¿Pu lagary labúu guidzelno esperanza ni nigolú?

BUNY pensary que naplo toib reloj né ma bixinni. Órni cayopylo toib buñ ni gonytzaay láani, radzelo xidal anunys per diti naplo confianz láani. Órcu ranlo que xpesinlo nac buñguieeu ni bisaʼ reloj cu né raibybu looy que gonytzaaybu láani scásiʼ. Nimaca radudylo cuent chú labúu sacné looy né diti rayopylo stoib buñ.

Labúu guinino que reloj né esperanza toibsi midid láani. Pal radudylo cuent que ma casnitlo láani, xomod rasaclóo xidal buñ ló dzú nagan reʼ. Per ¿chú sacné looy? Xidal buñ raniʼ que labúu gacné looy per guirá ni raniʼyibu nirosondi mod nac. ¿Xigony diti ranabno xcalrracné ni Bisaʼ buñgudxlio par gap esperanza? La Biblia ná que «diti noʼbu sit de cada toibno», né noʼbu puext par gacnébu lóono (Hechos 17:27; 1 Pedro 5:7).

Guientzaayno xi ngú esperanza

Órni la Biblia raniʼ de esperanza diti nacni merpa ni rasetlaa doctor, científicos né psicólogos ló naareʼ. Ló diitz gool ni cuá la Biblia nírcu diitz «esperanza» raslooyni órni raniiny lóono toib cós né cabésno láani. Esperanza raslooyni chop cós lóono: órni raniiny lóono cós tzaay né confianz ni napno par gonyno crer que toib cós sácni. Esperanza ni rasetlaa la Biblia diti xilaʼsini. Napno prueby que esperanza ni napno nigolúni.

Labúu guinino que esperanza nacni xomod fe, non tzoʼ prueby par guiluladxno láani (Hebreos 11:1). Per la Biblia raniʼ xi ngú fe né xi ngú esperanza (1 Corintios 13:13).

Par guienno láani: órni ranabno toib favor ximigno ni napno confianz napno esperanza, que sacnébu lóono. Esperanza ni napno napni prueby portín napno fe ló ximigno, rimbutzaayno láabu né ma bislooybu que natzaaybu né lóono. Fe né esperanza radzakni saʼni per diti toibsi midid láani. ¿Ximod labúu gapno esperanza lóo Dios?

Ro ralainy esperanza

Ronoʼ Jehová Dios ralainy esperanza. Ló dzú ni see buñ goleʼ laabu «esperanza xtuny Israel» (Jeremías 14:8). Guirá esperanza ni gop xcudxbu golainyni ronoʼbu, por ngú labúu guinino que láabu gócbu esperanza xtuny xcudxbu. Per diti gopyibu esperanza ló nitisi cós. Dios bidudy prueby layibu par gapyibu esperanza. Dios bislooy layibu por xidalguixo íz que labúu rony cumplirbu guirá ni ma goniʼbu. Josué, ni gosanir nisló gudx Israel, goniʼbu diitzreʼ: «Lóoto nandxichto [...] que guirá diitz ni ma goniʼ Jehová Dios ma góc cumplirni» (Josué 23:14).

Ma godudy xidal mil íz, né buñ nap confianz lóo Jehová que rony cumplirbu ni ma goniʼbu. Ló la Biblia sieed xidal cós ni ma goniʼ Dios gony né láaca ximod ma góc cumplirni. Guirá profecías ni sieed ló la Biblia nacni suusi ma góc cumplirni.

Por ngú labúu guinino que nacni toib libro ni nap esperanza. Órni golno mod gon Dios buñgudxlio lóo dzú ni see sapno más esperanza lóbu. Apóstol Pablo bicaʼ ndeʼ: «Guirá cós ni cuá ló dzú ni see, cuáni par guisuidyni lóono, guirá ni caa ló Xtiitz Dios racnéni lóono gony guantaryno, rasialdóni xcalnabanyno né radudyni esperanza lóono» (Romanos 15:4).

¿Xí esperanza radudy Dios lóono?

