1. Lóono ni nacno cristianos, ¿ló xí cós non gacno xomod tipnés yac? (Láaca bibiʼ dibuj).

 «YAC ni riach, buu diti labúu raguitz láani». Diitz reʼ rabeloguiaʼni mod nac tipnés yac ni rony que diti guiabni ná nigolú noʼ buroʼdant: flexibilidad. Par guiaalno ló sentido espiritual láaca non tzoʼno puext par guiachno, ndeʼ radudy diitz gacno flexibles né tzoʼno ló razón. ¿Ximod? Guiaʼno órni guidzaʼ mod nabanyno né gapno respet mod rony stipnés, né ni ragoʼyibu guicyibu gonyibu.

2. ¿Xí cualidades sacné lóono par guiaʼno órni guidzaʼ mod nabanyno, né xí guisuidyno ló artículo reʼ?

² Guiráno ni ronyno xchiin Jehová, nainy lóono tzoʼno ló razón. Né láaca nainy lóono gacno buñdxo né gapno galrronladx. Ló artículo reʼ, sasuidyno ximod gocné guirá cualidades reʼ tipnés cristianos par diti nareʼganyibu órni bidzaʼ mod bibanyibu, né ximod labúu gonyno modcuca. Per nír guisuidyno ejemplo xtuny Jehová né Jesús, diti noʼ stipnés ni nac más razonables xomod layibu.

3. ¿Ximod nanno que Jehová nac razonable?

³ La Biblia ná que Jehová nac «Guielaa» portín sagaʼdxichbu né diti rasisbu (Deut. 32:4). Per láaca nacbu razonable. ¿Ximod nanno láani? Dios riaʼbu né guirá ni radzaʼ ló Gudxlio par gac cumplir ni ma goniʼbu. Bisaʼbu lóono xomod láabu, por ngú lóono láaca labúu riaʼno órni radzaʼ mod nabanyno. Jehová ma bidudy principios ni sieed ló la Biblia, ni racné lóono cutzayno xi gonyno nac nitisi galnagan ni guicalóno. Mod rony Jehová né guirá principios xtunybu, raslooyni que nacbu toib Dios ni rasagaʼdxich per láaca nacbu razonable.

4. Bisetlaa toib ejemplo ni raslooy que Jehová nac razonable (Levítico 5:7, 11).

 ⁴ Ni rony mandary Jehová diti rachéni né nacni razonable. Diti nachóngbu nili nigolú nanoybu. Guibiʼno toib ejemplo ni raslooy mod góc Jehová razonable né israelitas. Diti gonabbu que guirá buñ, tanli buñ pobre né buñ ric, nadudyibu toibsi clas sacrificio. Ley bisetlaa tipnés galrrascad ni cuacuent Jehová, niti labúu nadudy tigaaga buñ (bíil Levítico 5:7, 11).

5. Bisetlaa toib ejemplo de humildad xtuny Jehová né stoib de xcalrronladxbu.

⁵ Jehová nacbu razonable portín nacbu humilde né ronladxbu buñ. Por ejemplo, Bislooybu humildad xtunybu órni mápa mer guinitlóbu buñ mal de gudx Sodoma. Né xcalrracné tipnés ángeles, gochbu xpiimbu Lot que naxony de Sodoma né ñee laidy dainy. Per Lot bidzuiby ñee cu. Por ngú gonabbu Jehová nadudy lagary láabu né xfamilbu ñeeyibu gudx Zóar, toib gudx mitien ni láaca Jehová ná guinitló. Jehová labúu ñaibybu Lot que nasobbu guiráxadit ni goniʼbu,per diti bunybu ngú. Gosaguelbu ni goniʼ Lot, ná ndeʼ buny que ma diti nanitlóbu Zóar (Gén. 19:18-22). Íz después, Jehová binladx buñ ni bibany gudx Nínive. Bixelbu profeta Jonás ñee ñaibybu guirá buñcu que tanli layibu né xcudxbu guinitló por guirá cós mal ni cayonyibu. Per, órni buñ ninivitas góc arrepentir, Jehová gop laxtima layibu né bitudybu scásiʼ xcalkiéyibu (Jon. 3:1, 10; 4:10, 11).

6. ¿Xí ejemplos raslooy que Jesús nac razonable xomodca Jehová?

