ARTÍCULO NI GUISUIDYNO 31
«Colguisagaʼdxich, diti guisian gonyto láani»
«Por ngú, xhermana ni nadxiʼya, colguisagaʼdxich, diti guisian gonyto láani» (1 COR. 15:58).
CANCIÓN 122 ¡Mantengámonos firmes, inmovibles!
NI GUISUIDYNO a
1, 2. ¿Ximod toibsi midid nacno lóono ni nacno cristianos xomod rascacielos ni noʼ Tokio? (1 Corintios 15:58).
ÓRNI ma cadopy íz setent, goyaʼ toib rascacielos de 60 píis lainy gudx ni laa Tokio (Japón). Órni buñ bibiʼ láani bunyibu pensary pal labúu ñony guantaryni guirá xo rodann ni radudy cu. Per ¿xí buny guirá ingenier par diti ñabni? Bisaʼyibu láani par nasagaʼdxichni né láaca nasisni, modreʼ diti ñoʼ xi ñacni. Lóono ni ronyno xchiin Jehová láaca nacno xomod rascacielos cu. ¿Ximod?
2 Buñ ni rony xchiin Jehová né midid guisagaʼdxichbu né gacbu flexible. Raquiin guisagaʼdxichbu órni guisobdiitzbu xiley Jehová (bíil 1 Corintios 15:58). Non tzoʼbu puext par guisobdiitzbu né diti cueʼbu xiley Jehová tiplad. Raquiin tzoʼbu ló razón, ndeʼ radudy diitz, gacbu flexible órni raquiin gonybu láani (Sant. 3:17). Pal ronyno pensary modreʼ, diti sadudy midid sacno buñ nanoy nili sabiʼno sacró guiráxadit cós. Ló artículo reʼ sasuidyno pu ór raquiin guisagaʼdxichno né diti guiañ gonyno ni ná Dios. Láaca sasuidyno gáay cós ni raquiin Buñdzab par cuegan de guisagaʼdxichno né xi láani gonyno par guicalóno láabu.
¿PU ÓR RAQUIIN GUISAGAʼDXICHNO?
3. ¿Xí leyes radudy Jehová lóono ló Hechos 15:28, 29?
3 Jehová ngú ni noʼ más guiaʼ ni radudy leyes lóono, né guirá ór ni radudybu xcudxbu nayaani (Is. 33:22). Por ejemplo, Tidxó buñ ni nap xiroʼ Galnan ni goyoʼ ló siglo primero, goniʼbu tzón cós ro lóono ni nacno cristianos non guisagaʼdxichno. Bisetlayibu que 1) nosi Jehová gony adorarno diti stipnés cós, 2) gapno respet runy xomod toib cós ni rasac né 3) guisobno galmandary ni sieed ló la Biblia ro ritlaa diti gonyno galyoxh (bíil Hechos 15:28, 29). ¿Ló naareʼ ximod labúu guisagaʼdxichno ló guionca cós reʼ?
4. ¿Xí radudy diitz gony adorarno nosi Jehová? (Apocalipsis 4:11).
4 Rabeʼno idolatría tiplad né nosi Jehová rony adorarno. Jehová gochbu israelitas que nosi láabu ñony adoraryibu (Deut. 5:6-10). Né órni Buñdzab biyopy mod nacantaʼbu Jesús, nayadit gochbu Buñdzab que nosi Jehová gony adorarno (Mat. 4:8-10). Por ngú, diti rony adorarno dioxh falz, nili rasanadxno buñgudxlio, né láaca diti rasanadxno buñ ni rasanir lad toib religión, ni rasanir lad partid, ni nan raguit, nili buñ ni rabeʼ películas né ni rareʼ ló televisión. Xalagary ngú rioʼno xilad Jehová ni Bisaʼ guirá cós ni noʼ né nosi láabu rony adorarno (bíil Apocalipsis 4:11).
5. ¿Xigony rony respetarno vida né runy xomod cós ni nigolú rasac?
