1. ¿Xigony nigolú rasac tzoʼno puext antes de gac toib desgrasy?

 PAL rioʼno puext salaani lóono. Por ejemplo, órni rac toib desgrasy, buñ ni noʼ puext labúu salaayibu né labúu sacnéyibu stipnés. Xomod bisetlaa toib organización humanitaria de Europa, «pal rioʼno puext labúu guilaano».

2. ¿Xigony non tzoʼno puext órni guidxin gran tribulación? (Mateo 24:44).

² Tisintiempsi saló «gran tribulación» (Mat. 24:21). Gran tribulación diti sácni xomod stipnés desgrasy portín buñ maca nan láani. De goloʼ 2.000 íz, Jesús gochbu xpiimbu que non tzoʼyibu puext órni guidxin dzúcu (bíil Mateo 24:44). Pal rasobno consej reʼ diti sasac naganno guilaano ló dzú nagandaʼcu né labúu sacnéno stipnés par labúu guilaa (Luc. 21:36).

3. ¿Xigony raquiin gony guantaryno, gonladxno, né gandxiʼno par tzoʼno puext órni guidxin gran tribulación?

³ Par tzoʼno puext órni guidxin gran tribulación raquiin gapno tzón cualidades. ¿Xí láani gonyno órni gaibyibu lóono guidudyno toib mensaj de condena né órni buñ guicaló lóono? (Apoc. 16:21). Saquiin gony guantaryno par guisobdiitzno Jehová né gapno confianz lóbu que sacnébu lóono. ¿Xí láani gonyno pal xhermanno rasnityibu xcósyibu né riaʼanyibu scásiʼ? (Hab. 3:17, 18). Órcu saquiinno compasión par gacnéno layibu né guidudyno ni caquiinyibu. ¿Né xí láani gonyno pentzi cuésno né xhermanno ló toib lagary mitien órni guicaló guirá gobiernos lóono? (Ezeq. 38:10-12). Cu raquiin gapno toib galnadxiʼ xiroʼ por guirá xhermanno.

4. ¿Xí radudy diitz gonyno rutirigaʼlni lóono par gony guantaryno más né guislooyno compasión né galnadxiʼ?

⁴ Xtiitz Dios racnéni lóono par gony guantaryno, gapno compasión né galnadxiʼ. Lucas 21:19 ná: «Pal rony guantaryto salaato». Colosenses 3:12 raibyni lóono:  «Colgap galrronladx». Né 1 Tesalonicenses 4:9, 10 ná: «Dios ma casuidybu lóoto gandxiʼto saʼto. […] Per rony animardo lóoto, gonyrato más». Guirá diitzreʼ gocni par buñ ni ma caslooy galrronladx, galnadxiʼ né ni cayony guantary. Per biquiin ñonyrayibu láani. Né ngúca non gonyno. ¿Xí sacné lóono gonyno láani? Ló artículo reʼ sasuidyno ximod gop guirá cristianos del siglo primero cualidades reʼ, né ximod guisuʼno layibu né modcu tzoʼno puext órni guidxin gran tribulación.

5. ¿Xí buny cristianos ni bibany ló siglo primero par labúu buny guantaryibu?

⁵ Cristianos del siglo primero biquiin ñony guantaryibu (Heb. 10:36). Láaca diti nosi cualóyibu galnagan ni racaló buñ, láaca cualóyibu galnagan por fe xtunyibu. Xidal de layibu cualóyibu persecución xtol guirá líderes religiosos judíos né buñchiin de Roma né láaca de xfamilyibu (Mat. 10:21). Goyoʼ ór cualóyibu galnagan xtol guirá apóstatas ni biyopy mod natzoo congregación né xcalrrascú (Hech. 20:29, 30). Ná scú, guirá cristianos cu buny guantaryibu (Apoc. 2:3). ¿Ximod bunyibu láani? Bunyibu pensary ló buñ ni buny guantary ni ritlaa ló Escrituras Hebreas, xomod Job (Sant. 5:10, 11). Gonabyibu xcalnadip Jehová (Hech. 4:29-31). Né gopyibu confianz que Jehová nadudy galnasác layibu portín buny guantaryibu (Hech. 5:41).

6. ¿Xí labúu guisuidyno ni buny Merita par buny guantarybu oposición?

