1. ¿Xí cós gonlo órni bisuidylo la Biblia?

 ¿RASETNALADXLO balaati bisuidylo órni goyoʼ ni bisuidy looy ni ná la Biblia la? Sigory bidziguiaʼlo órni gonlo que Dios noʼ laabu. Né sigory bialdó xcalnabanylo órni gonlo que diti noʼ toib infierno ro rony castigar Dios buñ. Sigory láaca goyoʼ nakitlo órni bisuidylo que buñ ni ronladxlo siásyibu stoib né labúu sioʼlo né layibu lainy lagary Móz.

2. ¿Xí stoib mod bislooylo que goniʼsralo? (Efesios 5:1, 2).

² Conforma bisuidylo Xtiitz Dios, goniʼs xcalnadxiʼlo por Jehová. Né galnadxiʼcu bichiinni looy par nasoblo ni casuidylo. Né xcalrracné principios bíblicos guirá ni goloʼlo guiclo, bunylo láani más galán. Láaca bitzaʼlo mod bunylo pensary, né mod bunylo portín goniiny looy gonylo ni ná Dios. Xomodca toib mbiox rasuʼ mod rony bixios, looy láaca bisuʼlo mod rony Bixioslo ni noʼ guibá (bíil Efesios 5:1, 2).

3. ¿Xí galrranabdiitz labúu gonyno lóocano?

³ Labúu guinabdiitzno ndeʼ: «¿Nadxiʼya Jehová más nigoreʼ que órni goyonisa la? ¿Mod roni pensary né mod roni nacni xomod xtuny Jehová la, máspa órni raslooya galnadxiʼ xhermana la?». Pal moda ma cachichen xcalnadxiʼno, diti guireʼganno. Ngú ni gosaclóo cristianos ni goyoʼ ló siglo primero. Per Jesús diti buny pensary que ma diti raquiinyibu, né láaca diti sabiʼbu lóono scú (Apoc. 2:4, 7). Nanbu que labúu guiscuanyno galnadxiʼ ni gosacno órni bisuidyno galnigolú.

4. ¿Xí sasuidyno ló artículo reʼ?

 ⁴ Ló artículo reʼ, sasuidyno ximod gonyxiroʼno galnadxiʼ ni rasacno por Jehová né saʼno. Né láaca sasuidyno ximod racnéni lóono né stipnés buñ órni ronyno láani.

5, 6. a) ¿Xí galnagan cualó apóstol Pablo órni bunybu xchiin Jehová? b) ¿Xí bichiin láabu par ñonyrabu xchiin Jehová?

⁵ Apóstol Pablo goyoʼ nakitbu órni bunybu xchiin Jehová, per láaca cualóbu xidal galnagan. Casi guirá ór gosaabu sitgoluʼ, ná góc naganni par láabu. Ro gosaabu, goyoʼbu ló «riesga xtol guʼuc» né goyoʼbu «ló riesga xtol buñ gobáan». Né goyoʼ ór xi enemigbu bunynaa láabu (2 Cor. 11:23-27). Né láaca goyoʼ ór, xhermancabu diti bidudy guixquix por guirá xtem ni buny Pablo por gocné layibu (2 Cor. 10:10; Filip. 4:15).

⁶ ¿Xí láani bichiin Pablo par bunyrabu xchiin Dios? Bisuidybu xidal cós mod nac Jehová né xcalrracné la Biblia né mod godudybu. Gondxichbu que Jehová binladx láabu (Rom. 8:38, 39; Efes. 2:4, 5). Né Pablo gondxigoluʼbu Jehová. Bislooybu galnadxiʼcu xpiin Jehová né gocnérabu guirá biinreʼ (Heb. 6:10).

7. ¿Xí láani sacné lóono par niʼs galnadxiʼ ni napno Jehová?

⁷ Par niʼs galnadxiʼ ni rasacno por Dios, non guisuidyno Xtiitzbu né gan. Órni golno la Biblia, ganno xi rasuidyni lóono de Jehová. Non guinabdiitzno lóocano: «¿Ximod raslooy guirá versículos reʼ que Jehová nadxiʼ naʼ? ¿Né xí razón radudyni naʼ par gandxiʼya Jehová?».

8. ¿Ximod racné oración lóono par niʼs galnadxiʼ ni rasacno por Dios?

⁸ Toib cós ni láaca racné lóono par niʼs galnadxiʼ ni rasacno por Jehová, láani ngú gonyno oración guirá dzú (Sal. 25:4, 5). Jehová sacapy oración ni ronyno (1 Juan 3:21, 22). Khanh, b toib hermana ni rabés Asia, goniʼ: «Primer nosi gondxiʼya Jehová por ni goona de láabu. Per galnadxiʼcu goniʼsni órni bidudi cuent ximod cuapybu guirá oración ni buni, né ngú bichiinni naʼ ñoni ni ranabbu».

9. ¿Ximod bislooy Timoteo que gondxiʼbu xhermanbu?