¿Pu ór raquiinno esperanza? Órni buñ ma nan que ma gaity, ¿scú ja? Per xidal buñ órni raity xfamilbu ni ronladxbu rasac naganbu gapbu esperanza. Scú láani, diti noʼ stoib cós xomod galgoity, racanalni lóono guirá lad. Labúu guilaano de láani por tidxósi tiemp per después ma diti labúu sonyno xitcal. Por ngú la Biblia rabeʼ laani «último enemig» (1 Corintios 15:26).

Per ¿ximod guidzelno esperanza órni noʼ galgoity? Versículo ni rasetlaa último enemig náni que «sanitlóni». Jehová Dios nap más galnadip que galgoity, né ma bislooybu láani xidal buelt. ¿Ximod? Golísbu buñ lad gueʼet. La Biblia rasetlaa gaʼ buelt ro biquiin Dios xcalnadip par golísbu buñ lad gueʼet.

Toibtica buelt, Jehová bidudybu galnadip Xiimbu Jesús par nalísbu Lázaro lad gueʼet, ximigdxinbu ni ma sané tap govitz de goló goity. Jesús buny galrradziguiaʼ reʼ nisló xidal guixo buñ, diti bunybu láani nagach (Juan 11:​38-48, 53; 12:​9, 10).

Sigory ranabdiitzlo xigony golísyibu buñ ni ma goity, janlo sioʼxyibu né saityibu stoib la. Per guirá galrradziguiaʼ ni góc dzúcu diti nosi racnéni lóono guiniiny lóono que ximigno o xfamilno guibany stoib: napno razón par gonyno crer que siásyibu stoib. Scú láani, napno toib esperanza ni nigolú.

Jesús goniʼ: «Naʼ ngú ni ralís gueʼet né naʼ ngú galnabany» (Juan 11:25). Láabu sacaʼbu xcalnadip Jehová par guilísbu buñ lad gueʼet ló guidopynac Gudxlio. Láaca goniʼbu: «Sadxin ór guirá ni noʼ lainy baʼ sien xirudxbu [xtuny Cristo] né sareʼyibu» (Juan 5:​28, 29). Guirá ni noʼ lainy baʼ labúu siásyibu par guibanyibu ló toib Gudxlio móz.

Profeta Isaías goniʼ ximod guiás buñ lad gueʼet: «Xqueʼetlo sabany. Xqueʼeta siás. ¡Colcueʼ bacaʼal lóto né colguicaʼ rudx de galrrabaladx, lóoto ni noʼto lainy yoo! Portín xpiniʼlo nacni xomod biniʼ ni riab rosil, né layoo sadudy lagary que buñ ni ma goity siás» (Isaías 26:​19.

¿Rasialdó promesa reʼ xcalnabanyno ja? Buñ ni ma goity noʼyibu ló toib lagary ro diti noʼ xi labúu sacyibu, noʼyibu xomod riotzay toib badaʼyen lainy xpidzan xinaʼ. Scú láani buñ ni noʼ lainy baʼ riotzayibu ló memoria xtuny Dios ni nap xiroʼ galnadip (Lucas 20:​37, 38). Né mápa mer siásyibu lad gueʼet par guibanyibu nakit ló toib lagary sacróyen, né xomodca toib badaʼbesien xfamilbu rabaladx órni ralbu. Ma bienno dada órni noʼ galgoity noʼ esperanza.

Mod labúu gacné esperanza lóono

Pablo rasuidy lóono que nigolú rasac esperanza. Bisetlabu que noʼni lad armadura espiritual: casco (1 Tesalonicenses 5:8). ¿Xí bidudybu diitz né ndeʼ? Ló dzú ni see, órni soldad goyee ló guerr biquiinyibu toib casco de guip. Casco reʼ gocnéni layibu par diti ñoʼ xi ñac guicyibu. Xomodca ran toib casco guic buñ scúca esperanza ran xpensaryno. Pal napno toib esperanza ló guirá ni ma goniʼ Dios gony, diti sioʼ xitcal ni cueʼ paz xtunyno ná cacalóno galnagan. ¿Guirácano raquiinno casco reʼ ja?

Pablo biquiin stoib ilustración ni radzak né esperanza mod ná Dios. Bicaʼbu ndeʼ: «Esperanza reʼ ranásdxichni lóono xomod toib ancla ranásdxichni toib bark» (Hebreos 6:19). Pablo godudybu ló desgrasy né bark por ngú bimbubu que nigolú rasac toib ancla, órni goyoʼ buroʼdant rasalbu ancla lainy nisdaʼ. Pal ranásdxichni yoo, bark reʼ rony guantaryni guirá buroʼdant né diti noʼ xi racni.