5 Napno respet vida né runy xomod cós ni nigolú rasac. ¿Xigony? Portín Jehová ná que runy ngú rony representarni vida, né vida nigolú rasacni portín nacni xcalrrascad Jehová (Lev. 17:14). Órni Jehová bidudy permís que buñ ñoo beʼel, gochbu buñ que diti non guáyibu runy (Gén. 9:4). Láaca gochbu láani gudx Israel (Lev. 17:10). Ló siglo primero Tidxó buñ ni nap xiroʼ Galnan bunyibu que cristianos ñap respet runy (Hech. 15:28, 29). Lóono láaca rasobno consej reʼ órni rioʼno ló doctor. b
6. ¿Xí láani sacné lóono par guisobno guirá ni rony mandary Jehová?
6 Ronyno dada rutirigaʼlni lóono por guisobno ni rony mandary Jehová lóono ló la Biblia ro ritlaa diti gonyno galyoxh (Heb. 13:4). Apóstol Pablo raiby lóono ndeʼ: «Pór ngú, colguigaity guirá cós mal ni noʼ lainy xcalnabanyto». Diitz reʼ racnéni lóono par guisagaʼdxichno né par cueʼno tiplad guirá cós yohx ni ritzanló ló xpensaryno. Diti rabiʼno nili ronyno cós ni labúu gony que gonyno galyoxh (Col. 3:5; Job 31:1). Né órni ma noʼno ló toib tentación nimaca rabeʼno nitisi pensary o cós ni labúu gony que galsitno de Jehová.
7. ¿Xí láani non coʼno guicno, né xigony?
7 Jehová raniiny guisobno né guidopy xcalnabanyno (Rom. 6:17). Galmandary xtuny Jehová né xileybu noʼni par gacnéni lóono né diti labúu guitzaʼno láani (Is. 48:17, 18; 1 Cor. 6:9, 10). Raniiny lóono gonyno dada rutirigaʼlni lóono par gonyno xchiin Jehová né gonyno xomod buny salmista ni goniʼ: «Ma goloʼya guica guisoba mandamientos xtunylo guirá ór dada por tipzó» (Sal. 119:112). Nandxichno que Buñdzab rayopy mod par guisianno Jehová. ¿Xí cós raquiimbu?
¿XÍ CÓS RAQUIIN BUÑDZAB PAR CUEGAN LÓONO?
8. ¿Xigony raquiin Buñdzab persecución?
8 Persecución. Par cueganbu lóono, Buñdzab racaló lóono ló sentido físico né emocional. Ni raniiny láabu ngú galsitno de Jehová (1 Ped. 5:8). Buñ bunynaa né bigaity cristianos del siglo primero portín goloʼyibu guicyibu nasobyibu Jehová (Hech. 5:27, 28, 40; 7:54-60). Ló xtzúno, Buñdzab láaca raquiimbu persecución. Toib ejemplo láani ngú ni racaló xhermanno ni noʼ Rusia né stipnés lagary. Láaca xidal xhermanno racalóyibu stipnés clas oposición.
9. Golexa né toib ejemplo xigony nigolú rasac guiguanano ló xtramp Buñdzab.
9 Tramp ni raquiin Buñdzab. Láabu racalóbu lóono nalandiguié, raquiimbu xtrampbu (Efes. 6:11). Guibiʼno ejemplo xtuny Bob ni goyoʼ lainy hospital par ñac operarbu. Láabu gochbu doctor que dipa sacaʼbu runy ñac nitisi ñac. Doctor cu gosaguel ñony láani scú. Per goxin antes de ñac operarbu órni xfamilbu ma diti noʼ né láabu, ni racaʼ anestesy goyguenbu Bob. Goniʼbu que Bob diti saca runy per sapyibu láani cu pal naquiinyibu láani. Bunyibu pensary que Bob nasaguel portín ma diti noʼ xfamilbu né láabu. Per Bob gosagaʼdxichbu né goniʼbu que diti sacaʼbu runy ñac nitisi ñac.
10. ¿Xigony mod nac xpensary buñ ni diti rasob Jehová ragoʼni lóono ló riesga? (1 Corintios 3:19, 20).
