Arqueólogos ma bidzelyibu ro goyoʼ Babilonia, xidal millón de basoyáay ni biquiin par goyaʼ gudxcu. Xomod ná arqueólogo Robert Koldewey, guirá basoyáay cu goyaʼijni lainy horno «ni goyoʼ fuer de gudx, ro goyoʼ yoo sacró né ro goyoʼ yac par ñaʼijni».

Tipnés guiich gool ritlani que buñchiin de Babilonia láaca biquiinyibu horno par cós mal. Paul-Alain Beaulieu, ni nac mextra de Asiriología de la Universidad de Toronto, nábu: «Xidal guiich babilonios […] rasetlani que rey buny mandary ñaʼij buñ ni diti ná guisob láabu». Toib guiich ni cuá ló xtzú rey Nabucodonosor ná ndeʼ: «Colguinitló, colguisaʼij, colguigay, […] colguisal layibu lainy horno ro raay galrro […], par gacyibu gohx. Né xcalnadzuitz guii guinitló layibu».

Guirá ndeʼ rony que guirá ni roʼol la Biblia gony pensary ló capítulo 3 de libro xtuny Daniel. Historia reʼ ná que rey Nabucodonosor bunybu toib dioxh de or, nisló láach de Dura. Tzón mbioxhlas hebreos —Sadrac, Mesac né Abednego— diti gosaguelyibu naxixipyibu nisló dioxh falzcu. Ndeʼ nigolú bitzuitzni rey Nabucodonosor por ngú buny mandarybu «nadudylaʼ horno gatz buelt más que ni ronyibu láani guirá ór» né nasalyibu guionca biinreʼ «lainy horno laguii» (Dan. 3:1-6, 19-28).

Basoyáay ni bidzelyibu lainy gudx Babilonia láaca raslooyni que labúu gapno confianz ló ni ná la Biblia. Ló xidal basoyáay reʼ caa alabanzas par rey. Toibtica de láani ná: «Nabucodonosor, rey xtuny Babilonia […]. Naʼ bisaʼya palasyreʼ né lidxi […]. Xiinna sony mandary láani por tipzó». Ndeʼ radzakni né ni ná Daniel 4:30, ro racxiroʼ Nabucodonosor né diitzreʼ: «¿Xí diti ndeʼ Babilonia la Grande, ni naʼca bisaʼya né xcalnadipa par gan buñ chú naʼ la?».