⁶ Jesús nac razonable xomod Jehová, né ngú biendxichni órni bunybu xchiin Jehová ló Gudxlio. Ná bieedbu ló Gudxlio par gony predicarbu guirá «xiil xtuny gudx Israel ni ma binit», toibtica buelt gocnébu toib buñgonaʼ ni diti góc israelita. Gonaʼcu gonabbu Jesús nasial xiindzapbu, ni cayonynaagolú toib demony láabu. Jesús binladx gonaʼ reʼ né bisialbu xiindzapbu (Mat. 15:21-28). Gonyno pensary ló stoib ejemplo. Después ni gosaló Jesús buny xchiin Dios ló Gudxlio, goniʼbu: «Pal noʼ ni raniʼ nisló buñ que diti rimbu naʼ, naʼ láaca saniya que diti rimbuya láabu» (Mat. 10:33). ¿Per goleʼbu Pedro tiplad portín tzón buelt goniʼ Pedro que diti rimbu láabu la? Yaca. Gonbu que Pedro nigolú góc arrepentir né que diti bisiambu Jehová. Después ni biás Jesús lad gueʼet, bireʼbu ló Pedro, né sigory gochbu Pedro que nigolú bitudybu scásiʼ ni bunybu né que nadxiʼbu Pedro (Luc. 24:33, 34).

7. Mod ná Filipenses 4:5, ¿ximod racladxno guimbu buñ lóono?

⁷ Ma bisuidyno que Jehová né Jesús nacyibu razonables. ¿Né lóono ga? Jehová rabés que láaca gacno modcu  (bíil Filipenses 4:5). Labúu guinabdiitzno lóocano: «¿Rimbu stipnés naʼ xomod toib buñ ni rioʼ ló razón, né ni rasaguel ni raniʼ stipnés la? ¿O rimbuyibu naʼ xomod toib buñ ni diti rioʼ ló razón né nanoydiguieʼ la? ¿Raniiny naʼ que guirá ór gac xomod nainy naʼ la? ¿O rioladxi guicadiaga ni raniʼ stipnés né rasaguela gac mod náyibu órni labúu la?». Laʼga más rioʼno ló razón, más sacno xomod Jehová né Jesús. Guisetlano chop cós ro nigolú rasac gacno razonables: Órni radzaʼ mod nabanyno né órni stipnés diti rony pensary né diti rony xomod lóono.

8. ¿Xí láani labúu gacné lóono órni radzaʼ mod nabanyno? (Láaca bibiʼ ñeʼ guiich).

⁸ Órni radzaʼ mod nabanyno, non gacno buñ ni rioʼ ló razón né gacno flexibles. Tisintiempsi labúu guinás galguitz lóono, tudyno ló galsii o tzoʼ galrradíil lad partid gudx ro rabésno. Guirá cós reʼ ni radxin tiptisi labúu guitzaʼni mod nabanyno, né xtolni sapno galnagan ni diti cabésno (Ecl. 9:11; 1 Cor. 7:31). Dada órni radzaʼ dxiin ni ronyno lainy xcudx Jehová, labúu coʼni prueby lóono. Gac nitisi gac, labúu guiaʼno órni radzaʼ mod nabanyno pal ronyno tap cós reʼ: 1) guicacuentno mod nacni 2) gonyno pensary ló dzú ni sietra, 3) coʼno guicno ló cós sacróyen ni napno né 4) gacnéno stipnés. b Guibiʼno ximod guirá ndeʼ ma gocnéni herman.

9. ¿Xí buny toib galtzeʼel ni nac misioneros par labúu cualóyibu galnagan ni diti golésyibu?

⁹ Guicacuentno mod nacni. Emanuele né Francesca nacyibu misioneros, né seeyibu stoib gudx. Órni bidxinyibu lagarycu, bisuidyibu diitz ni raniʼ buñ de lagarycu né bimbuyibu herman de congregación ro bidxinyibu. Per órcu gosaló pandemia de COVID-19, né ma diti labúu bidopyibu né herman. Láaca, xinaʼ Francesca goity tiptisi. Nigolú goniiny Francesca ñoʼ né xfamil, per xtol pandemia diti labúu goyeebu. ¿Xí láani gocné láabu ló galnagandaʼ reʼ? Primer, Emanuele né Francesca bunyibu oración toibsi né gonabyibu Jehová nadudy sabiduría layibu, par labúu nacalóyibu galnagan ni godudyibu ló. Jehová cuapy oración ni bunyibu né biquiimbu xcudxbu par nadudybu ni caquiin galtzeʼel reʼ xorpani. Por ejemplo, nigolú buny animarni layibu, ni goniʼ toib hermano ló toib video: «Pal rioʼno conforme mod nabanyno, más sioʼno nakit né raquiinno oportunida ni napno par guinino xtiitz Dios». c Ni rarop, goloʼyibu guicyibu naniʼyibu xtiitz Dios por teléfono, né dada gosaló bisuidyibu toib buñ. Né ni rion, cuacuentyibu galrracné ni bidudy herman layibu né bidudyibu guixquix herman por xcalrronladxyibu. Ló tobiz, toib hermana ni goyoʼ xalagaryibu bixel mensaj né textos guirá dzú ronoʼyibu. ¿Xí rasuidyni lóono? Pal riaʼno né mod nabanyno, sioʼno nakit né ni labúu gonyno.