10 Mod rony pensary buñgudxlio. Pal nasaló ñonyno pensary xomod rony pensary buñgudxlio, labúu nasianno Jehová né ma diti nasobno ni rony mandarybu (bíil 1 Corintios 3:19, 20). Casi guirá ór, «sabiduría xtuny gudxlio reʼ» ronyni que tzoʼno galrrasaʼ pór lóosino. Guibiʼno ni góc lainy congregaciones de Pérgamo né Tiatira. Tipnés cristianos gosaló bunyibu xomod buñ ni bigoo layibu ni góc buñyox né bieen dioxh falz. Jesús nadipien bidudy consej chop congregación reʼ, portín bidudyibu lagary ñoʼ galyoxh lainyni (Apoc. 2:14, 20). Ló naareʼ buñ rayopy mod gonyno pensary mod ronyibu pensary. Sigory tipnés xfamilno o tipnés buñ ni rimbuno rony animar lóono par gonyno ni ná xcalnabanyno xalagary guisobno Jehová. Labúu gaibyibu lóono que diti mal láani ngú gonyno mod ná xcalnabanyno, né que guirá ni ná la Biblia ma godudy xtzúni.
11. ¿Xí láani diti non gonyno?
11 Rioʼ ór labúu gonyno pensary que tipnés instrucciones ni radudy Jehová lóono riatz loni. Rioʼ ór dada labúu guiniiny lóono gonyno «ni diti sieed ló Xtiitz Dios» (1 Cor. 4:6). Ló xtzú Jesús líderes religiosos biabyibu ló galkié reʼ. Goloʼyibu más reglas ló ley né pór ngú góc naganni par buñ (Mat. 23:4). Nayadit nac instrucciones ni radudy xcudx Jehová né ni radzelno ló Xtiitzbu. Diti noʼ xi portín coʼno más loni (Prov. 3:5-7). Por ngú diti ronyno ni diti sieed ló la Biblia nili raibyno buñ xi láani non gony.
12. ¿Ximod raquiin Buñdzab galnan ni diti raquiin?
12 Galnan ni diti raquiin. Buñdzab raquiin «galnan ni diti noʼ pu raquiin» par guiscúbu né guitzobu buñ (Col. 2:8). Por ejemplo, ló siglo primero biquiimbu xcalnan buñ, stipnés xpensary buñ, xcalrrasuidy judíos ni diti sieed ló la Biblia né crenys que cristianos non nasob xiley Moisés. Gocni galnan ni diti noʼ pu raquiin portín bunyni que buñ ma diti nasobyibu Jehová ro ralainy sabiduría. Ló naareʼ Buñdzab raquiimbu televisión né redes sociales par guichetzbu galrrascú ni raniʼ buñ ni rasanir lad partid. Ló galguitz COVID-19 nigolú goyoʼ xidal galrrascú. c Testigos xtuny Jehová ni bisobdiitz instrucciones ni bidudy xcudx Jehová diti goyoʼyibu ló galnagan nili goyoʼyibu ló galrrasaʼ xomod stipnés buñ ni cuacuent galrrascú de clas reʼ (Mat. 24:45).
13. ¿Xigony diti guidudyno lagary tzoʼ cós ni gony distraer lóono?
13 Distracciones. Diti non guialadxno «xi láani ngú ni más rasac» (Filip. 1:9, 10). Distracciones ragobni xtiempno, tiemp ni labúu naquiinno par ñonyno cós ni ñacné lóono. Cós ni ronyno guirá dzú xomod ni guáno, ni gueeno, galnakit né dxiin labúu ñony distraerni lóono, pal nadudyno lagary nasacni más par lóono (Luc. 21:34, 35). Guirá dzú xidal buñ radíil né saʼ por mod rony buñ pensary de cós ni rac ló política o stipnés cós. Diti non guidudyno lagary que cós de clascu gony distraerni lóono. Pal ronyno ngú diti labúu guisagaʼ galayno, nili lainy xcalnabanyno. Buñdzab raquiimbu gáay cós reʼ par cueganbu lóono gonyno xinésni. Guibiʼno xi labúu gacné lóono guicalóno láani né guisagaʼdxichno.
