¿MA GOYOʼ ór gosaclo scareʼ né dada gonablo ñaitylo la? Pal scú láani, sigory rienlo mod ni gosac Adriana. Láabu nigolú goyoʼbu ló galrrasaʼ, goyoʼ nabambu né diti bidzel xcalrriembu xi ñonybu. Bidxin midid doctor góoch láabu que caxonébu depresión.

Bibiʼ ni gosaclóo Kaoru, toib buñguieeu de gudx Japón ni gon bixios né xinaʼ ni nac buñgolien. Láabu nábu: «Dzúcu nigolú godudy midid goyoʼya ló galrrasaʼ xtol dxiin. Bidxin midid, biroc ló xcalrralaʼna né ma diti gonás bacaʼal naʼ. Goniiny ñati par nareʼya ló galrrioʼobcu».

Toib buñguieeu de gudx Nigeria ni laa Ojebode ná: «Guirá ór goyoʼya nabann né nitisi cós biscudxaʼ naʼ. Dada godudy ló xpensary nagati naʼca». Ojebode, Kaoru né Adriana diti bigaityibu láacayibu, per nabanni portín guirá íz casi xhoongayoʼ mil buñ rony ngú.

Casi guirá buñ ni raity ni diti ná guibany, nacyibu buñguieeu, né xidalyibu diti ranab galrracné portín ratoyibu. Per Jesucristo goniʼ que buñguitz raquiin tzee ló doctor (Lucas 5:31). Por ngú, pal rasaclo modreʼ diti guitoylo, biyopy galrracné. Xidal buñ ni caxoné depresión rareʼyibu ló galguitz reʼ órni rieeyibu ló doctor. Ojebode, Kaoru né Adriana goyeeyibu ló doctor né nigoreʼ ma rasacyibu sacró.

Par labúu guireʼ buñ ló depresión, tipnés doctores radudyibu remeidy buñ, rooyibu diitz né buñ o ronyibu guiropnésni. Láaca, buñ ni caxoné depresión raquiinyibu galrracné, xfamilyibu né ximigyibu raquiin guieen né gap paseins layibu. Diti noʼ stoib amig ni más galán que Jehová, láabu racnébu lóono né Xtiitzbu la Biblia.

Casi guirá buñ ni caxoné depresión rieeyibu ló doctor por xiroʼ tiemp né raquiin guitzaʼyibu mod nabanyibu par labúu gony guantaryibu xcalguitzyibu. Per pal looy naplo depresión, gop confianz que ló dzú ni sietra sareʼlo ló galguitz reʼ. Ngú rony pensary Ojebode, ni ná: «Raniiny naʼ guibiʼya ximod gac cumplir Isaías 33:24, ro ná que sadxin dzú ni toib buñgudxlio guiniʼ: Caxoʼya». Láaca sacné looy ganlo que Dios ma bidudy xtiitz guicaʼno «toib gudxlio copy» ro ma diti sioʼ «galrrioʼob», ma diti sioʼno ló galrrasaʼ né ma diti sadopy xcalnabanyno (Revelación [Apocalipsis] 21:1, 4). Xcalrrioʼoblo sanitlóni por tipzó. Ma dipa sasaclo mod casaclo nigoreʼ, nili sasetnaladxlo láani (Isaías 65:17).