⁹ Chop tzón íz después ni góc Pablo cristiano, bimbubu toib mbioxhlas galán ni góc laa Timoteo. Mbioxhlas reʼ gondxiʼbu Jehová né láaca gondxiʼbu stipnés buñ. Después, Pablo bisetlaa de Timoteo a buñ filipenses né goniʼbu ndeʼ: «Diti napa stoib buñ ni noʼ puext gacné naʼ xomod láabu, láabu nigolú rioʼbu galrrasaʼ por lóoto» (Filip. 2:20). Pablo diti goleʼ loguiaʼbu que Timoteo ratudy tzaay discurs o stipnés cós ni nanbu ronybu. Ni más bidziguiaʼ Pablo de Timoteo láani ngú, balaati gondxiʼbu herman. Sigory guirá herman ma goniiny layibu que niguen Timoteo layibu (1 Cor. 4:17).

10. ¿Ximod bislooy Anna né Tzeʼel galnadxiʼ ni gosacyibu por xhermanyibu?

¹⁰ Lóono láaca rayopyno mod gacnéno xhermanno (Heb. 13:16). ¿Rasetnaladxto Anna, ni bisetlano ló artículo ni godudy la? Después de toib guiérodann, láabu né tzeelbu goyeeyibu  goyguenyibu toib famil ni nac Testigo. Bibiʼyibu que biab guic yoʼ lidxyibu. Por ngú, familcu diti gop lairy nayaa par ñoc. Anna rasetlaa xi láani bunybu né tzeelbu: «Cuaʼdo xhapyibu, godipdo láani, bunydo planch láani, né bidxiguetdo láani layibu. Ni bunydo diti góc naganni par lóodo, per, por ni bunydo láani, nigoreʼ radzaktzaydo saʼdo». Galnadxiʼ bichiinni Anna né tzeʼel par nadudyibu galrracné ni caquiin herman (1 Juan 3:17, 18).

11. a) ¿Ximod labúu ñacnéni stipnés mod raslooyno galnadxiʼ? b) Mod ná Proverbios 19:17, ¿ximod rasac Jehová órni raslooyno galnadxiʼ saʼno?

¹¹ Órni ragobiono sacró stipnés né ronladxno layibu, casuʼno mod rony né mod rony pensary Jehová. Ni ronyno rutirigaʼlni lóono par gacnéno stipnés, noʼ ni rabiʼ láani. Sigory dipa sanno balaati rasac par stipnés ni ronyno. Khanh, hermana ni bisetlano ló párrafo 8, rasetnaladxbu né galrronladx guirá buñ ni gocné láabu né nábu: «Radudi guixquix guirá herman ni goyné naʼ predicación. Nigolú buñtzay gocyibu. Bityopyibu naʼ, biruʼyibu naʼ nitódo guet, né goysanyibu naʼ nayaa nasac lidxi. Nigoreʼ radudi cuent que nigolú bunyibu dxiin por naʼ, per bunyibu láani né galrronladx». Nigolú, diti guirá buñ sadudy guixquix por ni gonyno por layibu. Khanh raniʼ ndeʼ de guirá herman ni gocné láabu: «Raniiny naʼ goni alga por layibu, mod bunyibu láani, per diti naana púti rabés tipnésyibu nigoreʼ. Per, Jehová nan púti rabésyibu por ngú ranaba láabu guisiabbu galnasác loguiaʼyibu por naʼ». Scú láani, Jehová rabiʼ dada cós mitien ni ronyno por stipnés. Rabiʼbu láani xomod toib sacrificio ni rasac  né xomod toib diʼin ni nainy quiixbu (bíil Proverbios 19:17).

12. ¿Ximod labúu guislooy buñguieeu ni ma goyonis que nadxiʼyibu congregación? (Láaca bibiʼ retrat).

¹² Pal naclo toib herman buñguieeu, ¿ximod labúu guislooylo que nadxiʼlo congregación? Gocné layibu. Toib mbioxhlas ni laa Jordan gonabdiitzbu toib anciano xi labúu ñonybu par labúu ñacnébu herman. Anciano reʼ buny felicitar láabu por guirá ni ma bunybu, né gochbu Jordan tipnés cós ni labúu ñony. Por ejemplo, gochbu herman reʼ que ñonybu xtem por nadxiimbu tempran ló reunión né naniʼbu dioxh stipnés, ñony comentarbu ló reunión, nareʼbu predicación né grupo xtunybu né nayopybu mod par labúu ñacnébu herman. Órni bisobbu guirá consej reʼ, Jordan diti nosi bunybu puext par nacaʼbu más dxiin, láaca goniʼs galnadxiʼ ni gosacbu por herman. Láaca bisuidybu que órni toib herman radxin rac siervo ministerial, diti órcu rasalóbu racnébu herman; xalagary ngú, ronyrabu láani (1 Tim. 3:8-10, 13).