⁶ Lóono láaca labúu gony guantaryno pal riaʼano gonyno pensary ló buñ ni buny guantary ni radzelno ló la Biblia né publicaciones. Ngú ni gocné toib hermana de Albania ni laa Merita órni xfamilcabu cualó láabu. Láabu nábu: «Órni bisudi ló la Biblia historia xtuny Job, bidxinni lainy xcalnabani. Buñguieeu reʼ nigolú godudy ló galrrioʼob, né diti gonbu chú xtol gocni. Ná scú, xomod ná Job 27:5, láabu goniʼbu: ¡Dada dzú gati, dipa sasiana goni ni nac xinésni! Ngú bunyni que buni pensary que xitcal láani galnagan ni racalóya, que galnagan ni cualó Job, né naʼ naana chú nap dool».

7. Ná nigoreʼ diti cacalólo toib galnagandaʼ, ¿xí raquiin guisuidylo nigoreʼ?

⁷ Stoib cós ni sacné lóono gony guantaryno, láani ngú gaibyno Jehová ximod rasacno guirási ór (Filip. 4:6; 1 Tes. 5:17). Sigory nigoreʼ diti cadudylo ló toib galnagandaʼ. ¿Per xí ronylo órni diti rioladxlo toib cós, órni diti nanlo xí láani gonylo, né órni rioʼlo ló galrrasaʼ? ¿Rayopylo xcalrracné Jehová la? Pal riaʼlo raibylo Jehová galnagan ni racalólo dzúna dzú, láaca scúca sonylo láani ló dzú ni sietra órni guicalólo galnagan ni más xiroʼ. Saplo confianz que láabu nanbu pu ór né ximod gacnébu looy (Sal. 27:1, 3).

8. ¿Ximod raslooy ejemplo xtuny Mira pal rony guantaryno nigoreʼ labúu sony guantaryno después? (Santiago 1:2-4; láaca bibiʼ dibuj).

⁸ Labúu gony guantaryno gran tribulación pal rony guantaryno prueby ni racalóno ló naareʼ (Rom. 5:3). ¿Xigony ranino ndeʼ? Xidal herman rasacyibu, que ni rony guantaryibu prueby nigoreʼ ronydxichni layibu más. Órni rony guantaryibu toib prueby né xcalrracné Jehová, fe xtunyibu racni más xiroʼ, rapyibu más confianz que Jehová labúu sacné layibu. Né xcalrracné fe reʼ labúu sony guantaryibu stoib prueby  ni guieed (bíil Santiago 1:2-4). Modcu rony pensary toib precursora de Albania ni laa Mira. Láabu nábu que rolooyni diti noʼ stoib ni cacaló galnagan xomod láabu. Órcu ronybu pensary ximod ma gocné Jehová láabu ló 20 íz ni ma godudy né raibybu láacabu: «Góc fiel diti guisapylo guirá íz ni bunylo xchiin Jehová né guirá galnagan ni buny guantarylo né xcalrracné Jehová». Looy láaca labúu gonylo pensary ló guirá ni ma gocné Jehová looy, par labúu cayony guantarylo. Gop confianz que tigaaga prueby ni cayony guantarylo, Jehová rabiʼ láani né sadudybu xcalnasácbu looy (Mat. 5:10-12). Por ngú órni saló gran tribulación labúu gony guantarylo né coʼlo guiclo que labúu sonyralo láani.

9. ¿Ximod bislooy compasión congregación de Antioquía de Siria?

⁹ Gonyno pensary xi láani góc né cristianos de Judea órni godudyibu ló galrralán. Órni herman de Antioquia de Siria gonyibu láani, binladxyibu guirá herman reʼ. Né bislooyibu ni gosacyibu mod ni bunyibu: bixelyibu «galrracné par herman ni rabés Judea, tigaagayibu bidudyibu midid goygaʼlni layibu» (Hech. 11:27-30). Ná guirá herman ni cadudy ló galnagancu nigolú sit bibanyibu, cristianos de Antioquia goniiny ñacné layibu (1 Juan 3:17, 18).

10. ¿Ximod guislooyno galrronladx órni xhermanno cadudyibu ló toib desgrasy? (Láaca bibi’ dibuj).

¹⁰ Lóono láaca labúu guislooyno galrronladx órni ganno que xhermanno cadudy ló toib desgrasy. Labúu gacnéno layibu nimaca modreʼ: gaibyno ancianos ximod gacnéno, guidudyno donación né gonyno oración por guirá herman ni cadudy ló galrrioʼob (Prov. 17:17). b Ló íz 2020, goyoʼ más de 950 Comités de Socorro par gocné guirá ni bixoné COVID-19. Raxquixdo guirá herman ni cayacné ló labores de socorro. Galrronladx ni rasacyibu por herman, ngú bichiin layibu par ninéyibu ni caquiin herman né gocnéyibu ló sentido espiritual, né goyoʼ ór buny reglaryibu né bunytzaayibu lidx herman né lagary ro rac reunión (bitzak láani né ni ná 2 Corintios 8:1-4).