¿XÍ LÁANI LABÚU GONYNO PAR LABÚU GUISAGAʼDXICHNO?
Par guisagaʼdxichno, gonyno pensary xigony góc dedicarno né goyonisno, guisuidyno Xtiitz Dios né gonyno pensary loni, gapno toib galnabany dxich né gapno confianz lóo Jehová. (Bibiʼ párrafos 14 a 18).
14. ¿Xí láani labúu gacné lóono par labúu guisagaʼdxichno cueʼ Jehová?
14 Gonyno pensary xigony góc dedicarno né goyonisno. Bunyno láani portín goniiny lóono ñoʼno xilad Jehová. Bisetnaladx xi láani gocné looy par ñanlo que ndeʼ ni nigolú. Bimbulo Jehová, bibiʼlo láabu xomod Bixioslo ni noʼ guibá, goplo respet, gondxiʼlo láabu, goniʼs fe xtunylo né góc arrepentirlo de galkié ni bunylo. Bisianlo de gonylo cós ni rianladx Jehová né gosaló bunylo cós ni rioladxbu. Bialdó xcalnabanylo órni gonlo que Jehová rony perdonar looy (Sal. 32:1, 2). Goloʼlo guiclo ñeelo reunión né ñaibylo stipnés cós sacróyen ni casuidylo. Nigoreʼ ni ma góc dedicarlo né ma goyonislo casaalo ló néz ni riné buñ ló galnabany né ma goloʼlo guiclo diti guisianlo láabu (Mat. 7:13, 14).
15. ¿Ximod racnéni lóono ni rasuidyno Xtiitz Dios né ronyno pensary loni?
15 Guisuidyno Xtiitz Dios né gonyno pensary loni. Toib yac raquiin tzoʼ looni guetdii par guisagaʼdxichni. Modcuca lóono láaca raquiinno toib fe dxich ló la Biblia par labúu guisagaʼdxichno. Conforme caniʼs toib yac looni láaca raniʼsni né ranásdxichni yoo. Órni rasuidyno Xtiitz Dios né ronyno pensary loni rac dxich fe xtunyno né ranno que xcalrrasuidy Dios ngú ni más galán (Col. 2:6, 7). Gonyno pensary ló xpiin Jehová de dzú ni see, ni cuaʼ xcalnasác Jehová portín cuacuentyibu instrucciones né consej xtuny Jehová. Por ejemplo, Ezequiel bibiʼtzaybu toib ángel ni goleʼ midid templo ni bibiʼbu ló toib visión. Visión reʼ diti nosi buny dxichni fe xtuny Ezequiel láaca rasuidyni lóono ximod non gapno respet Jehová par guienno láabu (Ezeq. 40:1-4; 43:10-12). d Láaca racnéni lóono cueʼno tiemp par guisuidyno Xtiitz Dios né gonyno pensary loni.
16. ¿Ximod gocnéni Bob par ñapbu toib galnabany dxich? (Salmo 112:7).
16 Gapno toib galnabany dxich. Ló toib canción, rey David goniʼ que dipa nasian de nadxiʼbu Jehová. Goniʼbu láani scareʼ: «Xcalnabani noʼni dxich, Dios» (Sal. 57:7). Lóono láaca labúu gapno toib galnabany dxich né gapno confianz lóo Jehová né guidopy xcalnabanyno (bíil Salmo 112:7). Guinino de Bob ni bisetlano ló párrafo 9. ¿Ximod gocnéni láabu ni gopbu toib galnabany dxich? Órni ni racaʼ anestesy gochbu Bob que puextca sapyibu runy pal guiquiinyibu láani, láabu cuapybu que pal doctor naquiin runy nimaca narebuʼ cu. Bob ná: «Goona ni non ñoni né diti goyoʼya ló galrrasaʼ xi nasacloya».
