PAR BUÑ NI MA NOʼ XIIN
8 Bidudy toib galán ejemplo xiinlo
¿XÍ RADUDYNI DIITZ?
Órni toib buñ radudybu toib galán ejemplo raslooybu que cayonybu ni caniʼbu. Toib buñ ni ma noʼ xiin diti labúu guinabbu xiimbu que guiniʼ guirási ór ni nigolú pal xiimbu racadiag láabu que diti noʼbu rioʼ órni noʼbu rioʼ né diti nábu guireʼbu.
«Xidal buñ raniʼ: Buny ni raabi diti ni cayoni, per ndeʼ diti racnéni mbiox. Mbiox nac xomod toib esponj ni ratop nís né scúca layibu ratopyibu ni ranino né ni ronyno. Pal rasuidyno layibu toib cós né ronyno stoib cós, sadudyibu cuent né saibyibu lóono» (David).
NI NÁ LA BIBLIA: «Looy ni rasuidylo a stoib buñ, ¿diti rasuidylo looyca la?» (Romanos 2:21).
¿XIGONY RASACNI?
Mbiox máspa ronybu ni rony bixiosbu o xinaʼbu, diti rasuʼyibu xcompañeryibu de yolayscuel. Ndeʼ radudy diitz que lóoto ni noʼ xiinto, non conésto layibu ló toib galán néz, per guirási ór non guidudyto toib galán ejemplo layibu.
«Labúu guinino toib cós xidal buelt per diti nanno pal cacadiagyibu lóono, per órni diti cayonyno ni ma gonino saibyibu lóono xigony diti cayonyno láani. Racaayibu cuidad guirá ni ronyno, ná ralooy diti cayonyibu láani» (Nicole).
NI NÁ LA BIBLIA: Galnan ni sieed de guibá diti nac hipócrita (Santiago 3:17).
¿XÍ LABÚU GONYLO?
Gonabdiitz looyca: «¿Ximod ragobioya tzeʼela né ximbioxa? ¿Xí clas programas rabiʼya? ¿Xí clas buñ radzaʼga? ¿Roni pensary ló stipnés buñ la?». Ló stoib diitz, ¿ñoladxlo que toibtica dzú ximbioxlo ñac xomod looy la?
«Nili tzeʼela né naʼ diti ranabdo xiindo gony respetar tipnés consej pal lóodo diti rapdo respet láani» (Christine).
Gonab perdón. Mbiox ma nanyibu que bixiosyibu nac buñ galkié. Por ngú, pal ranablo perdón tzeʼelo o ximbioxlo casuidylo xfamilo gacyibu buñdxo né gony scúca.
«Non guisetno ro bichéno né guinabno perdón, pal diti ronyno ngú xiinno diti sasuidy gony láani» (Robin).
«Mbiox rasuidyibu mod rony bixiosyibu. Ni ronyno ngú ni más rasac portín ngú ni rabiʼyibu. Nacni xomod toib libro ni xobial, xomod toib lesiony ni casuidy lóono dzú ná gueʼel» (Wendell).