11. ¿Ximod ronyxiroʼno Bixiosno ni noʼ guibá órni raslooyno galrronladx?

¹¹ Guirá ni ronyno par guislooyno galrronladx órni radudy desgrasy, buñ rabiʼ láani. Guibiʼno ni góc. Ló íz 2019, órni godudy huracán Dorian ni binitló toib Salón del Reino lainy gudx Bahamas. Órni cayactzay Salón cu, herman gochyibu toib contratista balac nareʼ tipnés dxiinien ni non ñac. Buñcu góoch layibu: «Nainy naʼ gacnéya organización xtunyto. Rioladxi guidudi máquinas ni guiquiinto né guidudi buñ par gacné lóoto. Radziguiaʼya mod radzakto ximigto». Casi guirá buñ diti rimbu Jehová, per rabiʼyibu guirá ni ronyno lóono ni nacno Testigos. Toib privilegio rodann láani ngú ganno que mod raslooyno galrronladx labúu gacnéni stipnés buñ guimbu «Dios, ni nap xiroʼ galrronladx» (Efes. 2:4).

12. ¿Ximod ni raslooyno galrronladx nigoreʼ, labúu gacnéni lóono tzoʼno puext órni guidxin gran tribulación? (Apocalipsis 13:16, 17).

¹² ¿Xigony nigolú rasac guislooyno galrronladx órni guidxin gran tribulación?  Portín la Biblia ná que guirá ni diti rony apoyar gobierno sapyibu galnagan (bíil Apocalipsis 13:16, 17). Sigory tipnés herman saquiinyibu galrracné par gapyibu tipnés cosien ni guiquiinyibu. ¿Raniiny lóono que órni guidxin Rey xtunyno, Jesucristo par gony juzgarbu guiránac buñ, ganbu que caslooyno galrronladx né gaibybu lóono: «Colguiané Gobierno»? (Mat. 25:34-40).

13. ¿Xí buny cristianos ni bibany ló siglo primero par gondxiʼyibu saʼyibu más? (Romanos 15:7).

¹³ Ló siglo primero guirá buñ gon que cristianos gondxiʼyibu saʼyibu. ¿Per gosac naganyibu naslooyibu galnadxiʼcu la? Gonyno pensary ló congregación ni goyoʼ Roma, ro goyoʼ herman de xidal lagary. Tipnésyibu góc judíos ni gon xiley Moisés. Per láaca goyoʼ herman de stipnés lagary, ni gop gadzé costumbres. Sigory tipnésyibu goyoʼyibu xan xomandary toib buñ né stipnés yaaca, sigory tipnés gop buñ xan xomandary. ¿Xí láani ñacné layibu par ñoʼyibu toibsi né nadxiʼyibu saʼyibu? Apóstol Pablo bidudy consej reʼ layibu: «Colguicacuent sacró saʼto» (bíil Romanos 15:7). ¿Xí bidudybu diitz? Diitz «colguicacuent sacró saʼto» radudyni diitz cobioo buñ saʼ, nacni xomod órni toib buñ racacuent looy lidx o ragoʼbu looy lad ximigbu. Por ejemplo, Pablo gochbu Filemón ximod nacacuentbu xomósbu ni góc laa Onésimo ni bixony lidxbu. Goniʼbu: «Cuacuent láabu xomod nacacuentlo naʼ» (Filem. 17). Priscila né Áquila gonyibu más de Jesús que Apolos, per cuacuentyibu sacró né bisuidyibu Apolos (Hech. 18:26). Ná guirá cristianos cu diti toibsi midid gocyibu, diti bidudyi bu lagary que mod gocyibu natzoo layibu. Xalagary ngú, sacró bidzakyibu saʼyibu, né cuacuentyibu xhermanyibu sacró.

14. ¿Ximod bislooy galnadxiʼ Anna né tzeʼel?