Né scúca, pal guirá ni ma goniʼ Dios nacni toib esperanza par lóono, né nandxichno que scú sácni, esperanza reʼ labúu gacnéni par guicalóno nitisi galnagandaʼ. Jehová radudy xtiitz que mápa mer buñ ma diti sadudy ló galrrioʼob xtol guerr né láaca ma diti sioʼ galrrioʼob (bibiʼ cuadriyen ni sieed ló página 10). Órni rapno confianz ló esperanza reʼ labúu gacnéni lóono par guirebuʼ ni gonyno, portín láaca racnéni lóono gonyno ni ná Dios xalagary gonyno cós yox mod ná gudxliogoxreʼ.

Esperanza ni radudy Jehová looy láaca labúu gaplo láani. Raniiny láabu que looy guibanylo xomod goniiny láabu nírcu. Raniiny láabu que «guirá clas buñ guilaa». ¿Ximod labúu guilaano? Ni raquiin gonylo ngú «guimbutzaaylo ni nigolú» (1 Timoteo 2:4). Lóodo ni bicaʼdo revista reʼ rony animardo looy guimbutzaylo ni nigolú ni sieed ló Xtiitz Dios la Biblia. Esperanza ni guidudy Dios diti noʼ chú rigaʼl láani.

Esperanza reʼ racnéni lóono par diti guireʼganno, portín Dios radudy galnadip lóono par tzagaʼlno nitisi metas par gonyno xchiimbu (2 Corintios 4:7; Filipenses 4:13). ¿Clas esperanza reʼ raquiinno ja? Pal riatz esperanza looy né cayopylo láani, goloʼ gan xcalnabanylo. Labúu saplo láani. Labúu guidzelo láani.

[Cuadriyen né dibuj]

Napno razón par gapno esperanza

Tipnés textos ni sieed ló la Biblia ni labúu gacné lóono par gapno esperanza:

◼ Dios radudy xtiitz guibanyno sacró.

Xtiitzbu la Biblia náni que Gudxlio reʼ sácni toib lagary móz ro labúu guiguaʼ famil toibsi né sacróyen (Salmo 37:​11, 29; Isaías 25:8; Apocalipsis 21:​3, 4).

◼ Dios diti labúu rascú.

Láabu rianladxbu guirá clas galrrascú. Jehová nacbu nigolú nayaa; por ngú diti labúu rascúbu (Proverbios 6:​16-19; Isaías 6:​2, 3; Tito 1:2; Hebreos 6:​18).

◼ Diti noʼ chú labúu rigaʼl xcalnadip Dios.

Nosi Jehová nap xiroʼgolu galnadip. Diti noʼ ni toib ni noʼ lainy guibá né ló Gudxlio ni labúu guicaa gonybu ni ma goniʼbu (Éxodo 15:11; Isaías 40:​25, 26).

◼ Dios raniiny guibanyno tipzó.

(Juan 3:​16; 1 Timoteo 2:​3, 4.)

◼ Dios nap esperanza que labúu gonyno xinésni.

Láabu rabiʼbu xi cualidades sacróyen napno né xi cós sacróyen cayonyno, diti rabiʼbu pu cachéno (Salmo 103:​12-14; 130:3; Hebreos 6:10). Napbu esperanza que sonyno xinésni, né rabaladxbu órni ronyno láani (Proverbios 27:11).

◼ Dios radudy xtiitz que sacnébu lóono par tzagaʼlno metas xtunyno.

Lóono diti non guidzuibyno. Dios radudy espíritu santo lóono, toib fuers ni más nadip (Filipenses 4:13).

◼ Nosi lóo Dios gapno esperanza.

Labúu gapno confianz lóo Jehová, dipa sascúbu lóono (Salmo 25:3).

[Dibuj]

Xomodca toib casco ran guic buñ scúca esperanza ranni xpensary buñ.

[Dibuj]

Xomodca toib ancla ranásdxichni toib bark, scúca esperanza ranásdxichni lóono.

[Reconocimiento]

Por gentileza de René Seindal/Su concessione del Museo Archeologico Regionale A. Salinas di Palermo