13. ¿Xí láani gocnéni Christian par labúu gócbu anciano stoib?

¹³ ¿Ma góclo anciano o siervo ministerial la? Jehová diti rialadx dxiin ni ma bunylo né galnadxiʼ ni bunylo láani (1 Cor. 15:58). Né racábu cuidad galnadxiʼ ni looy caslooylo láabu nigoreʼ. Toib hermano ni laa Christian nigolú gosacbu mal órni bisiambu de gócbu anciano. Per diti bireʼganbu, xomod láacabu raniʼbu: «Goloʼya guica que, ná ma diti naca anciano, gonyriya ni rutirigaʼlni naʼ portín nadxiʼya Jehová». Bidxin midid gócbu anciano stoib. Christian ná:  «Diti goona pal nacacuenta láani. Per buni pensary que, pal Jehová caslooy naʼ galrronladx né cadudybu lagary goni dxiin lainy congregación stoib, nacacuenta láani por galnadxiʼ ni napa láabu né xhermana».

14. ¿Xí rasuidyno ni goniʼ toib hermana de Georgia?

¹⁴ Lóono ni nacno xpiin Jehová láaca raslooyno galnadxiʼ stipnés ni diti nac Testigos (Mat. 22:37-39). Por ejemplo, toib hermana de república de Georgia, ni laa Elena ná: «Órni gosaló bireʼya predicación, nosi buni láani por galnadxiʼ ni napa Jehová. Per laʼga goniʼs xcalnadxiʼya por Bixiosa ni noʼ guibá, láaca goniʼs xcalnadxiʼya por buñ. Buni pensary ló xi galnagan cadudy buñ né xi láani ñoladxyibu nacadiagyibu. Órni buni pensary ló guirá ndeʼ, ma más goniiny naʼ ñacnéya layibu» (Rom. 10:13-15).

15, 16. Mod rarecaa ló retrat, ¿xí galnasác racaʼ buñ órni raslooy galnadxiʼ stipnés?

¹⁵ Órni raslooyno galnadxiʼ xhermanno, láaca racnéni stipnés buñ. Ló pandemia de COVID-19, Paolo né tzeʼel gocnéyibu xidal herman buñgolien par naquiinyibu tableta né celular par ñony predicaryibu. Toibtica de herman golien nigolú gosac nagan naquiin láani, per labúu bisuidybu né dada biruʼbu xfamilbu memorial. 60 buñ ni biruʼbu  goyoʼ ló memorial por videoconferencia. Dxiin ni buny Paolo né tzeʼel gocnéni tanli hermana reʼ né xfamilbu. Né hermana reʼ gochbu Paolo ndeʼ: «Guixquixi looy por ni bisuidylo lóodo ni nacdo buñgol. Dipa sialadxi galrrasaʼ ni goyoʼ Jehová né paseins ni gopto lóodo».

¹⁶ Experiencias de clas reʼ, bisuidyni toib cós ni nigolú rasac Paolo. Bidudybu cuent que galnadxiʼ más rasacni que galnan o ni nan buñ rony. Por ngú goniʼbu ndeʼ: «Góca superintendente de circuit. Herman sigory ma bialadx discurs ni goloʼya, per rasetnaladxyibu galrracné ni bidudi layibu».

17. ¿Chú más racnéni órni raslooyno galnadxiʼ?

¹⁷ Órni raslooyno galnadxiʼ, racnéni lóocano de tipnés mod ni diti cabésno. Scú raniʼ Jonathan toib hermano de Nueva Zelanda. Toib dzú sábda, Jonathan bibiʼ toib precursor cayony predicar toib, mer ló galnalaʼ guixo. Jonathan Goloʼbu guicbu gony compañerbu precursor reʼ sábda godzu. Órcu diti gonbu pal ni cayonybu por herman reʼ, láaca ñacnéni láabu. Nábu: «Ló dzúcu diti bioladxi guireʼya predicación. Per órni bibiʼya mod rasuidytzay precursor reʼ buñ, né mod rarebuʼni, gosaló goniʼs xcalnadxiʼya por xchiin Jehová. Né diti nosi ngú, precursor reʼ bidxin góc ximiga, toib ximiga ni racné naʼ guidzaktzaya né goni goxt xchiin Jehová, né niʼsa lainy xcudxbu».

18. ¿Xí láani racladx Jehová gonyno?

¹⁸ Jehová racladx que guiráno gandxiʼno láabu né saʼno. Mod ma bibiʼno, par niʼs galnadxiʼ ni rasacno por Jehová, non golno Xtiitzbu, gonyno pensary loni, né guininéno láabu guirá dzú. Né, par guislooytzaayno galnadxiʼ ni rasacno por xhermanno, non gacnéno layibu ro caquiinyibu láani. Conforma caniʼs galnadxiʼ ni napno Jehová né xhermanno, sadzakno sacró layibu. ¡Labúu sadzaktzayno layibu por tipzó!