¹⁴ Lóono láaca labúu guislooyno xcalnadxiʼno xhermanno, guicacuentno layibu sacró, gacno ximigyibu. Ngú sony que gandxiʼyibu lóono (2 Cor. 6:11-13). Guibiʼno ni gosaclóo Anna né tzeʼel ni góc misioneros lainy gudx África Occidental. Diti xidzú de goloʼ bidxinyibu cu, gosaló COVID-19, né ma diti labúu bidopyibu né herman de congregación xtunyibu. ¿Xí buny galtzeʼel reʼ par bislooyibu xcalnadxiʼyibu? Gosaló goninéyibu herman por videoconferencia né gochyibu herman que nigolú raniiny layibu guimbuyibu herman más sacró. Ndeʼ bidxinni lainy xcalnabany herman né gosalóyibu goninéyibu por teléfono a Anna né tzeʼel né bixelyibu mensaj lóoyibu. ¿Xigony misioneros reʼ bunyibu dada ro goygaʼlni layibu par ñoʼyibu lainy congregación? Anna rabexa láani: «Dipa rialadxi galnadxiʼ ni bislooy herman xfamila né naʼ ló tiemp tzaay né tiemp nagan. Órni roni pensary loni rachiinni naʼ guislooya xcalnadxiʼya».

15. ¿Xí rasuidylo de galnadxiʼ a herman ni gosaclóo Vanessa? (Láaca bibiʼ dibuj).

¹⁵ Lainy xidal congregación noʼ xidal herman ni gadzé mod nac. ¿Xí láani gacné lóono par gandxiʼno layibu más? Guibiʼno cós sacró ni ronyibu. Toib hermana ni laa Vanessa ni rabés Nueva Zelanda gosac naganbu nadzakbu tipnés herman de congregación xtunybu, portín mod góc guirá herman bitzuitzni láabu. Xalagary  nabeʼbu guirá herman reʼ tiplad, goloʼbu guicbu nadudybu más tiemp né layibu. Por ni bunybu ngú bidudybu cuent xi ni rioladx Jehová de herman. Láabu nábu: «Tzeʼela bidxin góc superintendente de circuit, por ngú bidzakdo xidal herman, ni gadzé mod góc. Per nigoreʼ ma diti rasac nagana guidzaʼga sacró stipnés herman. Nigolú rioladxi que diti toibsi mod nacno. Né nandxichi que Jehová láaca scúca rasacbu portín ragobiobu xidal clas buñ lainy xcudxbu». Por ngú, ¿ximod guislooyno que nadxiʼno xhermanno? Gonyno dada rutirigaʼlni lóono par guibiʼno layibu xomod rabiʼ Jehová layibu (2 Cor. 8:24).

16. ¿Xigony nigolú rasac guislooyno galnadxiʼ ló gran tribulación? (Láaca bibiʼ dibuj).

¹⁶ Ló gran tribulación nigolú sasac guislooyno galnadxiʼ xhermanno. ¿Ximod sacné Jehová lóono órni saló gran tribulación? Gonyno pensary ló instrucciones ni bidudy Jehová xcudx par labúu nalaayibu órni nanitló Babilonia: «Xcudxi, goyee né goyoʼ lainy xcuartlo né bisieg xpuertni. Bicachlan por tipratsi dada órni ma godudy galnadzuitz» (Is. 26:20). Láaca saquiin guisobdiitzno instrucción reʼ órni saló gran tribulación. Diitz «xcuartlo» labúu guidudyni diitz congregación. Pal ló dzúcu noʼno toibsi né xhermanno, Jehová salaa lóono mod ma bidudybu xtiitzbu. Diti nosi gony guantaryno xhermanno, láaca raquiin gandxiʼno layibu. Pal diti raslooyno galnadxiʼ xhermanno, diti labúu salaano.

17. ¿Xí láani labúu gonyno órni ma gosaló gran tribulación pal rioʼno puext nigoreʼ?

¹⁷ «Xtzú rodann Jehová» sácni toib dzú nagan par guiránac buñ (Sof. 1:14, 15). Lóono ni nacno xpiin Jehová láaca sacalóno galnagan. Pal rioʼno puext nigoreʼ, sanno xi labúu gonyno né labúu sacnéno stipnés. Pal gony guantaryno labúu sacalóno nitisi galnagan ni guieed. Compasión, sacnéni lóono gonyno ni labúuni lóono par gacnéno xhermanno né guidudyno ni guiquiinyibu. Né galnadxiʼ ni sasacno por layibu sacnéni lóono guiguaʼno toibsi. Jehová sadudy toib galnabany tipzó lóono ló toib Gudxlio ro ma diti sioʼ desgrasy nili sioʼ galnagan (Is. 65:17).