10. ¿Xí láani buny toib hermana órni bidzaʼ mod bibanybu?

¹⁰ Gonyno pensary ló dzú ni sietra, né coʼno guicno ló cós sacróyen ni napno.  Christina, toib hermana rumana ni rabés gudx Japón, goyoʼ nabambu órni congregación ro goyoʼbu ni raniʼ inglés bibílni. Per diti bunybu pensary mod bibanybu. Xalagary ngú, goloʼbu guicbu ñonybu rutirigaʼlni láabu lainy toib congregación ni raniʼ japonés, né naniʼbu xtiitz Dios né gan ló diitzcu. Gonabbu toib buñgonaʼ ni bunynébu dxiin, ñacné láabu par naniʼtzaybu diitz japonés né xcalrracné la Biblia né follet ni laa, Bibany goxtiguie, né gonaʼcu gosaguel. Christina labúu bisuidybu biiybu diitz né buñ ló diitz japonés. Né diti ngúsi; gonaʼ ni bunynébu dxiin goniiny ñan más de la Biblia. ¿Xí rasuidyno? Pal ronyno pensary ló dzú ni sietra né ragoʼno guicno ló cós sacróyen ni napno, órni tiptisi guidzaʼ mod nabanyno, labúu sitnéni galnasác ni diti cabésno.

11. ¿Xí láani buny toib galtzeʼel órni goyoʼyibu ló galnagan por bidxiich?

¹¹ Gacnéno stipnés. Toib galtzeʼel ni rabés lagary ro diti napyibu permís guiniʼyibu xtiitz Dios, bisnityibu xchiinyibu órni bidxin galsii xcudxyibu. ¿Xí láani bunyibu par labúu cualóyibu láani? Primer, goyoʼyibu conforme né ni gopyibu. Né, ni rarop, xalagary ñonyibu pensary ló xcalnaganyibu, goloʼyibu guicyibu guiquiinyibu xtiempyibu guiniʼyibu xtiitz Dios par gacnéyibu stipnés (Hech. 20:35). Ni nac buñguieeu goniʼ: «Godudydzúdo ló predicación, por ngú diti gopdo tiemp par ñonydo pensary ló galnagan ni cacalódo né gopdo más tiemp par gonydo xchiin Jehová». ¿Né lóono ga? Pal radzaʼ mod nabanyno, guisetnaladxno que más galán gacnéno stipnés, né máspa lá, gacnéno layibu órni ranino xtiitz Dios.

12. ¿Ximod labúu gacné lóono ejemplo xtuny Pablo par gacno flexibles ló predicación?

¹² Ló predicación, nigolú rasac gacno flexibles. Rooyno diitz né buñ ni nap gadzé crenys, ni gadzé mod goniʼs né ni gadzé mod nac. ¿Xigony non guisuʼno mod buny Pablo? Portín gócbu flexible né goyoʼbu xalagary buñ. Jesús golú láabu par gócbu «apóstol par guirá gudx» (Rom. 11:13). Né, par labúu ñonybu dxiincu, Pablo buny predicar buñ judíos, buñ griegos, buñ ni naní guic, campesin, buñ nan né reyes. Par nadxiimbu xcalnabany buñ, Pablo bunybu xtem par ñacbu «buñ de guirá clas» (1 Cor. 9:19-23). Órni goniʼbu xtiitz Dios, goloʼbu cuent costumbres né crenys xtuny buñ. ¿Né lóono ga? Pal rayopyno mod guinino xtiitz Dios, né rayopyno mod par tigaaga buñ guioladx guicadiag lóono né ganyibu ni caquiinyibu, sarebuʼ ni gonyno.

13. ¿Xí riesga rabeʼno tiplad pal rapno respet ni rony pensary stipnés? (1 Corintios 8:9).

¹³ Pal rioʼno ló razón, diti sasac naganno gapno respet ni rony pensary stipnés. Por ejemplo, tipnés hermanas rioladx guitieʼbu lóbu, per stipnés yaca. Tipnés cristianos rioladx gueʼ alcohol né midid, per stipnés yaca. Guirá cristianos raniiny gacyibu buñ nasac, per gadzéga mod racyibu remeidy. Pal ronyno crer que más galán mod ronyno pensary né rayopyno mod gony stipnés xomod lóono, labúu guichelno ñeʼ stipnés né labúu coʼno galnagan lainy congregación. ¡Diti nainy lóono gonyno ngú! (bíil 1 Corintios 8:9; 10:23, 24). Pal  rasobno principios ni sieed ló la Biblia, láani sacnéni par guibiʼno cós né midid né guiguaʼno sacró né stipnés. Guibiʼno ximod labúu gonyno láani.