Pal rac dxich fe xtunyno, labúu guisagaʼdxichno ló nitisi prueby ni guicalóno. (Bibiʼ párrafo 17).
17. ¿Xí rasuidyno ni gosaclóo Bob? (Láaca bibiʼ dibuj).
17 Bob diti golésbu dada nadxiimbu hospital par nasagaʼdxichbu. Maca goloʼbu guicbu xi non ñonybu. Primer, goniiny láabu nagoʼ nakitbu xcalnabany Jehová né guidopy xcalnabanybu. Ni rarop, bisuidybu la Biblia né bíilbu publicaciones ro ritlaa que gap buñ respet runy né vida. Pór último, gondxichbu que Jehová sasiab galnasác ronoʼbu pal nasobbu ni rony mandary Jehová. Xomodca Bob, labúu gapno toib galnabany dxich par guicalóno nitisi prueby.
Barac né xpuñ racanalyibu soldad xtuny Sísara (Bibiʼ párrafo 18).
18. ¿Xí rasuidy ejemplo xtuny Barac lóono? (Bibiʼ dibuj ni sieed laidy guiich reʼ).
18 Gapno confianz lóo Jehová. Gonyno pensary ló juez Barac né mod galán ni goyeeni láabu por ni bisobbu instrucciones ni bidudy Jehová. Ló dzúcu israelitas diti goyoʼyibu puext par ñeeyibu ló guerr. Diti gopyibu ni toib escudo nili toib lanza. Ná scú Jehová gochbu Barac que ñeebu nadíilbu né nacalóbu Sísara né ejército cananeo, ni nigolú gop guip (Juec. 5:8). Profetisa Débora gochbu Barac que ñetjbu de dainy Tabor ló láach par nacalóbu Sísara né 900 carret. Ná ro láach carret labúu naxonyni más, Barac bisob. Laʼga soldad cayetj ló dainy Tabor, Jehová bixelbu toib guiédaʼ. Guirá carret gogni ló been, né Jehová buny que Barac buny gan (Juec. 4:1-7, 10, 13-16). Gaca labúu gac né lóono: Jehová sacné lóono gonyno gan pal rapno confianz lóbu né rasobno guirá instrucciones ni radudy xcudx Jehová lóono (Deut. 31:6).
COʼNO GUICNO GUISAGAʼDXICHNO
19. ¿Xigony náni looy guisagaʼdxichlo?
19 Laʼga nabanyno ló gudxliogoxreʼ gonyno dada rutirigaʼlni lóono guisagaʼdxichno (1 Tim. 6:11, 12; 2 Ped. 3:17). Diti guidudyno lagary que persecución, xtramp Buñdzab, xpensary buñgudxlio, galnan ni diti noʼ pu raquiin, né distracciones guisisni lóono (Efes. 4:14). Guisagaʼdxichno né diti guiañ gonyno láani, guirá ór coʼno guicno gandxiʼno Jehová né guisobno ni nábu. Né láaca tzoʼno ló razón. Ló artículo ni sieed sabiʼno ximod Jehová né Jesús nacyibu razonables né ximod guisuʼno layibu.
CANCIÓN 129 Servimos con aguante
a Dada ló xtzú Adán né Eva, Buñdzab goniʼ que tigaano non ganno xi ngú cós tzaay né cós mal. Láabu rioladxbu que láaca scúca gonyno né xiley Jehová né guirá instrucciones ni radudy xcudx Jehová. Artículo reʼ sacnéni lóono par diti gonyno pensary xomod rony pensary xcudxliogox Buñdzab, né coʼno guicno guisobno Jehová ló guirá cós.
b Par ganlo ximod labúu gapno respet mod ni rony pensary Jehová de runy bíil lesiony 39 de libro Bibany goxtiguie.
c Goyee ló jw.org né bíil artículo ni laa, «Cómo protegerse de la información falsa».
d Par ganlo más bibiʼ capítulos 13 né 14 xtuny libro ni laa, La adoración pura de Jehová: ¡por fin restaurada!