibá», láaca bisaʼbu Govitz. Né, ¿xí rasuidy ndeʼ de Dios? Jehová napbu xiroʼ poder. Diti noʼ toib ni labúu guisaʼ govitz nosi Jehová. Láaca rasuidyno que Jehová nigolú nambu pues raquiinni xiroʼ galnann para gac Govitz, né guiduidyni guii lóono né diti guioyni.

Guirá cós ni Jehová bisaʼ raduidyni diitz que ronladxbu lóono. Buny pensary en guirá cuanax ni noʼ lo Gudxlio. Jehová labúu guiduidybu toibsi cuanax lóono o ni toib. Pero láabu biduidybu lóono guirá clas cuanax par guaano. Né scaʼ raduidyni diitz que Jehová ronladxbu lóono, né láaca toib Dios tzaay láabu (Salmo 104:24).