14. ¿Xí principios ni sieed ló la Biblia labúu gacné lóono mod gactzayno né mod guacno lairy?

¹⁴ Lairy ni rocno né mod ractzayno. Xalagary naniʼ Jehová xipa mod non gac lairy ni guacno, bidudybu principios ni ragonés lóono. Mod rocno lairy non gonyxiroʼni Dios né guislooyni que rioʼno ló razón né que ragoʼno xcalrrienno (1 Tim. 2:9, 10; 1 Ped. 3:3). Por ngú diti nainy lóono que, xhapno, ngúsi guibiʼ buñ. Principios ni sieed ló la Biblia láaca labúu gacnéni ancianos par diti guiniʼyibu xipa mod guac herman lairy o ximod coʼnyibu guicyibu. Por ejemplo, lainy toib congregación tipnés mbioxhlas dopien góc guitzguicyibu né diti bionyni portín bisuʼyibu mod buny stipnés buñ. Ancianos goniiny ñacnéyibu guirá mbioxhlas reʼ. ¿Per ximod ñonyibu láani, sin ñaibybu xipa mod non gactzayibu? Superintendente de circuit gochbu que ñaibyibu herman: «Pal riapylo ló plataforma né ni dxeecu máspa looy rabiʼ, xalagary guicadiag ni caniʼlo, ¿diti ronylo pensary que mod nac xhaplo né mod goctzaylo diti galán nacni la?». Ndeʼ buny reglar galnagan sin naniʼyibu xipa mod non ñactzayibu. d

15. ¿Xí leyes né principios ni sieed ló la Biblia ragonés lóono órni cuuno xí remeidy gacno? (Romanos 14:5).

¹⁵ Ni ronyno par diti guixoʼno. Tigaaga cristiano non gan xi gony par diti guixoʼ (Gál. 6:5). Órni cuuno xi clas remeidy  gacno, non guisetnaladxno tipnés principios ni sieed ló la Biblia ni ritlaa diti guicaʼno runy nili tzoʼno ló buñ bruj o ni rony galchiser (Hech. 15:20; Gál. 5:19, 20). Stipnés cós ma tigaagano ganno xi láani gonyno. Tipnés cristianos nosi racacuentyibu remeidy xtuny doctor, né stipnés más rioladxyibu stipnés remeidy. Naʼ lóono ma nanno xi láani gonyno, non gapno respet derech ni nap xhermanno par cuuyibu xi clas remeidy guicaʼyibu. Por ngú non guisetnaladxno ndeʼ: 1) nosi Gobierno xtuny Dios labúu guisial tipzódiguie guirá galguitz (Is. 33:24); 2) tigaaga cristiano «non gandxich» xi cós más galán par láabu (bíil Romanos 14:5); 3) diti rony juzgarno stipnés nili ragoʼno galnagan ro noʼyibu (Rom. 14:13), né 4) cristianos randxiʼ saʼ né nanyibu que ni más rasac láani ngú que congregación tzoʼ toibsi né diti ni ronyibu pensary (Rom. 14:15, 19, 20). Pal ragoʼno guicno guirá ndeʼ, saguaʼno toibsi né xhermanno né tzoʼno sacró lainy congregación.

16. ¿Ximod labúu tzoʼ ancianos ló razón né xcompañer? (Láaca bibiʼ dibuj).

¹⁶ Nír ancianos non guislooy ximod non tzoʼ buñ ló razón (1 Tim. 3:2, 3). Por ejemplo, toib anciano diti rabésbu gac mod ni nábu, nosi portín lagolbu ló stipnéscu. Nanbu que espíritu xtuny Jehová labúu guichiin nitisi anciano par guiniʼ cós ni labúu guirebuʼ. Né, pal rasobyibu guirá principios ni sieed ló la Biblia, ancianos ni rioʼ ló razón sacné né gan mod guiniʼ stipnés ancianos ná gadzé mod rabiʼyibu láani.

17. ¿Xí galnasác sacaʼno pal rioʼno ló razón?

¹⁷ Órni rioʼno ló razón racaʼno xiroʼ galnasác. Por ejemplo, radzaktzayno saʼno né raguaʼno sacró lainy congregación. Láaca rasacno sacró portín lainy xcudx Jehová noʼ xidal clas buñ ni nac gadzéga mod né nap gadzéga costumbres. Né ni más rasac láani ngú, rioʼno nakit portín casuʼno Jehová ni nac toib Dios razonable.